¹ Paul, ogho akuwire Jesus Kristus akare mu apostoli muvipanga vyaKarunga, waro nka naunyetu Sostenesi, ² Kungereka yaKarunga mu Korinte, kovo vatoghorora mwa Jesus Kristus vakare vantu vakupongoka, kumwe nanavantje vakaro mu kehe livango vo vamutangango Hompa wetu Jesus Kristus, ghuye Hompa wavo nka ndje wetu. ³ Nkenda na mbili ya kutunda kwa Karunga Shetu naHompa wetu Jesus Kristus yikare nanwe. ⁴ Ame kehe pano kutapa mpandu kwaKarunga wande yakukwenu mukonda ya nkenda yaKarunga oyo amupa kupitira mwa Jesus Kristus. ⁵ Amungawopeka mundjira nadintje, muvighamba navintje ntani naghukonentu nauntje, ⁶ Yira momo watikiliramo ghumbangi waushiri wakuhamena kwaKristusi mukatji kenu. ⁷ Mposhi anwe kapi muna pumbwa maghushwi gha mpepo shirugho shino muna kara mulitaterero lyalihororo lyaHompa Jesusi Kristusi. ⁸ Ghuye ngayamupameka nka dogoro kughuhura, mposhi ngavadire kumurundira kukehe shininke muliyuva lyaHompa wetu Jesus Kristus. ⁹ Karunga ndje lihuguvaro, ogho amukuwiro mukare mulikukwatakano kumwe na Monendi, Jesus Kristus Hompa wetu. ¹⁰ Weno ame kuna kumukorangeda, vaghunyande, mulidina lyaHompa wetu Jesus Kristus, ashi mukare na likuyuvho, nalipiro makutavaghano mukatji kenu. Ame kuna kumukorangeda shi mukukwatakane kumwe mumaghano ghamwe tupu nka nashitambo shimwe. ¹¹ Kaniwana mapukururo ghakuhamena kwenu,vaghunyande, valipata lyaKorowe ashi muna kara dimutangu mukatji kenu. ¹² Ame kuna tamba vino: Kehe umwe wenu aghambe ashi, '' Ame wa Paul,'' ndi '' Ame wa Apollos,'' ndi '' Ame wa Cephas,''ndi "ame wa Kristus." ¹³ Kristus kwamuku gawininanga ndi? Paul kwamupamparelire nwe ndi? Ndi anwe kwa wana liyoyero mulidina lya Paul? ¹⁴ Ame kupandura Karunga ashi kapi nakushapo ghumwe mukatji kenu, nkwandi Krispus na Gayius tupu. ¹⁵ Vino kwakalire ngoli mposhi vimulimbe kughamba ashi anwe kwamukushira mulidina lyande. ¹⁶ (Ame waro na kushanka vamulipata lya Stephanas. Kutundapo, kapi nakuvhuruka vamwe ovo nakusha nka.) ¹⁷ Morwa Kristusi kapi antuma niyakushe nani mukuyuvita mbudi yayiwa-kapishi nankango daghukonentu, mposhi shikurushe sha Kristus kapishi ngashikombanite nkondo dasho. ¹⁸ Morwa mbudi yakuhamena kumfa dakushikurushe ugova kovo vanakuhepo. Ano ngoli kukwetu atwe vayowora, yayo ghunankondo waKarunga. ¹⁹ Morwa kwatjanga ashi, '' Ame nganidjonaghura unandunge wavakonentu. Ame nganihanaghura po unandunge wavanandunge''. ²⁰ Kuni vana kara vakonentu? Kuni vana kara varongi matjangwa? Kuni nko vaghambi vavanene va muudjuni? Nani Karunga kapi apirura ukonentu wamuudjuni ghukare ghugova? ²¹ Mukurenka ngoli shi udjuni muukonentu wagho kapi wayivire Karunga, Karunga vya muhafita mukuyowora vantu ovo vapuro mbudi ya ugova oyo twa yuvhitanga. ²² VaJuda kwa shana vamone vitetu ano vaGereka kwa shana ukonentu. ²³ Ano ngoli atwe kuyuvita Kristus ogho vapamparera kushikurushe, mbudi ya kulimbika kuvaJuda ntani yaugova kuvaGereka. ²⁴ Ano ngoli kovo ahoroghora Karunga, akare muJuda ndi muGereka, atwe kuyuvita Kristus ashi ghuye unankondo naukonentu waKarunga. ²⁵ Mukondashi ugova waKarunga wakara naukonentu wakupitakana vantu, ano upira nkondo waKarunga kwakara nankondo dakupitakana davantu. ²⁶ Vaunyande,kupurenu ashi vantu munke mwakaliro kumeho amuyite Karunga mukare vakriste. Muvasheshu mwakaliro naukonentu kutwara panyama. Muvasheshu mwakaliro nankondo. Muvasheshu mwakaliro namfumwa opo vamushampurukire. ²⁷ Ano ngoli Karunga kwahoroghora vininke vyaugova vyamuudjuni afite ntjoni vyaukotoki. Karunga kwahoroghora vyakupira nkondo muudjuni afite ntjoni vyankondo. ²⁸ Karunga kwahoroghora vininke vyamulyo wausheshu nka vyo vanyenga muudjuni. Ghuye kwahoroghora vininke vyakudira mulyo, mukuhanaurapo ovyo vyakaroshi vyavyo ndi mbyo vyamulyo. ²⁹ Ghuye kwaruwana vino mposhi padire kukara umwe owo anakukunenepeko kumeho yashipara shendi. ³⁰ Mukonda yaviruwana vyaKarunga, weno muna kukwatakana naJesus Kristus, ogho akaliro ukonentu wetu wakutunda kwa Karunga ghuye akare muhungami wetu. Akara muhungami,mupongoki ntani muyogholi wetu. ³¹ Matjangwa kuna kutanta ashi, "Ogho ana kukunenepeko, akunenepekere vya mwaHompa."