¹ Paurusa, Mupositoli waKristusa Jesusa kupitira mu mpangera yaKarunga, ntani Timoteusa mughunyetu, ² Kuvantu vakupongoka vaKarunga navantu valipuro mwaKristusa ava vakaro kukorosi. Nkenda nambili yikare penu yakutunda kwa shetu Karunga. ³ Kuna kutapa mpandu kwaKarunga, vashe vaHompa wetu Jesusa Kristusa, ntani atwe kehe pano kwamurapereranga ko. ⁴ Twa yuvha lipuro lyenu mwaKristusa Jesusa ntani shihoro osho muna kara namuvantje vantu vakupongoka vaKarunga. ⁵ Muna kara nashihoro shino mukonda yalihuguvaro vamuwapayikira muliwiru. Mwa yuvha kuhamena lino lihuguvaro kumeho yankango daghushiri, mbudi yayiwa, ⁶ Eyi ya yiro kukwenu. Yino mbudi yayiwa kuna kuyima viyimwa nakukulira mughushiri nauntje. Moomu tupu yarughanine yino mwenu nka kutunda liyuva mwa yi yuvhire nakukuronga kuhamena ghufenkenda waKarunga waghushiri. ⁷ Yino ndjo mbudi yayiwa momu mwakushonga kwaEpafurasa, mukareli ghunyetu wakuhora, are mukareli puli waKristusa kumbinga yetu. Vimwe vyamulyo ntani vi vhukita vyavagereka kuviharura, kumbinga yoye. ⁸ Epafarasa ndje a rughanino vi viyuvike kukwetu shihoro shoye mumpepo. ⁹ Mukonda yashino shihoro, kutunda liyuva twa yuvhire vino kapi twa shayeka mukumuraperera anwe. ¹⁰ Atwe kwa kwarombanga ashi ngamuyude naghuyivi wendi mughu konentu naghuntje ntani kukwata lighano pampepo. Mposhi ngamu yende mumaghano omo awapera Hompa ntani nka nakumufita mukehe ndjira. Atwe kwarapereranga ashi ngamuyime viyimwa mukehe virughana vyaviwa nakukura mughuyivi waKarunga. ¹¹ Atwe kuraperera ashi amupe nkondo dendi nadintje, kukwama kughuyerere waghunankondo wendi, mpo ashi mu vhure kudidimika nalighupiropo, ntani naruhafo. ¹² Kunakuraperera ashi nganutwikira kutapa mpandu kuvavava, oghu a murenko mu vhure kuwanako kughupingwa wa vantu vaKarunga vakuponga mughukenu. ¹³ Uye atu vatera twe kughupangeli wamundema nakuturundwilira twe mughuntungi wamondi wakuhora, ¹⁴ Mumwendi mo twayoghekera kupitira muhonde yendi, lighupiropo lyandjo. ¹⁵ Ghuye lifano lyaKarunga wakudira kumona, mbeli yavishitwa navintje. ¹⁶ Mu mwendi vininke navintje mo vavishitira, vyakaro mumawiru ntani vyakaro palivhu, vya kumona ntani vininke vyakudira kumona. Vikare vipuna vyaghuhompa ndi vanamadina ndi mapangeli ndi ghunankondo, vininke navintje kwa vishita kupitira mwendi ntani mumwendi. ¹⁷ Ghuye mweneko kumeho yavininke navintje, ntani mu mwendi vininke navintje kwavi kwatakanita kumwe. ¹⁸ GHuye mutwe warutu, nkirishe. Ghuye ndje litameko, mbeli kutunda mukatji kavafe, mpo akara palivango lyakuhova mukatji kavininke navintje. ¹⁹ Karunga vya muhafitire ashi navintje vyendi vitikiliremo mu mwendi. ²⁰ Kwavyutire kupitira mwamona vininke navintje kwa naghumwendi. Karunga arughana mpora kupitira muhonde kushikurushe shendi. Karunga akavyutiri vininke navintje kwa naghumwendi, vikare vininke vyapalivhu ndi vininke vyamuliwiru. ²¹ Pashirugho shimwe anwe kwakalire ghure naKarunga ntani nkore dendi mumaghayaro ntani virughana vyavidona. ²² Ano ngoli weno ana muvyuta narutu rwendi rwapanyama kupitira mumfa. Ghuye kwa virughanine vino mukondashi mumoneke munapongoka, muna kushuka ntani muna hungama kumeho yendi, ²³ Ntjene mutwikira mulipuro, litateko nakuyimana ndjikiti, kapishi muyenhde mutunde kulighuguvaro lya mbudi yayiwa eyi mwa yuvha. Yino ndjo mbudi yayiwa eyi vayuvitire kwa kehe muntu vahunga munda yaliwiru. Yino ndjo mbudi yayiwa ame ko, Paurusa, nakalire mukareli. ²⁴ Weno ame nahafa mukumuhepera anwe, ame nayuda rutu rwande kovyo vyadiro kutikamo parunyando rwaKristusa morwa rutu rwendi, yayo ndjo nkirishe. ²⁵ Mukondashi nkirishe ame ni mukareli, kuhamena kulitoghororo kutunda kwaKarunga ogho avitapo kukwande morwa rwenu, mukutikitamo nkango daKarunga. ²⁶ Lino lihoramo ashi kwa lihorekire kumwaka nakumakuvharatano ano ngoli weno mbyo ana vi mu horwere kuvantu vaKarunga vakupongoka. ²⁷ Kukwavo ashi Karunga kwa shanine kuyivita ghungawo waghuyerere walihoramo lino mukatji kavahedana,. ghuye ndje Kristusa mumwenu, lihuguvaro lyaghuyerere. ²⁸ Ndje twa yuvitanga, kurondora nakushonga kehe ghuno naghukonentu naghuntje, mpo ashi tuvhure kuhorora kehe ghuno muntu ana tikiliromo mwaKristusa. ²⁹ Ghuno ngo udito nakondjeranga kutwara munkondo dendi ashi virughane mumwande munkondo.