¹ Nemo nkhuvwanga ukuti uwampyani, nanthi umonsi, asikupusana nuwa ntchito, kwene akuya umwenecho wa chalo chonsi. ² Kweni ali pansi payalonda nayano yasuwalilwa mphaka pano uwanda wakwana wuno wayikwa natata wakwe. ³ Nupya pano, twali sweyantche, twali muwuzga ku mafunde yansi. ⁴ Kweni lino insita yiza, Leza watumile umwanakwe, wino wapafilwe kumwanachi, wapafilwe pifunde. ⁵ Wawonvile chi ukupususya yalya yano yali pansi pifunde , ukuti tungapochelela ukusendwa ngati swe yanakwe. ⁶ Ngalino mwe yana, Leza watuma mumyenzyo yitu umupasi wamwana akwe, wino akamwama ,''Abba, Tata.'' ⁷ Nomba siwe muzga nupya , kweni umwana , nga nanthi umwana , awewe nupya we wa mpyanyi muli Leza. ⁸ Kwene pansita yilya , pano mutamanyile Leza ,mwapanzilwe ukuya mweyazga kuli yalya yano, mumaka yawo, pataya utumilungu natumwi. ⁹ Kwene pano mwamumanya Leza , nupya pano mwamanyikwa na Leza , wuliwuli pano mukuwelela nupya kumafunde yano sayakulondwa? Mukulonda muye nupya mwe yazga? ¹⁰ Lolechesyini amanda nimyezi iwipya ninsita nimyaka ! ¹¹ Nkhutina ukuti munzila yimwi intchito yane namwemwe yingaya yimbula kanthu. ¹² Nkhuwalenga , yakundwe, muye ngati anene, muno nani naya ngati amwemwe . Mutangononile nachimwi. ¹³ Kweni mumanyile ukuti umulandu wandwala yamwili yino mwayiweni yino navwanjilepo izwi lyakwe Leza panthandiko. ¹⁴ Nanthi wuli umwili wane wawayisile mukuwezga , mutansuzile pamwi ukukhana. Kweni mwamphochelile ningo ngati nalinji ne mungeli wakwe Leza, ngati apano nalinji ne Khilisitu Yesu weliwe. ¹⁵ Nga ivipepwe vinu vili kwi nimba? Amuno nkhusimichizga ukuti, nanthi chali ichakuwombwa, ngemwafumizge aminso yinu nukumphela nene. ¹⁶ Ngalino naya ne mulwane umulandu nkhuwanena ichisinkha? ¹⁷ Yakupitisya ukuti muye muli woliwo, apambula chimwi. Yakulonda yawayalile ukuti mupitisye kuli woliwo. ¹⁸ Ichisuma sana ukupitisya pali chimwi ichisuma , napano insi namwemwe pali ponga . ¹⁹ Yanane ayanono, ndimukuwaya ukwakupapa mpaka Khilisitu aye muli mwemwe. ²⁰ Nenkhulonda ukuti ningaya namwe nomba nukupiliwula imivyanjile, umulandu nkhuzunguka namwemwe. ²¹ Mbuzgini , mweyanthu mukulonda ukutu muye pansi pifunde? ²² Muno chawalikwa ukuti Abulahamu walinji nayana yayili, wenga mumwanachi wantchito nga nawenga mumwanachi wakwe. ²³ Wenga wapafilwe kumwanachi wantchito ukulingana numwili , kweni wenga wapafilwe nu mwanachiwakwe mululayizgo. ²⁴ Ivinthu vii tungavilula ngati ivyakwezezgapo, pano ayanachi ya yakwimilila imilayi yili. wenga ukufuma ku mwamba wakwe Sinai nga akupapa ayana yano ayazga . Wii ali Haga. ²⁵ Nomba Haga akwimilila umwamba wakwe Sinai ku Alebiya ; nga akwimilila Jelusalemu wa nomba , muno yali muwuzga nayanakwe. ^{26 27} Kweni Jelusalemu wino ali kupela umusapuke, nupya amama wiyu. Amuno chawalikwa ,'' Sechelanji , mweyachumba mweyanthu musipapa; lilini nukupunda insansa, mwemwe mweyanthu mutakuchula nukuwaya kwa kupapa; umulandu ayana yakwe mama wino yamusya ayinji ukulusya yano yapapwa kumwanachi wino ali numonsi .'' ²⁸ Kweni mwemwe, yakundwe , ngati a Ayizeki, ayana yalulayizgo. ²⁹ Munsita yilya wino wapafilwe ukuyana nakumwili wamuselewulanga wino wapafwile ukuyana numupasi. Avino chili. ³⁰ Kweni izwi lyakwe Leza likuti wuli ?'' mutusyini umwanachi wantchito numwana akwe. Muno umwana wamwanachi wa ntchito atalisenda mupyana numwana wamwanachi umusapuke.'' ³¹ Ngalino , yakundwe, sisweyana yamwanachi wa ntchito , kwene ayamwanachi umusapuke.