¹ Ntjanga tumwa yino kuna kutunda kwa Petrus, mu Apostoli wa Jesus Kristus, yiyende ku vantu, ovo atoghorora Karunga ovo va ku haneno kuvirongo navintje vya ku kushuva-shuva vya mu Pontusi, mu Garate, mu Kapodokiya, mu Asiya, na mu Bitiniya. ² Anwe kwa mu toghorora yira momu avi shanena mwene Karunga Shetu, amu poghomwene Mpepo ya Kupongoka mukare vapongoki nga mu mulimburuke kwa Jesus Kristus ngava mumwayere na honde yendi nga mu kusshuke. Nkenda ya Hompa yikare nanwe, mbili yendi yi vhuke mukatji kenu. ³ Tushambererenu Karunga vashe va Hompa wetu Jesus Kristus! Mukonda ya ghufe nkenda yendi yayinene, mbyo atupa monyo wa ghupe pa ku vhumbura Jesus Kristus ku ghufe. ⁴ Mukonda yino mbyo twa karera na lihuguvaro ashi ngatu kawana upingwa wa kupira kudjonauka, wa kupira kunyata, ntani wa kupira kushaya. Wagho kwa ghutu pungulira mu liwiru. ⁵ Mukonda shi anwe mwa pura mwa Karunga ghuye mbyo amupopera na nkondo dendi dogoro mpopo nga mu kawana mwonyo wa naruntje ogho vamu wapayikira ogho ngava kashorora mushirugho sha kuhulilira. ⁶ Anwe karenu na ruhafo kwavino, na mpili mo mu munakara na liguvo lyalinene mukonda ya mahepeko gha ku kushuva-shuva ghamangi agho muna ku gwanekera nagho. ⁷ Na shitambo ashi mukare na lipuro lya kutikilira mo lya ushili, na mpili ngorodo ya kupira kukarerera po, nayo kwayi shetekanga mumundiro. Na lipuro lyenu olyo lya pitakano ngorodo ya kupira kukarerera po na lyo kulisheteka mposhi likare lina pama-likore makura ngava pandure, na kufumadeka kumwe na kuyerere peka opo nga shoroka Jesus Kristus. ⁸ Anwe Kapi mwa mumona Jesus, ano ngoli mbyo mwa muhora unene. Anwe kwa pura mumwendi na mpili momu muna kupira kumu mona ntantani weno ntani anwe mbyo muna kara na ruhafo rwarunene rwa kupira kuvhura kutanta mbyo muna kara na lihuguvaro. ⁹ Anwe mwa wana liyoghoro mbyo mwakara na lipuro, monyo denu ngadi kawana liparu lya naruntje. ¹⁰ Kuhamena vya liparu lino, vaporofete va pumbire vya kuhamena ushwi wa nkenda oghu nga tapa Karunga kukwenu, vavo kwa ushanine na ku ukona-kona unene, ¹¹ Mpepo ya Kristus ndjoyakaliro mumwavo ayi vatantere vya kuhamena runyando rwa Kristus makura vavo ava kondjo mu ku shana na kukona-kona ashi shirugho munke ngavi shoroka ntani no mo ngavi kakara vya kuhamena runyando rwa Kristus ntani novyo ngavi ka kwamoko omo ngaka wana Kristus uyerere na lifumano lyendi lyalinene. ¹² Vavo kwavi va shorolire vaneyede ashi Karunga varuwanenanga kapishi vyava vane, vavo kava yuvitanga na nkondo da kutunda ku Mpepo ya Kupongoka oyo ya vatumine yitunde mu liwiru-shimpe ndjoyina kuyuvito Mbudi ya Ruhafo weno ntantani ovo va yuvitango na nkondo ya Mpepo ya Kupongoka oyo ya tundo muliwiru nampili va Engeli navo kwa shanine vavi kwate lighano. ¹³ Anwe wapukururenu maghayaro ghenu. Karenu muna kotoka. Huguvarenu unene mu nkenda oyo ngamu wana opo ngashoroka Jesus. ¹⁴ Anwe vaKriste limburukenu ngoli kwa Karunga, kapishi mukwama-kwame shimpe madowo gha ukaro wenu wa kare opo mwa pilire kuyiva vintu. ¹⁵ Nanwe, karenu ngoli, vapongoki mu ma ukaro ghenu na ghantje, yira momu akara ghuye Karunga mupongoki, ogho amutoghororo. ¹⁶ Matjangwa kwa tanta ashi, "Anwe karenu muvapongoki, mukondashi ame mupongoki." ¹⁷ Anwe ku twenya Karunga ashi "Vava" opo mwa rapereranga ghuye kushetakanita kupangura kwa kehe uno kutwara mu viruwana vyendi, karenu na utjirwe wa kufumadeka Karunga shirugho shino muna kara muno mu udjuni. ¹⁸ Yivenu ashi anwe kwa muyoghora mu ukaro wa kupira mutompo ogho mwapinga ku vanyakulya venu mukondashi anwe kapi va muyoghora siliveli kumwe na ngorodo ya dogonokapo. ¹⁹ Nane ngoli, kwa muyoghora na honde ya Kristus ya ndiro, ya ndjwighona ya kupira undjoni na shipo. ²⁰ Ghuye Karunga kwa toghorora Kristus wagho udjuni shimpe pato kapi va ushita, ano ngoli mukonda yenu mbyo aya moneka ashoroke shirugho shino kuma yuva gha kuhulilira. ²¹ Mwa Kristus mo mwapitira mupure mwa Karunga, ogho amu vhumburo ku ufe makura mbyo amupa uyerere, mposhi mukare na lipuro kumwe na lihuguvaro mwa Karunga. ²² Anwe kwa limburuka ku ushili mbyo muna kara na monyo da ukushuki. Karenu na shihoro sha ushili na va unyenu; karenu na shihoro kwa navantje mu dimutjima denu kupitira mu mpepo. ²³ Ruwanenu vino mukondashi anwe kuna mushampuruka rwa uviri, na nkango ya Karunga ya monyo ya kukarererapo, kumbuto ya kupira kudjonaukapo, kapishi mbuto ya kudjonaukapo. ²⁴ Matjangwa kwa tanta ashi, "Vantu navantje kwa fana yira mushoni, nampili lifumano lyavo kwafana yira mucuko wa kumushoni. Nkeneshi mushoni aghu kukuta na mucuko wako kukukumuka ghuwe utundeko, ²⁵ ano ngoli nkango da Hompa kwa karapo naruntje na naruntje." Nkango da Hompa ne ndjoyino Mbudi ya Ruhafo oyi vana kumu yuvitira weno.