¹ Paghulusi, oyu ghethire Jesusi Kristusi ghakare mupostoli pamahimeno ghaNyambi, naSothenesi ghominetu, ² kungirishe dhaNyambi muKorinte, awa hapwa kukushura mwaJesusi Kristusi nohawetha hakare hapongoki, pofotji nawahe kumango ghomahe awa hokwitha dina dyaFumu wetu Jesusi Kristusi, oyu ghadi eshi Fumu wagho noFumu wetu. ³ Thineke nothiraro yikare nenu kutunda kwaWihetu nokwaFumu Jesusi Kristusi. ⁴ Roruheya nakutura Nyambi wange kukwenu yoyishi neke dhaNyambi edhi ghatapire kwaJesusi Kristusi kwenu. ⁵ Ghamutungeka mukehe yinu, mumanando nomuyidimuka yoyihe, ⁶ nongonodhi dho kwaKristusi dhakara ghushemwa mukatji kenu. ⁷ Pano mbadiko ethi shomunyande kuyitapera yokumupepo, apa munakutaterera meyero gha fumu wetu Jesusi Kristus, eshi mbomupire murandumudiyuwa edi mbogheya fumu Jesusi Kristus. ⁸ Aye mboghanamutendi mukare ghutawedhi kate paghuhura. ⁹ Nyambi ne ghahungumana, aye ghamwitha kumakukupakerero ghamwanendi Jesusi Kristusi ghofumu wetu. ¹⁰ Pano nakumukumbera mwayendhange mudina dya fumu Jesusi Kristusi, eshi mukare nodighano dyofotji, nopakara makuyakunukero. Nakumukumbera eshi mukununge pofotji no dighano dyofotji nopathitambo thofotji. ¹¹ Napwa kudimukitha koyokuhamena kukwenu mwayendhange, Hakakoloye hathimwetwedha kare eshi mbadipo makuyuvero pakatji kenu. ¹² Eyi natamba ne yino: Ghumweya ghanakuninga eshi ''amene waPaulusi", endi "amene waAppolos", endi " amene waKeyifasi", endi " amene waKristusi". ¹³ Oyu Kristusi ne muyipindhi akara ndi? Paghulusi ghakufera pathikurushe ndi? Mudina dyaPaghulusi ghakuyogha ndi? ¹⁴ Nakutumera Nyambi eshi noyofotji temba ghopapenu oyu nayoyire,kutundithako Kristusi na Gayusi. ¹⁵ Podiyo eshi noyofotji temba ghokughamba eshi ghapwire kuyogha mudina dyange. ¹⁶ Nayoghire karo didhiko dyaStefanusi, kutundithako gho , mbadinakudimuka eshi nayoghire hamweya. ¹⁷ Kristusi ne mbadighanitumine kukuyogha ene kukutapa mbudhi dhodhiwa, mbadi munando dhoghunyanyami, podiyo thikurushe thaKristusi thipire kuyongoritha mangcamu ghatho. ¹⁸ Mbudhi dho thikurushe thaKristusi ne mbadiko mudyo kwawa hayongara,ene kwawa hapwa kughamwena ne ngcamu dhaNyambi. ¹⁹ Yapwa kutjanga eshi: "mbonayungurura ghudimuki wawanyanyami, nombonerwitha yitjwathana yawadimuki". ²⁰ Kupi ghadi munyanyami? Kupighadi mukakukuhonga? Kupi ghadi muka nanani ghomukaye? mbadighanapirura Nyambi ghomukaye kukupira mudyo? ²¹ Kaye mughudimuki wako kadikadimukire Nyambi, Nyambi ghaghamwenine awahatawa kupitera muyiyaghura yoghuthuta. ²² HaJuda haromba yitetukitho, Hahirika ne ghunyanyami. ²³ Ene atwene tunakuyuvitha Kristusi yu hapamarire, kwawaJuda ne thinu thothiyi, kwawa hayidena ne mbadiko mudyo. ²⁴ Ene kwawa ghetha Nyambi, muJuda endi Muhirika twakuyuvitha Kristusi yo ngcamu no ghunyanyami waNyambi. ²⁵ Kupira mudyo kwaNyambi ne kunyanyami kupiterera hanu,ndani ghukashu waNyambi ne ngcamu kupiterera hanu. ²⁶ Mukenge methero ghenu mwayendhange, wingi wenu mbadi mwakarire ghunyanyami paghunu wenu, mbadi mwakarire nomangcamu no mbadi mwakarire nohakamakuto. ²⁷ Ene Nyambi ghatorora eyi yashwahuka mukaye yafitha honyi hanyanyami , noghatorora eyi yakasha mukayeyifithe honyi eyi eyi yakara ngcamu. ²⁸ Nyambi ghatorora eyi yakara pamuve noyi hanyatha mukaye. Noghatorora yinu eyi hashwahura, mukureta yinu eyi yapira dina yikare yikare yinu yokupira mudyo. ²⁹ Ghayiruwanena podigho mbadiko thinu ethi shothikumonekithe kughutho wendi. ³⁰ Pamurandu ghoyi gharuwanine Nyambi,podiyo munakara mwaJesusi Kristusi, oyu ghadi ghudimuki wetu mwaNyambi aye ghakarire kwetu muhungami, ghupongoki no mashutwero. ³¹ Dyodi yemana mumatjangwa eshi, "muka kukununeka ne ghakununekere mwaFumu".