¹ Lino lishororo lya Jesus Kristus olyo atapire Karunga kukwendi ashi alitape na kuneyeda vakareli vendi ovyo ngavi shororko munkwangu. Karunga kwavi yuvitire pakutuma mu Engeli wendi kwa mukareli wendi Johanesi. ² Johanes atanta mbudi ya Karunga ntani atapa ghumbangi wa kuhamena Jesus kristus, ntani atanta navintje ovi vamuneyidire. ³ Muna lirago ndjeghu wa kuvarura nkango da Uporofete adiyuvite ntani novo vakudiyuvha vaditambure vadi limburuke kunkango nadintje odo vatjangamo, mbyovoshi shirugho pepi shina kara ngavi shoroke navintje. ⁴ Johanes kuna kutjangera mbunga Kriste ntano-nambili da mushirongo sha Asia ashi: Nkenda na mbili yikare nanwe oyo yina kutundo kwa Karunga ogho ana karoko, naghu akaliroko, ntani nagho nka ngakayo, ntani na mpepo ntano-nambili odi dakaro kumeho ya shipundi shendi sha ghu Hompa, ⁵ yino nkenda na mnbili kuna kutunda kwa Jesus Kristus, mbangi yalipuro lya ushili, ghuye ndje wa kuhoverera kufunda mfa, ntani ghuye ndje mupangeli wa vaHompa vapa ntunda ya livhu. Jesus kwatuhora mbyo aya tufera aya tuyowore na honde yendi ku ndjo detu- ⁶ Ghuye kwaya tutura tukare va Hompa na va Pristeli tukarere Karunga shetu- lifumano na nkondo likare kwa Jesus kristus naruntje dogoro nanaruntje. Amen. ⁷ Kengenu, ghuye ngaya pa maremo; navantje ngava mumona, kumwe navo vamutwiro lighonga mulipumba. Dimuhoko da palivhu nadintje ngadi lkira mukonda yendi. Mongavishoroka ngoli, Amen. ⁸ "Ame Alpha na Omega, litamekero na uhura,'' mo ana kutanta Hompa Karunga, ''Ogho ana karoko weno, nagho akaliroko, ntani nagho ngakayo, wa nkondo nadintje''. ⁹ ''Ame, Johanes-mukareli ghunyenu ogho amu kwatitangoko muruhepo rwa Untungi wa Karunga na lididimiko mwa Jesus Kristus- ogho vakatulire pa shirudi sha lidina lya Patimosi mukonda ya kuyuvita nkango da Karunga kumwe nakutapa ghumbangi wa kuhamena kwa Jesus. ¹⁰ Ame kwa kalire mumpepo muliyuva lya Hompa makura anuyuvhu liywi lyalinene kunyima yande yira marumbendo. ¹¹ Kuna kutanta ashi, ''Tjanga mumbapira ovino ghuna kumona, makura ghutume odo mbapira ku mbunga Kriste ya ku Efeso, ku Simerena, ku Peregamu, ku Tiyatira, ku Seredesa, ku Filedefiya ntani naku Lewodisiya.'' ¹² Ame makura anu piruka nukenge koghu ana kughambo name, tupu napirukire ngoli makura anu mono ma uyweko gharamba gha ngorodo matano-namaviri. ¹³ Pakatji kama uyweko pana yimana wa kufana yira mona muntu, ana dwata lirwakani lyalire lyakutika dogoro kumpadi ntani ghuye ana kumanga ngama ya ngorodo pa nturo yendi. ¹⁴ Mutwe na huki dendi dado yira huki da ndjwi dadikenu-ukenu yira lime-mantjo ghendi kwafana yira makara ghamundiro. ¹⁵ Ano maghuru ghendi kwafanine yira shikugho sha ngoporo, oyo vanahemuna palidiko lya mundiro, mbyo vana yiheke yivembere, ntani liywi lyendi kwafanine yira mema ghakupupira ghunene ghamangi. ¹⁶ Ghuye kuna kwaterere mbungururu ntano-nambiri mulighoko lyendi lya rulyo, ntani mukanwa kendi kuna kutundamo rufuro rwa utwe rwa kuteta kuviri. ¹⁷ Shipara shendi shinafana yira shite sha liyuva shina kutemo ghunene shirugho sha metaha. Tupu na mumonine, makura anu were kumpadi dendi yira muntu wa kufa. Makura ghuye akambeke liwoko lyendi lyarulyo papande atanta ashi, ''Kapishi ghukare naghgoma. Mbyovyoshi ame wa kuhoverera ntani ame wa kuhulilira ¹⁸ ame kwa kara na monyo. kwafire, ano ngoli kenga, ame kwakara namonyo wa naruntje na naruntje! ntani nka ame kwa kara navipatururo vya mfa na kushirongo sha va fe. ¹⁹ Mpo ngolishi tjanga vininke ovyo ghuna mono, novi ghuna kumona weno, ntani novi vikwamoko. ²⁰ Shihoreka shambungururu ntano-nambiri odo ghuna mono muliwoko lyande lyarulyo, ntani namaghuyweko gha ramba matano-namaviri gharamba da ngorodo kuna kutanta ashi: Mbungururu ntano-nambiri vano va Engeli va mbunga Kriste ntano-nambiri, ntani ma uyweko gharamba matano-namaviri ogho ghuna mono mbunga Kriste na mbiri.''