¹ Nu ovo tji veja ku Jerusalema, vari popezu na Betipaje na Bethani, pondundu jo Mininga, Nu Jesu Ua hinda vevari vovahongeua Ve ² Nu atja nai kuvo, ''Tuendeje konganda ndjiri ohunga na ene. Nu Ene tjimamu utu oku hita mujo, mamu vaza okasinona kuke hija rora oku kavirua. Ke kutureje nu mu ke jete kuami. ³ Nu omundu kaani ngua tja nai kuene, 'Onguae tji mamu tjiti nai?' Itjeje, Muhona Me ke hepa nu Me ke hindi nguno tjimanga.''' ⁴ Nu ovo va kaenda nu ave kavaza okasinona ku ka kutua pomuvero pendje pomauaneno uozondjira nu ovo ave ke kutura. ⁵ Nu vemue va imba mba kuramene imbo va tjere nai kuvo, ''Mamu ungura tjike, tji mamu kutura okasinona?'' ⁶ Nu ovo veve raera omambo inga ngu va raua I Jesu, nu ovandu arire tji ve vesa. ⁷ Nu ovo va jeta okasinona ku Jesu, nu ave umbu ozombanda zauo kombanda jako. Nu Eje a kavire ku ko. ⁸ Nu ovengi va jarere omituaro viao mondjira, nu tjiva va kondere ovitavi viomiti nu ave vi jara mondjira. ⁹ Nu imba mba kaendere komurungu Ue na imba mba kongorere va ravaerere amavetja, ''Hosiana! Omunandaja ingui ngu meja mena ra Muhona. ¹⁰ Ngau serue ondaja ouhona ua tate Daavita! Hosiana mokombandambanda!'' ¹¹ Nu Jesu ua hita mu Jerusalema na mo Ndemberi nu a tara ovina avihe. Nu ejuva tji ra toko, a rire tja piti a i ku Betani puena imba omurongo na vevari. ¹² Nu mependukirua re juva, tjija vezu ko Bethani Eje ua tirondjara. ¹³ Nu Eje tja muna omukujumbua mbuari novijao kokure, uaja kuuo kutja nani maka muna otjihape muuo. Nu Eje tja tjeja puuo kena tja vaza muuo pendje jovitavi uriri, orondu oruveze ruomikujumbua tjandje karujeja. ¹⁴ Nu Jesu ua hungirire nu atja kuuo, ''Kapena mundu ngu maari otjihape move rukuao.'' Nu ovahongeua ve va zuvire tji. ¹⁵ Nu ovo veere ku Jerusalema, Nu tja hita mo Ndemberi Jesu ua utire oku nakera pendje, ovarandise no varande mo Ndemberi. Eje ua tjengura ovitihe viovapimbasane vo vimariva no vihavero via imba mbuja ve randisa ozonguti. ¹⁶ Nu Eje ka jandjerere nangarire omundu oku tjinda otjina mo Ndemberi. ¹⁷ Nu Eje Ue vehonga amatja nai kuvo, ''Tjii kape tjangerue kutja, 'Ondjiuo Jandje mai je ku isaneua ondjiuo jongumbiro joviuana avihe?''' *** ¹⁸ Nu Vapristeri ovanene no vatjange tji va zuva tji, nu ave ruku oku paha kutja mave mu zepa vi. Orondu ovo ija ve mutira mena rokutja ovandu avehe va himisirue ijo ku honga Kue. ¹⁹ Nu omapeta tjija tumbuka, ovo va pitire motjihuro. ²⁰ Nu momuhuka tjija ve kapita va muna omukujumbua aua kukuta okuza komize viao. ²¹ Nu Petrusa ua zemburuka nu atja, ''Muhonge, tara! Omukujumbua mbuua sengire ua kukuta.'' ²² Jesu uazirire natja kuvo, ''Karee nongamburiro mu Mukuru. ²³ Orondu tjiri metja nai kuene, Kutja auhe nguma tja nai kondundu indji, ove zukuka imbo nu u keriumbe momuronga, ae hina ku njengurisa tji momutima ue, nunguari ama itavere kutja ovina mbi mbi mahungire mavije ku tjitua, itji Mukuru otjima tjiti. ²⁴ Opu Me zu okutja nai kuene:Ovina avihe mbi mamu ningire mongumbiro, itavereje kutja mamu vi jakura, nu mavi rire ovienu. ²⁵ Nu aruhe tji mua sekamene ongumbiro, jesireje tjimuno mundu nguna otjipo kuena ene, kutja Iho uenu nguri Mejuru E mu jesire ozongatukiro zenu. ²⁶ *** ²⁷ Nu ovo veere rukuao ku Jerusalem. Nu Jesu ngunda ama kaenda mo Ndemberi, Ovapristeri ovanene, novatjange, novanene veja ku Je. ²⁸ Nu avetja nai ku Je, Ovina mbi u tjita nouvara uatjike, Nu ouani ngue kupa ouvara uoku tjita ovina mbi?'' ²⁹ Nu Jesu ua zira nu A tja nai kuvo, Me mu pura epurira rimue, nu Ndji ziree nu ami Me mu raere kutja mbi tjita ovina mbi nouvara uatjike? ³⁰ Ombapitisimo ja Johanesa, jazire kejuru poo omovandu? Ndjiziree.'' ³¹ Nu ovo veri hungirira muvo oveni, amavetja, ''Tjituatja, ''jaza kejuru,'Eje mee kutja, Onguae vari tjimu ha kamburire mu je?'' ³² Nunguari tjituatja, 'ja za movandu'....'' ova va tirire ovandu, orondu avehe va varere Johanesa otja omuprofete katjiri. ³³ Nu ovo va zira nu avetja nai ku Jesu, ''Katuna ku tjiua.'' Nu Jesu ua zira nai kuvo, ''Nu Ami uina opu mbi hina ku mu raera ouvara mbu mbi tjita nao ovina mbi.''