¹ Mbilive yino kuna kutunda kwa Paulus, mu apostoli wa Jesus Kristus mu vipanga vya Karunga, na unyendi Timoteus, yiyende ku mbunga kriste ya Karunga oyi ya karo mu Korinte, na kuva pongoki navantje ovo va karo mushirongo sha vaGereka. ² Karunga Shetu na Hompa Jesus Kristus amu fere nkenda na kumupa mbili. ³ Atwe kupandura kwa Karunga Vashe va Hompa wetu Jesus Kristus. Ghuye Shetu kwa yura nkenda ntani ghuye Karunga kutu kwafa kehe pano. ⁴ Ghuye ndje wa kutu kwafa muma udito ghetu na ghantje, mposhi natwe tu kwafe ovo vana karo muma udito ghakuku shuva-shuva. Atwe kuva kwafa na mbatero oyo atapa Karunga ku kwetu tu kwafe va unyetu. ⁵ Yira momu tuna kunyanda natwe kumwe na Kristus murunyando rwendi rwarunene, na lishengawido lyetu lya mwa Kristus nalyo linene. ⁶ Ano ngoli atwe nkene shi tuna kara muma udito, kutanta ashi mukonda ya likwafo na liparu lyetu; Vino mposhi likwafo lyenu litikiliremo mukare na lididimiko nanwe yira lino tuna kara nalyo ku kwetu. ⁷ Atwe twa muhuguvara unene, mukondashi twa yiva ashi muna kara na ma udito ghaku fana yira ghetu, nanwe nka ngava mushengawida yira momu vana kutushengawida atwe. ⁸ Vakwetu, atwe kuna shana muyive, ma udito ogho twa gwanikilire nagho mushirongo sha Asia. Ghudito ghuno twa kalire nagho wa unene ntani wa turemikire unene kapi twa yivire ashi kuvhura tupareke. ⁹ Atwe, kwa vimonine ashi vino kuna tutokwerere ku mfa. Vino kwa shorokire mpo ashi tupire ku kuhuguvara mu nkondo detu, nane tuhuguvare Karunga, wa kuvhura kuvhumbura nampili vafe. ¹⁰ Ghuye ndje atuyogholiro tutunde muvihuna vyavinene vya mfa, ntani nka uye shimpe kuna ku tuyoghorora mo mu mfa. Atwe nka mbyo shimpe tuna ku muhuguvara ashi ngaka tuyoghorora mo na mpili kumeho oko. ¹¹ Tu kwafenu mututure mu ndapero denu. Mpo shi vantu vavangi ngava tapa mpandu mukonda ya matungiko ogho ngava wana gha kutunda ku ndapero davo. ¹² Atwe kukufumadekera vino ashi: Liywi lya mu dimutjima detu kutapa umbangi ashi atwe muno mu udjuni atwe kwakara mo na upongoki na ukushuki wa Karunga, kapishi mu ukonentu wa vantu, nane mu ufe nkenda wa Karunga. ¹³ Atwe kumu tjangera mbyovyo tupu muvhura kuvarura makura muvikwate lighano ¹⁴ yira momu tupu mwa yiva vino vya kuruha rumwe tupu, mposhi nanwe nga mukafumanene mumwetu ku liyuva olyo ngakaya Hompa wetu Jesus, natwe nka ngatu kafumanena mumwenu. ¹⁵ Ame kuna kara na lihuguvaro lino ashi, pamuhovo kuna shana kuya kukwenu, mposhi nga muyawane nkenda ya uviri. Ame kuna shana kuya mudingura mundjira yande ntani nganu yatwikira kuyenda ku Makedoniya. ¹⁶ Ntani opo nganu kavyuka nutunde ku Makedoniya nganuya mupita nka ngamuya ngwapayikire nkuta ya mundjira yande ya kuyenda ku Judeya. ¹⁷ Opo na fanikire runo ruyendo rwande, kapi na fanikire nawa? Ame kwa tulirepo ruyendo rwande mu kutwara pa maghano gha pa shi na untu, anu tokora kumwe na kughamba ashi "Yii, yii" ntani "Hawe, hawe" pashirugho shimwe tupu? ¹⁸ Ano ngoli Karunga muwa, atwe na kuvhura shi tu ghambe ashi "Yii ntani Hawe" pashirugho shimwe tupu. ¹⁹ Mbyovyo shi Mona Karunga, Jesus Kristus ogho twa yuvitanga ku kwenu na me, na Silvanus, ntani na Timotheus, kapi atantanga ashi "Yii" atambe ashi "Hawe." Ano ngoli ghuye ku ghamba tupu ashi "Yii" kehe pano. ²⁰ Ghuye kehe pano kughamba tupu ashi "Yii" kuma tutwenyidiro naghantje gha Karunga, Jesus ndje agha tikitiliromo matwenyidiro naghantje. Mumwendi mo twa taperanga mpandu kwa Karunga, tutante ashi "Amen." ²¹ Karunga mwene ndje atu koreko atwe kumwe nanwe mulikukwatakano kumwe na Kristus mbyo atupongora kumwe na kututura mushiruwana shendi, ²² makura mbyo atura viyivito vyendi papetu ntani mbyo atupa Mpepo ya Kupongoka mudi mutjima detu, yi koreke ashi matumbwidiro ghendi ngaghatikiliramo. ²³ Nane ngoli, Karunga mwene ndje mbangi yande mukondashi ghuye ayiva ovyo vya karo mumutjima wande ashi ovyo na pilire kuya ku Korinte kapi na shanine ashi nuya mupe rundando mukonda yande. ²⁴ Atwe kapi tuna shana kumu pangera mukondashi anwe kwa kora mulipuro. Nane ngoli, atwe kuruwana kumwe nanwe mpo ashi anwe mukare na ruhafo, mukonda ya lipuro lyenu lya kutikiliramo.