¹ Pakutanga kwa kalireko Nkango, Nkango kwa kalire naKarunga, ntani yino Nkango ndjo Karunga. ² Yayo ndjo ya kaliroko pa kutanga kumwe naKarunga. ³ Lishito na lintje kwa liruwana kupitira mu Nkango, ntani kehe shino kwashi shita na Nkango pandere osho vaturapo shikarepo pa hana yayo Nkango. ⁴ Mu mwendi momwa kaliro liparu, ntani liparu kwa kalire shite sha vantu. ⁵ Shite kutwedera mu mundema, ntani mundema kapi wafunda shite. ⁶ Pa kalire mukafumu ogho vatumine atunde kwa Karunga, wa lidina Johanesi. ⁷ Ghuye kwayire aya tape umbangi waku hamena shino shite, mposhi mukonda yaghu mbangi wendi navantje ngava vhure kupura kupitira mumwendi. ⁸ Johanesi kapishi ndje shite, ano ngoli ghuye kwayire tupu aya tape umbangi waku hamena shite. ⁹ Shite shaghu shili, osho shatapango shite ku vantu navantje, kwa yire muno mu udjuni. ¹⁰ Ghuye kwa kara kare mu udjuni, ntani udjuni kwaghu ruwanina kupitira mu mwendi, ntani udjuni kapi wamu yivire ghuye. ¹¹ Ghuye kwayire ku vendi, ano ngoli vendi kapi vamu tambulire. ¹² Ano ngoli vavayingi ovo vamutambuliro, ovo vapuliro mu lidina lyendi, ghuye atapa nkondo kukwavo vakare vana va Karunga. ¹³ Ovano mbovo vapira kushampuraka muhonde, ndi pa nyama, ndi mumuntu, nane ngoli muvipanga vya Karunga. ¹⁴ Nkango ayi kara muntu makura aya tungu mukatji ketu. Atwe twa mona ghuyerere wendi, ghuyerere ghumwe tupu ngogho waku tunda tupu kwa Vashe, wagho kwa yura nkenda na ushili. ¹⁵ Johanesi kwa tapire umbangi waku hamena ku kwendi, ghuye ayiyiri, naku ghamba ashi, ''Oghuno ndje namu tantera ashi, 'Ogho ngakwamo muruku rwande ghuye munene kwa pitakana papande, mukondashi ghuye ndje akaliro kumeho yande.''' ¹⁶ Muviruwana vyendi vyaku tikiliramo atwe mo twa wanena ghufe nkenda waku pira kupwa. ¹⁷ Mukonda shi veta kwayi tapire kupira mwa Moses. Ghufe nkenda ntani ushili kwaya ghupitire mwa Jesus Kristus. ¹⁸ Kwato ghumwe ogho amono Karunga; Nkwandi Monendi ahuru, ogho ashungiro mulivha lya Vashe, ghuye ndje atapo marongo mposhi vayive Karunga. ¹⁹ Ghuno ngo umbangi wa Johanesi kuva vaJuda opo vatumine vapristeli na Valevite vatunde ku Jerusalema vayende vaka mupure ashi, ''Ove re nane?'' ²⁰ Ghuye aku tongonona - kapi akanine, ghuye aku tongonona ashi - ''Ame kapishi Kristus.'' ²¹ Vavo ava mupura ashi, ''Ove re lidina lyoye? Ove Eliya ndi?'' Ghuye alimburura ashi, ''Hawe kapishi me.'' Vavo ava ghamba ashi,''Ove ghumwe wa vaporofete vakare ndi?'' Ghuye alimburura ashi, ''Hawe.'' ²² Makura vavo ava mupura ashi, ''Tutantere lidina lyoye, mposhi natwe tuka tape lilimbururo kwavo vana tutumo? Ove naghu moye kukutwenya weni?'' ²³ Ghuye alimburura ashi, ''Ame wa liywi, lino lina kuliro mumburundu ashi: 'Wapekenu ndjira yaHompa yikare yina vyukiliri,' yira momu tupu aghambire muporofete Yesaya.'' ²⁴ Vano vamwe vatumine kwa tundire kuva Farisayi, ²⁵ vavo ava mupura na kughamba ashi, ''Mukonda munke wa kushiranga na mema vantu nkeneshi ove kapishi Kristus ndi Eliya ndi ghumwe wa vaporofete?'' ²⁶ Johanesi alimburura, naku ghamba ashi, ''Ame kwa kushanga tupu na mema. Ano ngoli mpali ghumwe ana yimano mukatji kenu ogho mwapira kuyiva. ²⁷ Ghuye nga kwama munyima yande, na mpili ame kapi na hungama kushutura ruwodi rwa vicapa vyendi.'' ²⁸ Vino navintje kwa shorokilire muBetaniye musheli munya yamukuro wa Jorodani, omo kakushiranga Johanesi. ²⁹ Liyuva