1
Neje ua hita moskepi, na kondo hembadina neja ko tjihuro tje omuini.
2
Nu, tara, va eta kuje omurumendu umue ngua remana ngua rarisirue mo mbete: neje tja muna ongamburiro jao uatja nai ku ingui omuremane; joroka mo muinjo muatje, ove ua jesirua omauvi uoje.
3
Nu tara, vemue vo vatjange va tjere nai mo mitima viao, omurumendu ngui ma jamburura Mukuru.
4
Nu Jesu ua tjivirue ouripura uao natja nai, “onguae tjima mu ripura ouvi mo mitima vienu?”
5
Nambano opapupu o o pene, okutja ove ua jesirua omauvi uoje; poo okutja sekama nu u kaende.”
6
Nunguari kutja mu tjiue kutja omuna uo mundu unouvara oku jesira ovandu omauvi uao kombanda jehi, (eje o o ku tja nai ku ingo muremane), sekama, toora ombete joje nu ujende kojoje.”
7
Neje ua sekama nai ko ndjiuo je.
8
Nunguari imbui ouingiuingi uo vandu tji ua muna tji, va himua tjinene na ve hivirike Mukuru ngua jandja omasa nge tamba ko vandu.
9
Nu Jesu tjija kapita okuzango, ua muine omurumendu ngu ja isaneua Mateusa, ngua haamene po ruveze ruo masutisiro uo vimariva vio uhona uehi: neje uatja kuje, ndji kongorera. Neje ua sekama ne mu kongorere.
10
Nu pa kara nai kutja Jesu tja haama pehi periro mondjiuo, peja ovasutise vo vimariva vio uhona mehi no varunde ovengi veja a veje ku haama puena je no vahongeua ve.
11
Nu Ovafarisei tji va muna tji vatja nai ko vahongeua ve, “onguae omuhonge uenu tji mari puena ovasutise vo vimariva vio uhona mehi no varunde?”
12
Nu Jesu tja zuva tji, eje uatja nai, “imba mberi naua kave hepa onganga nunguari I hepiua I imba mba vera.
13
Nu tuendee mu ke rihonge kutja itji tji heja tjike, Ami mbi zera otjari nunguari hi zeri ombunguhiro: orondu ami hi jere okuisana ovasemba nunguari mbe jera okuisana ovanauvi ko ndanaukiro jo ku poka kouvi.
14
Kuzambo ovahongeua va Johanes veja kuje nu avetja, onguae ete no Vafarisei tji tuno kuri tjaera kovikuria potuingi, nu ovahongeua voje tji ve heri tjaere kovikuria.
15
Nu Jesu uatja nai kuvo, tjii ovanatje mberi mo mukandi mave jenene okurira ngunda omukupe aeri puena vo are? Nunguari omajuva ma eja ingui omukupe tji mee ku toorua muvo, nu otji mavee ku ritjaera kovikuria.
16
Kapena mundu ngu rapa omutuaro omukuru ne rapi epe, orondu e rapi indi epe marije ku njondorora omutuaro imbui o mukuru, nu omataukiro uapo majee ku rira omavi komeho.
17
Nu uina ovandu ka ve tua omavinu omape mo zondjatu zo mikova ozonguru: orondu omavinu omape maje pamuna inda ozondjatu zo mikova, nu omavinu ajetika, nozondjatu a ze zundara: nunguari vetua omavinu omape mo zondjatu zo mikova ozombe navivari a vi takamsiua.
18
Neje ngunda a mahungire omambo nga kuvo, tara, omunane umue ueja kuje, e rikotamene kuje natja, omusuko uandje uatu nainai; nambano ove indjo uje ku mu jambeka eke neje ma hupisiua.
19
Nu Jesu ua sekama nemu kongorere, ovahongeua ve uina ve mu kongorera.
20
Nu, tara, omukazendu ngua verere oruandara ozombura omurongo na mbari, ueja kombunda je na tunu kotjikoro tjo mbanda je kehi:
21
Orondu eje tje riheere nai muje omuini, indi tjimba tunu kombanda je uriri ami me verukisiua.
22
Nu Jesu omuini ua tanauka nu tje mu munu atja, joroka mo muinjo: ongamburiro joje je ku verukisa. Nu omukazendu ngo ua verukisiua mo iri ndjo.
23
Nu Jesu tja hita mo ndjiuo jo munane, ua muna ovaimbure no vandu a mave kuenene,
24
Neje uatja nai kuvo, tu pee oruveze: orondu omusukona ka tire nunguari ua rara. Novo arire tji ve mujoro no manjengu.
25
Nunguari ovandu tji vaza no ku pitisiua pendje, eje ua hita, emukambura keke, neje a sekama.
26
Nu ombuze ndji ja pita nai handjauka mehi ndo arihe.
27
Nu Jesu tja kaenda okuzambo, ovarumendu ve vari ovapotu ve mukungkorera ama ve ravaere ama vetja, tutjariparera ove Muna ua David.
28
Neje tjaza no kuhita mondjiuo ovarumendu imbo vapotu veja kuje: nu Jesu uatja kuvo, ma mu itavere kutja me jenene oku ungura otjina tji? Novo vatja kuje, ii Muhona.
29
Neje arire tja tunu ko meho uao natja, ngape kare kuene otja ko ngamburiro jenu.
30
No meho uao ja patururua; nu Jesu eve rakiza nomasa, atja, tjitee kutja ape haningi nguma tjiua otjina tji.
31
Nunguari ovo, tjivazu noku jenda, vaka handjaura ondangu je mehi ndo arihe.
32
Nu imba tji ja ve piti, tara, varue va jetere kuje omurumendu omboro ngua huurirue ijo mbepo ombi.
33
Nu ombepo ombi tjijaza no ku nakerua pendje omundu ingui omboro arire tja hungire, nu ouingiuingi uo vandu mbari mbo ave kumua, na vetja, itji katjija rora oku kara po mo Isiraera.
34
Nunguari imba Ovafarisei va tjere, u ramba ozombepo ozombi no kavara ko zombepo ozombi.
35
Nu Jesu ua riangere mo vihuro viao avihe na mozonganda zao azehe, ama hongo mo zo Sinagoge zao, ama zuvarisa ombuze jouhona, a mapanga omauvere uo zongaro pekepeke no mitjise vio mihingo pekepeke movandu.
36
Nunguari tja muna ouingiuingi uo vandu, eje u eve tira otjari orondu ova vaurirue, nu va pizukire no kuti akuhe tjimuna ozondu nde hina murise.
37
Kuzambo eje uatja nai ko vahongeua ve, ovinikorua tjiri ovingi nunguari ovaungure ovahena;
38
Kumbee nguari ko Muhona uo manikorero, a hinde ovaungure mo vinikorua vie.