¹ Pano nashana kumuvurukitha mwayendhange,yokuhatera kumdudhi dhodhiwa edhi namuyuvithira,edhi mwatambura nopa mwemanine . ² No kukomonoka ngeshi,hamu kwaterera nganganga kunando dhi na muyuvithera ,shimengwa nyara nyara mwatawa. ³ Namupa mudyo ghokutangerera oghu na tamburire,kukutha mumatjangwa ne ,Kristus ne gha ferere pamurandu gho maghuyi ghetu,. ⁴ Hamuvumbekire ,nohamu tumue mwawafu mudiyuwa dyoghuhatu. ⁵ Popo vene ghahokokere kwaCephas, ndani kwawashadikumi nohawadi ;. ⁶ Ndani kuna kuhokora karo kwawayendhetu mathere kwoko ,hamweya hopapagho ne hafu ghoku hamweya ne hayumi ⁷ .Noghahokokire karo kwajakubusi,ndani kwawaapostoli wahe. ⁸ Pakuhurera ne ghana nihokokere name ,yira yu hashamurukere mughunhwere. ⁹ yoyishi yame nomupostoli ghokuhureghera pawa postoli.Mbadi nafumana kunitoya eshi nomu apostoli yoyishi na kuthakuthire hana Nyambi. ¹⁰ Ene kupitera muneke dhaNyambi ne,na kara thikadi nidi no neke dhendi ne mbadi dhanyaranyara .ene,narughana thikuma kupiterera hamweya .Karo mbadi yame ,ene neke dhaNyambi edhi dhidi mwange. ¹¹ Podigho shi yane ndi hodigho ,eyi ne yotwa yuvitha no mwatawa. ¹² Ngeshi Kristus ne kumuyuvithako eshi ghambukire mwawafu ,ngepi edi hana kughamba hamweya hopapenu eshin mbadiko muvumbukero wawafu? ¹³ Ene ngeshi mbadiko muvumbukero mwawafu,Kristus naye mbadighavukire;. ¹⁴ No ngeshi Kristus mbadi hamutumine ne,yanyara-nyara twakuyuvitha no matawero ghetu karo ne ghanyara-nyara. ¹⁵ Karo, ngo hana kuwana mumwetu ghumbango twa shupa kwaNyambi, yoyishi twa shupire eshi Nyambi gha tumunine Kristusi mwawafu. Ene mbadi gha mu tumunine, ngeshi ghushemwa hafu ne mbadi havumbuka. ¹⁶ Ngeshi hafu ne mbadi hawa tumunine, ngambi Kristusi naye mbadi ha mutumunine; ¹⁷ no ngeshi Kristusi ne mbadi ha mu tumunine, matawero ghenu ne ghonyara-nyara noshime mwa karera mumaharwero ghenu. ¹⁸ Shime karo ngo nowa hafera mwaKristusi ne ngo hayongara. ¹⁹ Ngeshi tukurupere mwaKristusi, ngo mwawanu wahe atwe mbo tuna wana thineke thishokuru. ²⁰ Ene pano Kristusi, oyu ghadi eshi mbuyo dhokutangerera kwawafu, ghapwa kutumuna mwawafu. ²¹ Thika edi yeyire yifa mwamunu, dyoweyire muvumbukero wawafu karo mwamunu. ²² Thika edi hakununga wahe mwaAdamu mukufa, kemo karo mwaKristusi dyombo hawa tumuna. ²³ Ene gha karepo makurando kukutha mwakehe yu: Kristusi, you ghadi eshi dimbuyo dyo kutangerera, ndani kurandako awa hahatera kwaKristusi mbo hana wa tumuna pamwiyero wendi. ²⁴ Munyima pombo gheya mahurero, apa mbo ghatapa ghufumu kwaNyambi ghowihe, apa mbo gha hanyaghurapo miragho nomarawero ghomaheya nomangcamu. ²⁵ Mbo ghana raghura kate kuwitha haka nore dhendi waheya kumapadhi ghendi. ²⁶ Mukanore gho kuhurerera oyu mbo gha hanyaghura ne yifa. ²⁷ Aye ''ghatura yoyihe kwishi dhomapadhi ghendi.'' Ene pakughamba kemo eshi, ''ghatura yoyihe,'' ya kena eshi oyu ghatapa yoyiheya ne mbadi nayeko kumarawero ghendi. ²⁸ Ngeshi yinu yoyihe ne mumarawero ghendi, Mwana thinda sharaghure kupitera moyu ghatapa marawero gho kuyinu yoyiheya, podigho eshi Nyambi gha rikanye momuheya. ²⁹ Endi yipi sho ha kone kutenda awa hana yoghanga diyoyero dyawafu? Ngeshi hafu ne mbadi hakuwatumuna, ngo pashanye hana wayoyeranga diyoyero? ³⁰ Pashanye tuna kukarera muma ghukukutu kehe pano? ³¹ Ame kufa