¹ Mo ngwageng wa bo 3 wa go busa ga ga Jehoiakime kgosi ya Juta, Nebukatenesara kgosi ya Babilona a dikaganyetsa Jerusalema go kganela go tsena ga dilwana teng . ² Modimo o ne a naya Nebukatenesara phenyo godimo ga ga Jehoiakime kgosi ya Juta, yo a neng a mo naya dingwe tsa dilwana tse di itshepisitsweng tsa ntlo ya Modimo. A di tsaya a di isa kwa lefatsheng la Babilona, kwa ntlong ya modimo wa gagwe, a baya dilwana tse di itshepisitsweng tse mo mabolokelong a modimo wa gagwe. ³ Kgosi a bua le Ashepenase, mongwe wa badiredi bagolo ba gagwe go tsisa bangwe ba batho ba Iseraele ba lelapa la bogosi le ba ba tlotlegang - ⁴ makau a a senang selabe, a kgatlhisa mo popegong, a na le botlhale botlhe, a tladitswe ka kitso le go tlhaloganya ebile a siametswe ke go ka direla mo ntlong ya bogosi. O ne a tshwanetse go ba ruta mekwalo le leleme la Sebabilona. ⁵ Kgosi a ba rebolela kabelo ya letsatsi le letsatsi ya dijo tse di monate le mofine o a o nwang. Makau a a ne a tshwanetse go katisiwa dingwaga tse 3, morago a bo a direla kgosi. ⁶ Gare ga bone e ne e le Taniele, Hanania, Mishaele le Asaria, bangwe ba batho ba Juta. ⁷ Modiredi mogolo a ba fa maina: a bitsa Taniele a re Beleteshasara, Hanania a mmitsa Shateraka, Mishaele a mmitsa Meshaka, Asaria a mmitsa Abeteneko. ⁸ Mme Taniele a ikaelela ka tlhaloganyo ya gagwe gore ga a na go itlatsa leswe ka dijo tsa kgosi tse di monate le fa e le ka mofine o a o nwang. Ka jalo a kopa tetla mo go modiredi mogolo gore a se ka a itlatsa leswe. ⁹ Modimo a fa Taniele letlhogonolo le mautlwelobotlhoko ka tlotlo e modiredi mogolo a neng a na le yone mo go ene. ¹⁰ Modiredi mogolo a raya Taniele a re, ''Ke tshaba mongwame kgosi. O laotse gore le je dijo dife, le nwe dino dife. Ke eng le tshwanetse go lebega bomaswe go feta makau a mangwe a balekane ba lona? Kgosi a ka nkgaola tlhogo ka lebaka la lona.'' ¹¹ Foo Taniele a bua le motlhokomedi yo modiredi mogolo a neng a mo roma go tlhokomela Taniele, Hanania , Meshaele le Asaria. ¹² A re, ''Tsweetswee, re leke, batlhanka ba gago, matsatsi a le 10. Re fe merogo re je o bo o re fe metsi re nwe. ¹³ Go tloga fa o tshwantshanye tebego ya rona le tebego ya makau a a ntseng a ja dijo tsa kgosi tse di monate, mme o re tshware, rona batlhanka ba gago, go ya ka fa o tla bong o bona ka teng.'' ¹⁴ Motlhokomedi a dumalana le ene go dira se, a ba leka matsatsi a le 10. ¹⁵ Kwa bokhutlong jwa matsatsi a a 10, ba lebega ba itekanetse, ba jesitswe mo go botoka go feta makau a a neng a ja dijo tse di monate tsa kgosi. ¹⁶ Foo motlhokomedi a tlosa dijo tse di monate le mofine a ba neela merogo fela. ¹⁷ Fa e le makau a mane a, Modimo a a neela kitso le go bonela kwa teng mo mekwalong le mo botlhaleng, le Taniele o ne a kgona go tlhaloganya mefuta yotlhe ya diponelopele le ditoro. ¹⁸ Kwa bokhutlong jwa nako e e neng e tlhomilwe ke kgosi gore a ba tsise, modiredi mogolo a ba tsisa fa pele ga ga Nebukatenesara. ¹⁹ Kgosi a bua le bone, mme mo gare ga setlhopha sotlhe ga bo go sena ope yo o neng a tshwana le Taniele, Hanania, Mishaele le Asaria. Ba ema fa pele ga kgosi ba ipaakanyeditse go mo direla. ²⁰ Mo potsong nngwe le nngwe e e batlang botlhale le go tlhaloganya e kgosi a neng a e ba botsa, a fitlhela ba feta ga 10 borramasalamose botlhe le botlhe bao ba ba ikayang fa ba bua le baswi mo bogosing jotlhe ka bophara. ²¹ Taniele o ne a le teng go fitlha ka ngwaga wa bo 1 wa ga kgosi Saerase.