¹ Kwene nelenginye nemwenecho ukuti ntize nize nupya kuli mwemwe ni miyele iya vya kuwaya. ² Ndi nakupanjisizye wewe ivyakuwaya, aweni wino angasechelesya kwene wenga wino wachisike na nene. ³ Nawalike ukuyana namuno nachitile ukuti pano nizile kuli mwemwe kuno pano intachisika nayalya yano yangayansechelesye. Indi nichikanga kuli mwemwe mwensi ukuti insansa zyane ziyine ni nsansa zino mwensi muli nazyo. ⁴ Amuno nawawalichile mwemwe ukufuma nivyakuwaya ivikulu, nivya kuwaya vya mwenzo, na mansozi avule. Ntalondanga ukuwalenjesya mwemwe ivyakuwaya. Kwene, nalondanga mwemwe mumanye ukuzika kwa lukundo luno nkhweti lwakwe mwemwe. ⁵ Ndi wumwi walenjesya ivya kuwaya atalenjesizye kuli nene nenga foo, kwene umuvipimo vimwi-kuno nthawanyomeka mwemwe -- kuli mwemwe mwensi. ⁶ Ukupanikwa kuu ukwa muntu wilya ni wumba ilya kukwana. ⁷ Nomba ukulusya ukupanikwa, mufwile mutetele nu kumunya lazya. Muchite chii ukuti atati aye nichitima ichawuntu. ⁸ Nomba nkuwakwezya mwemwe ukuti muzumilizye ulukundo lwinu kuli weliwe,. ⁹ Wuu ali mulandu wuno nawalichile, ukuti imbezye nukumanya ndi mweyakuvwila muli vyonsi. ¹⁰ Ndi mukutetela wumwi nani nkumutetela chilichimwi umuntu wiyo kwene. Ndi natetela--nupya ndinatetela chilichonse-- chatetelya pa mulandu wako wewe pamanso yakwe Kilistu. ¹¹ Chii chili vikwene ukuti satana atati atuchenjelye. Amuno sisweyawula kumanya inzila zyakwe. ¹² Umulyango wayulike na mwene kuli nene apano nizile ku musumba wa Tulowasi pa kutanda amazwi yakwe Kilisitu kulya kwene. ¹³ Ntali nukupuza mu mupasi wanwe pamulandu wakuti ntamuzanyile kweneko uwunji Tito kweneko. Apano nawasile nukuya ku Makadoniya. ¹⁴ Kwene kusalifya kuye kuli Leza , wino muli Kilisitu akatukolelela sweswe kuchimvya. Ukupitila muli sweswe ukuwumbula umununsi uwusuma uwa wumanyi muli weliwe paliponsi. Amuno ¹⁵ sweswe kuli Leza swe mununsi uwusuma wakwe Kilisitu, wonsi yaya yano yapusuka na pakasi pali yalya yano yakulowa. ¹⁶ Ku yantu yano yakulowa, umununsi ukufuma kumfwa ukuya kumfwa. Kuli yalya yano yapusuka, yene umununsi kufuma kuwumi ukuya kuwumi.Aweni akufikapo pa vintu vii? ¹⁷ Amuno tutayine na yantu avule yano yakukazya amazwi yakwe Leza ukuti yazanemo chimwi. Nkandi, ukuswefya kwa melenganyo, tukavwanga muli Kilisitu, ukuyana nukuti twatumwa ukufuma kuli Leza, pamanso yakwe Leza.