¹ Amu pangura, kutja amu ha pangurua. ² Orondu mamu pangurua na indji ombanguriro ndji ma mu pangura najo: nu itji otjisanekero tji ma mu ungurisa ko vakuenu otji ma mu sanekerua natjo. ³ Onguae tji mo munu okarupambaro ku keri meho ro mukuenu, nu tjiu hina ku muna ombande ndjiri meho roje? ⁴ Poo mo jenene okuheja vi mukuatua pamue naove kutja kurama mbiku suvire okarupambaro meho; nu tara ove a u no mbande meho. ⁵ Munatjavivi ove, rutenga isamo o mbande meho roje omuini; nu kuzambo mo munu naua nu o sora oku suvira o karupambaro meho ro mukuatuapamue naove. ⁶ O jandja ovina ovijapuke ko zombua, poo omaue omahuze ko zombinda tjaa ngaa ze vi tondo no vikoti kuzambo a zetanauka aze mu njondorora. ⁷ Ningira nu matji jandjeua kove; paha nu mo munu; kongora nu mo jezururirua: ⁸ Orondu auhe ngua ningire u jakura; nu ingui ngu ma paha umuna; nu ingui ngu ma kongora ma jezururirua. ⁹ Poo ouani omurumendu mokati kenu tja ningirua ijo muna ue omboroto ngu mupe eue? ¹⁰ Poo tja ningire ehundju me mupe onjoka are? ¹¹ Tjii nambano ene mbu muri ovanauvi, tji mu tjiua okujandja ovijandjeua oviua ko vanatje venu, Iho nguri mejuru kena kujandja ovina oviua tjinene kombanda jenu ku imba mbu mave ningire kuje? ¹² Okutja ovina avihe mbimuzera kutja ovandu ve vi tjite ku ene; ene uina vi tjitee kuvo: orondu indji ojo oveta no vaprofete. ¹³ Hitireje po muvero imbo mukuani: orondu omupaturuke omuvero nu ombaranga ondjira ndji tuara njoneno, nu ovengi mbe pitira mujo. ¹⁴ Nunguari o mukuani omuvero nu okasina ondjira ndji mai tuara ko muinjo nu ovatiti mbe I muna. ¹⁵ Ritjevereje ko vaprofete vo tjiova, mbeja kuene mo muzaro uo zondu, nu moukoto averi o zombungu ozonjondorore. ¹⁶ Ene mamu je ku ve tjivirua kovihape viao. Ovandu ve nikora omandjembere mo miti vio mauija are, poo omikuju mo minanjiva. ¹⁷ Otja tjiperi omuti auhe omuua u ruka ovihape oviua; nu omuti omuvi u ruka ovihape ovivi. ¹⁸ Omuti omusemba kamaa u ruku ovihape ovivi nu omuti omuvi kamaa u ruku ovihape oviua ¹⁹ Omuti auhe mbu hina ku ruka ovihape oviua mau kerua pehi nau umbua mo muriro. ²⁰ Okutja mamu je ku ve tjivirua kovihape viao. ²¹ Kaje ngui auhe ngu matja ku Ami, Muhona , Muhona nguma jenene oku hita mouhona uejuru; nunguari eje ngui ngu ma tjiti ombango ja Tate nguri mejuru. ²² Ouingi ejuva ndo mau je kutja nai ku Ami, Muhona, Muhona, katu ungurire otjiporofeto mena roje? Nu katu undururire ozombepo ozombi pendje mena roje? Nu katu ungurire ovitjitua ovingi ovihimise mena roje? ²³ Ami otji mee ku hongonona nai kuvo, Ami hina pu mbe mu tjivirue: virukeje pu Ami, ouene mbu mu ungura ourunde. ²⁴ Okutja omundu auhe ngua zuu omambo uandje inga neje tjiti, me mu saneke ko murumendu o nongo ngua tungire ondjiuo je kombanda jo ruuua: ²⁵ No mbura ja rauka , omipupo avija, ovivepo avi singi nu avi rivanda no masa kombanda jo ndjiuo ndjo; nunguari ojo kai uire: orondu ja zikirue kombanda jo ruuua. ²⁶ Nu ingui ngua zuu omambo uandje inga ne he je tjiti, memu saneke ko murumendu ejova ngua tungire ondjiuo je kombanda jo muheke: ²⁷ No mbura ja rauka , omipupo avija, ovivepo avi singi nu avi rivanda no masa kombanda jo ndjiuo ndjo; nojo ja uire: nomauiro uajo jari omanene tjinene. ²⁸ Nu pa kara nai kutja Jesu tja manene okuhungira omambo inga ajehe, ovandu va himisirue imbi mbija hongo, ²⁹ Orondu Eje kaa hongo otjo vatjange nguari ija hongo otjo mundu a e nouvara.