kehe diyuwa! Oghu ne ghushemwa yira yikutanaghura yange mumwenu, oghu nakara nagho mwaKristusi Jesusi ghoFumu wetu. ³² Yinu munye nawanenapo, kukutha yimona yawanu, ngeshi narwire noyishereka yomuEfesusi, ngeshi hafu ne mbadi hawa tumuna? '' Mutudye nokunwa, yoyishi peghundha twa kufa.'' ³³ Mbadi muku yongarithe: ''Muyendha ghomuyi ghashinya yikara.'' ³⁴ Muhuke kumaghano mwene! Mupare mughuhungami! No mwarundurura ghuyi wenu. Hamweya hopapenu ne mbadi hadi noghudimuki ghokwaNyambi. Na kuyighambera yi kuthihonyi thenu. ³⁵ Ene ghumwe ne kuna kwipura eshi, ''Ngepi edi hawa tumunanga hafu, noyirama yongepi mbo hawana?'' ³⁶ Mwa thuta! Eyi ghuna kukuna mbadi wakwimana ngeshi mbadi yina kutanga kufa. ³⁷ Eyi muna kukuna ne mbadi yombo yiakarapo, ene dimbuto. Mbo dina kareta dinanda dyotumbi endi dyo yinu yimweya. ³⁸ Ene Nyambi ne ghayipa thishwi ethi ghahima, no kukehe dimbuto thishwi thadyo. ³⁹ Mbadi nyama dhoyinu yoyihe ne dha kupitura. Ene, pakara nyama dhawanu, nodhimweya ne dhoyiyama, nodhimwe dhoyinyunyi, ndani nodho thi. ⁴⁰ No pakara karo yirama yomudiwiru noyopa muve. Ru twedhimitho dhoyirama yomudiwiru ne rwa kutjaka noyopa muve. ⁴¹ Diwiru kurwedhima kupiterera, no kaghonda nako mwamonamo, nonungwedhi nadho dhakutjaka. ⁴² Kemo karo dyombo ghukara muvumbukero wawafu. Eyi ha kunine muma yowero, nopa muvumbukero ne yokupira mayowero. ⁴³ Eyi ha kunine nodishamu; Katumuka mumaghuwa. Eyi ha kunine mughukashu; katumuka mungcamu. ⁴⁴ Kukuna yirama yonyama; katumuka yirama yopamupepo. Thika edi pakara yirama yopanyama, pakara karo yirama yopamupepo. ⁴⁵ Thika edi hayitjanga karo eshi, ''Munu gho kutangerera Adamu oyu gha karire mudhimu gho kupara.'' Adamu gho ghuhura ne gha pirukire mupepo ghokuparitha. ⁴⁶ Ene mupepo mbadi watangire kwiya ene yirama, munyima mupepo. ⁴⁷ Munu gho kutanga ne ghopakaye, hamutenditha kumuve. No munu ghoghuwadi ne kudiwiru gha tundire. ⁴⁸ Thika edi ghadi oyu gha tunda kumuve, nomunu ghomudiwiru, dyo hapitura nagho awa ha tunda mudiwiru. ⁴⁹ Thika edi twakara nothishwi thopamuve, dyombo tukara nothishwi thomu diwiru. ⁵⁰ Pano kuna kumutongwera, mwayendhange, nyama nomanyinga ne mbadi wa kuyora ghuFumu waNyambi. Endi yomayowero kyipingitha yo kupira mayowero. ⁵¹ Mukenge! Kuna kumutongwera thithithatero: Mbadi mbo tufa twaheya, ene twahe mbo hana tuthitununa. ⁵² Mbo hana tuthitununa pakapupi kamanana, mumuvindjwera, padipori dyoghuhura. Apa mbo di hataghuka, no hanu mbo hana tumuka yira mbadi hayowa, no mbo tuna thitunuka. ⁵³ Eyi yirama yomayowero mbo yinapu kushupeka noyirama yokupira mayowero, noyirama yonyama mbo yina thitunuka yikare yomudhimu. ⁵⁴ Ene apa mbo yirikanya eshi yirama yomayowero ne hana yishupeka noyirama yokupira mayowero ne, no kuthitununa yirama yonyama kumudhimu, pombo yirikanya yitjanga eshi, ''Kufa ne kuna dhingunuka po keho mumawithero.'' ⁵⁵ ''Kufa, kupi mawineno ghoye? Kufa, kupi rudi runonga roye?'' ⁵⁶ Runonga royifa ne diharwero, nongcamu dho diharwero ne miragho. ⁵⁷ Ene matumero kwaNyambi, oyu ghatupa mawithero kupitera mwaFumu Jesusi Kristusi! ⁵⁸ Podigho, mwayendhange ghomwahakwa, mutanare mbadi ghu kunyunga-nyunga. Roruhe mukare muthirughana thaFumu, yoyishi mwa dimuka eshi yirughana yenu yomwaFumu ne mbadi yanyara-nyara.