¹ Makura vantu na vakamali vavo ava yerura rughambo rwavo rwa runene kuva unyavo va Jewis. ² Mbyevishi kwakalire vamwe ovo vaghambiro , ''Kumwe na vana vetu va vamati ntani va vakadona tuvangi. Ano tokwenu tuwane mbuto oyo tuvura kulya ntani tuparuka.'' ³ Kwakalirepo nka vamwe va ghambiro, ''Atwe kuna kutapa mavango ghetu mulipuruko lya vimaliva, vitapa vyetu vya kukuna vinyu ntani ndjugho detu ngatu wane mbuto muruvede rwa rukukutu.'' ⁴ Vamwe shimpe ava ghamba, ''Atwe twaromba maliva mukufuta mutero wa Hompa pa mavango ghetu ntani vipata vya kukuna vinyu. ⁵ Shimpe weno nyama yetu na honde ya kufana yira ya vaghuni vetu, ntani vana vetu vakufana yira vana vavo. Kuna kututininika tughulite vana vetu va vamati nava va vakadona vakare vipika. Vamwe vana vetu va vakadona kare vakara vipika. Ene ngoli kapishi munkondo detu mukuvipopera mukondashi vantu vapeke weno vana pingi mavango ghetu ntani vipata vya kumena vinyu.'' ⁶ Nagarapire unene opo nayuvhire rushivano rwavo ntani nedino nkango. ⁷ Makura ani ghayara kuhamena vino, ntani lineghedo lya likuyuvo lya ushiri a liya lipuro kuvayeruki ntani vayenditi. Ani ghamba kwavo, ''Muna kara ushiri muna horo, kehe uno kwa mughunyendi wa naumwendi.'' Ani tura lipongero lya linene kwavo kumwe ⁸ na kughamba kwavo, ''Kwetu ko, tuna kara, kutwara mu unankondo wetu, tughure tuvyute tutunde mu upika va Jewis vaghuni vetu ovo vaghulitire kuvirongo, ene ngoli una ghulita mughunyoye ashi ngava mughulite a vyuke kwetu!'' Vamwenine ano kapi va wanine nkango ya kughamba. ⁹ Ani ghamba nka, '' Ovyo muna kurughana kapishi viwa. Kapi muvura kuyenda mughoma wa Karunga wetu mukupopera matuka gha virongo ovyo vina karo vanankore vetu? ¹⁰ Name na vaghuni vande ntani na varughani vande kuna kuvapa maliva ntani na mbuto. Ene ngoli tuna hepa kushayeka kufutita pa vimaliva vino. ¹¹ Vyutirenu kwavo mayuva ghano mavango ghavo, vipata vya meno vitondo vya vinyu, mavango ghavo gha maghadi gha oliva, ndjugho davo ntani maliva ghavo, mbuto, vinyu yayipe, ntani na maholi ogho mwakaghupire kwavo.'' ¹² Makura ava ghamba, ''Ngatuvyuta ovyo twakashimbire kwavo, ntani kapi ngatutaterera kehe vino kwavo. Ngaturughana momo ngo ghamba.'' Makura ani kughu vamati, ntani nakuvarenka vature lihuguvalito ngava rughane yira momo vavitwenyidilire. ¹³ Ani pweya vyuma vya mundjira yande na kughamba, ''Ndi Karunga anyungange ndjugho yendi ntani na viweka vya kehe uno muntu ogho a diro kutikitamo matwenyidiro ghendi. Mposhi avi nyungange ntani nakuvikenitamo.'' ¹⁴ Mposhi kutunda muruvede oro va neghire nikare ngughuru wavo mushirongo sha Juda, kutundilira mwaka rombiri da ngoro mu mwaka wa rontatu- wauviri wa Artaxerxes va Hompa, mwaka murongo na mbiri, vikareshi me ndi vaghuni vande kwato ogho alyiro ndya odo va wapayikire ngughuru. ¹⁵ Ene ngoli vangughuru vavene ovo vakaliro kumeho me vayalire mudigho wa unene pa vantu, ntani kughupa kwavo maliva rone vya siliveli kundya da kehe yuva na vinyu. Nampili ngoli varughani vavo kwakalire vapopeli kupitakana vantu. Ene ngoli kapi na rughanine ngoli mukonda ya ghoma wa Karunga. ¹⁶ Ani twikiri shimpe nka kurughana kulikuma, ntani kapi twa ulire shirongo, ntani varughani vande kwapongire panya pavirughana. ¹⁷ Pantishe yande opo va Jewis ntani vakamakuto, vakafumu lifere limwe na rontano, kuntere davo vayiro kwetu kutundilira mukatji kavirongo ovo vatukundurukidiro. ¹⁸ Weno ovyo va wapikire kehe yuva kwakalire hove yimwe, vindjwi ntayimwe vya kuhorowora, ntani nka vidira, ntani kehe mayuva murongo marudi naghantje gha vinyu mu unene, shimpe kwavino navintje kapi natininikire mukuli wa ndya da ngughuru, mukondashi virughana vya kalire vidito kwavano vantu. ¹⁹ Nkughe na kupakera shinka, Karunga wande, naruntje- na naruntje, mukonda ya navintje narughana kovano vantu.