¹ Nu Jesu tjija piti mo Ndemberi, umue uo vahongeua ve uatja nai ku Je,''Muhonge, tara! Omaue uomungemuano nozondungiro zomungemuano! ² Nu mezirira Jesu uatja nai kuje, ''Mo munu ondungiro indji onene indji ? Kapena eue rimue imba ndi ma rije ku seua kombanda ekuao, ndi hina kuhaneua.'' ³ Nu Eje tja haamene kondundu jomininga, ohunga no Ndemberi, Petrusa na Jakobasa na Johanesa na Andreasa arire tjive mu pura mourike uao, ⁴ ''Tu raera, ovina mbi ma vije ku tjitua rune? Nu otjisanekero tjo ma jenenisiro uovina mbi ma ije ku rira tjike?'' ⁵ Nu Jesu ue ve zirire nu ua utire okutja nai, ''Tjevereje kutja ape ha ningi omundu ngu me mu pukisa. ⁶ Orondu ovengi maveje kuja mena Randje nu, amavetja, 'Ouami Kristu' nama ve pukisa ovengi. ⁷ Nu ene tji mamu je ku zuva komunda uo vita notutona tuo vita, amu uruma ko, orondu imbi avihe viaso ku kara ko, nunguari omaandero ngunda aje hije ja. ⁸ Orondu otjiuana matji sekamene otjiuana, nouhonapare au sekamene ouhonapare. Nu mape kara omanjinganjingiro uehi, mo mahi omengi, nozondjara. Imbi ombutiro jo mihihamo ominene. ⁹ Nunguari ritjevereje oveni. Orondu mave mu jandja kovimbumba vio vanane nu mozosinangonge mamuje ku tonua. Nu mamuje ku jeterua pomurungu uovanane nozombara mena Randje, ni tji marire omahongoneno kuvo uina. ¹⁰ Nombuze indji, mai so kuzuvarisiua rutenga mouje auhe. ¹¹ Nunguari tji ve mu kambura nu ave kemu jandja, amu rikende komurungu uoruveze kutja mamu ka hungira tjike. Nunguari itji ma mu je ku peua mo iri otjingejo ndjo otji muaso ku hungira. Orondu handji ka uene mbu ma mu hungire, nunguari Ombepo Ondjapuke. ¹² Nu oomuangu ne rumbi mavee ku hororasana nave tuarasana kondiro, nu ihe ma horora na tuara omuatje ue. No vanatje mavee ku pirukira ovakuate vao, nave tjiti kutja ve zepiue. ¹³ Nu mamu je ku njengiua ijo vandu avehe mena rena randje.Nunguari ingui ngua takama nga ko maandero, eje ma jamua. ¹⁴ ''Nunguari tji mua munu Otjijaukise otjihaandjerua tjOmanjoneno, atja kurama moruveze pu tji hasere'' (auhe ngu ma rese nga pangunune), ''Okutja imba mberi mo Judeja nga ve taurire kozondundu, ¹⁵ Nu ahue nguri kombandondjiuo a heruka okuje ku hita mondjiuo poo oku toora tjimue mondjiuo, ¹⁶ Nu ingui nguri motjikunino ngaa jaruka oku ka toora omutuaro ue. ¹⁷ Nunguari ouee kumba ovingundi no va njamisise mo majuva ngo. ¹⁸ Nunguari kumbeje kutja aiha rire ouo kupepera. ¹⁹ Orondu momajuva ingo ma kuje ku kara ombamisiro onene, ndji hina ja karere ko okuza kombutiro jo vina mbia memua i Mukuru nga ko ruveze ndui, nu ndji hina maa ije ku kara ko rukuao. ²⁰ Nu Muhona andaku omajuva ingo kaje susuparisirue, katja pe kara onjama ndji mai jamua. Nu mena ro vatoororua imba mba toorora, Eje ua susuparisi omajuva ngo. ²¹ Nu omundu umue tje mu hee kutja, ''Tareje, Kristu ejengui! poo ''Tara uri mbena!'' a mu itavere ko. ²² Orondu mapeje ku surumuka ooKristu votjiuova, novaprofete vo tjiuova, nu mavee ku ungura ovisenekero novihimise vio kupukisa, mberi kutja andaku itja pe urika, itjave pukisa naimba ovatoororua oveni. ²³ Nunguari tjevereje! Mbe mu tjivisa ovina avihe komurungu uoruveze. ²⁴ ''Nunguari kombunda jombamisiro ndjo, ejuva mari zorerisiua, nomueze au ha jandja ondjerera jao, ²⁵ Nozonjose kejuru mazeu, nu omasa ngeri momajuru maje pukaurua.' ²⁶ Nu kuzambo maveje kumuna Omuna uomundu ameja movikamba viejuru no masa noujere ounene. ²⁷ Nu meje ku hinda ovaengeri Ve, nu maveje ku uongera kumue ovatoororua ve okuza kozombepo ine, okuza komaandero jemue uouje okujenda komaandero uejuru. ²⁸ Nambano rihongeje otjisasanekero tjo mukujumbua.Otjitavi tjauo tjima tjirire otjitarazu, ama tji njomoka ovijao, mu tjiua kutja okurooro kuri popezu. ²⁹ Okutja mo muano otjingeuo, ene tji mamu munu ovina mbi, tjiuee kutja uri popezu, posijo pomivero. ³⁰ Tjiri metja nai kuene, ondekurona indji kanaa i manuka ngunda ovina mbi avihija jenenisiua avihe. ³¹ Ejuru nehi mavi kapita, nunguari omambo uandje kanaa je kapita. ³² Nunguari uhunga ne juva indo noire kapena mundu ngu tjiua, kako, novaengeri mejuru, naingui Omuna, pendje na Tate uriri. ³³ Ene tjevereje, karee katumba, orondu kamuna kutjiua kutja oruveze orune.*** ³⁴ Peri otja omurumendu ngua kukire oujenda okujenda kehi rokokure, ngua jesire ondjiuo je nu a jandja ouvara kovakarere ve, nu ku auhe a jandja otjiungura, nu a rakiza omutjevere uopomuvero oku tjevera. ³⁵ Opu muaso ku tjevera, orondu kamuna kutjiua kutja omunio ndjiuo meja rune, kutja ongurova, poo omokati koutuku, poo mohunguriva tjimai vandara, poo omomuhuka. ³⁶ Tje ja motjimanga, nu E mu vaza a mua rara. ³⁷ Nu tjime hee kuene Me hee ku avehe, Tjevereje!''