lyaku kwamako Johanesi amono Jesus kuna kuya kukwendi makura aghamba ashi, ''Kengenu, Ndjwighona yaKarunga oyo yaghupa ngopo ndjo damu udjuni! ³⁰ Oghuno ndje namu tantilire ashi, 'Ogho ngayo muruku rwande wamu munene waku pitakana papande, ghuye ndje akaliroko kumeho yande. ³¹ Ame kapi namu yiva, ano ngoli ame kwaya tupu nganu kushe vantu na mema mposhi ghuye nga shoroke ngava muyive va Israeli.'' ³² Johanesi atapa ghumbangi, aghamba ashi, ''Ame kwa monine Mpepo kuna kusheghumuka yitunde kuwiru yira nkuti, makura ayi tembere papendi. ³³ Name shi kapi namu yivire, ano ngoli ghuye ogho antumo nuye nganu kushe vantu na mema kwa ntantera ashi, 'Nkene ngaghu mona Mpepo kuna kusheghumuka yitunde kuwiru makura ngayi kare papendi, ghuye ndje ngakusho vantu muMpepo ya Kupongoka.' ³⁴ Ame kwavi mona mbyo na tapa umbangi ashi ghuno Mona Karunga.'' ³⁵ Waro nka, liyuva lyaku kwamako, Johanesi kwa yimanine kumwe na varongwa vendi vaviri, ³⁶ makura ava mono Jesus kuna kupita, makura Johanesi aghamba ashi, ''Kengenu, Ndjwighona yaKarunga!'' ³⁷ Vano varongwa vendi vaviri ava yuvhu dino nkango makura ava kwama Jesus. ³⁸ Jesus opo apirukire kuruku ava mono vavo kuna kumu kwama muruku, ghuye ava pura ashi, ''Vinke muna kushana?'' Vavo ava limburura ashi, ''Rabbi'' (kutanta ashi ''Murongi''), ''kuni nko oko wa kara?'' ³⁹ Ghuye ava tantere ashi, ''Tuyendenu muka kengeko.'' Makura vavo ava yendi kumwe vaka kenge oko akara; vavo ava kakara naye ghure wa liyuva limwe tupu, ava kara naye dogoro kushinguko pa viri ya ghune. ⁴⁰ Ghumwe wavano vaviri ogho ayuviro Johanesi kuna kughamba makura akwama Jesus kwa kalire Andrias, mughunya Simoni Peturusi. ⁴¹ Ghuye ayendi aka wane mukurwendi Simoni amutantere ashi, ''Atwe tuna kawana Messiah''( kutanta ashi: Kristus). ⁴² Ghuye amu yita kwa Jesus, makura Jesus opo amu monine aghamba ashi, ''Ove Simoni mona Jona. Ove ngava kuyita Kefasi''(kutanta ashi Peturusi, Liwe). ⁴³ Liyuva lyaku kwamako, Jesus kwa shanine kushapuka ayende ku Galileya, makura awana Filip amu tantere ashi, ''Yakuno kwame.'' ⁴⁴ Filip kwa tundire ku Betesaida, ku shitata oko atunda Andrias na Petutusi. ⁴⁵ Makura Filip aka wana Nathaniel amutantere ashi, ''Atwe tuna kawana ogho vatjanga mu veta ya Moses, namu nkango dava porofete ghuye ndje: Jesus mona Jesef, waku Nazareti.'' ⁴⁶ Nathaniel aghamba ashi, ''Ngoli shili Munasareti kuvhura kutundamo vininke vya viwa ndi?'' Philip amu tantere ashi, ''Tuyende ghuka mone.'' ⁴⁷ Jesus opo akengire Nathaniel kuna kuya kukwendi ghuye aghamba ashi, ''Kengenu, mu Israeli mwene-mwene wa ushili, waku pira vimpempai!'' ⁴⁸ Nathaniel amu pura ashi, ''Weni-weni omo ghuna ndjiva ame?'' Jesus amu limburura naku mutantera ashi, ''Kumeho ayende Filip aka kuyite kukwande, Ame kuna kumono, ove ghuna shungiri munda ya shitondo sha ukuyu.'' ⁴⁹ Nathaniel amu limburura ashi, ''Murongi, ove Mona Karunga! Ove Hompa wava Israel!'' ⁵⁰ Jesus amu limburura naku mutantera ashi, ''Ove kuna pura mukonda shi, mbyovi naku kutantere ashi, 'Ame kuna ku mono ove ghuna shungiri munda yashitondo sha ukuyu,' mbyo ghuna kuvi pura ndi? Ovi ngaghu mona kumeho vinene unene kupita kana pavino.'' ⁵¹ Ghuye aghamba ashi, ''Ushili, vya ushili, naku kutantera ashi, ove ngaghu mona liwiru lina gharuka, vaEngeli vaKarunga kuna kuronda naku ghurumuka vaye pa Mona Muntu.''