1
Nambano omukandi uomboroto ndji ha surisiua, mbu isaneua Omarurumino, ua ri popezu.
2
Novapristeri ovanene novatjange va pahere kutja mave Mu zepa vi; nunguari ija ve tira ovandu.
3
Nu Saatana otja hita mu Judas, uo sano ja Iskariot, nguari umue ua imba omurongo navevari.
4
Nu eje otja kaenda nu aka hungira kuena ovapristeri ovanene nozohongora zovaungure vOndemberi, kutja me Mu horora vi kuvo.
5
Novo va tjaterua tjinene nave zuvasana ovimariva kuenae.
6
Neje ua zuvasana kuena vo, nu a ruku okupaha oruveze oruua ruo ku Mu horora kuvo, ovimbumba viovandu a vi heri po
7
Indino otji peja ejuva rombroto ndji ha surisiua, ondjona jomarurumino ndi I zepiua.
8
Nu Jesu ua hinda Petrusa na Johanesa, na tja, "Kaendee mu ke tu tunine omarurumino kutja tu rie."
9
Nu ovo vatja nai ku Je, Mo vanga kutja tu ka tune pi?
10
Nu Eje Ua tja nai kuvo, "Tareje, ene tji mua hiti motjihuro, nu mamu ka hakaena nomurumendu ngua tjindi ehoro romeva. Nu mu kongorereje nga kondjiuo mu ma ka hita.
11
Nu ene mamu katja nai komuniondjiuo, Omuhonge matja nai kove, Etuuo rovaenda ri pi, mu Me ka rira omarurumino puena ovahongeua vandje?"
12
Nu eje me ke mu raisira etuuo enene rokombanda nda harekua. Ene ka tunee ndo."
13
Novo va kaenda na ve kavaza otja imba pa hee, nu ave tunine omarurumino.
14
No ire tji je ja, Eje Ua haama pehi puena ovaapostel imba omurongo navevari.
15
Nu Eje Ua tja nai kuvo, "Mba zerire tjinene okuria Omarurumino inga puena ene ngunda A mbi hija hihamisiua.
16
Orondu Me tja nai kuene, Hinee je ri ko rukuao, ngatji ja jenenisiua mOuhona ua Mukuru."
17
Nu Eje Ua toora ekopi, A jandja ondangi, na tja, "Tooreje indi nu mu hane ro mokati kenu.
18
Orondu Metja nai kuene, Hina ku nua ko kotjihape tjomuvite, nga Ouhona ua Mukuru tji ue ja."
19
Nu Eje ua toora omboroto, A jandja ondangi,narire tja teja jo nu E i jandja kuvo, amatja, 'Indui orutu rua ndje ndua jandjerua ene, tjiteje itji oku Ndji zemburuka.'
20
Momuano tjingeuo Ua toora ekopi, kombunda jovikuria, natja, Ekopi ndi omerikutirokumue omape mombindu ja Ndje, ndja tirahirua ene.
21
Nunguari, tareje, eke ra ingui ngu me Ndji horora riri ouena Ami potjitihe.
22
Nu tjiri, Omuna uOmundu mai, otja tji pa tieua, nunguari ouee komundu ingui ngu me Mu horora!"
23
Novo va utire oku purasana mokati kavo oveni, kutja ouani muvo nguma tjiti otjina tji.
24
Nu uina pa kara ozombata mokati kavo jokutja ouani muvo ngu ma rire omunenenene.
25
Nu Eje Ua tja nai kuvo, Ozombara zoviuana ze honapara kombanda javio. Nu imba mbe nouvara kombanda javio ve isaneua ovaparure vavio.
26
Nunguari ene kamuna ku kara nao, nunguari ingui nguri omunenenene mokati kenu nga kare otja omutiti, nu ingui omunane nga kare otja omukarere.
27
Orondu ingui omunene pomukuao eje une, ingui ngua haamene okuria poo ingui ngu me mu ungura. Kaje ingui ngua haamene okuria are? Nunguari Ami mbiri mokati kenu otja omukarere.
28
Ene ouene imba mbu mua kara puena Ami momarorero Uandje.
29
Nu Ami Me kekere ene ouhona tjimuna Tate the Ndji kekera ouhona.
30
Kutja mu je ku ria nokunua potjitihe Tjandje mouhona Uandje, nu mu haame movihavero viouhona oku pangura omihoko via Isiraera imbi omurongo navivari.
31
"Simon, Simon, tjevera, Saatana ua zeri ove, kutja e ku sise otjo ruhere.
32
Nu Mbe ku kumbire kutja ongamburiro joje ai ha suaka. Nu ove kombunda tji uazu noku tanaurua, zeuparisa ovakuenu."
33
Nu eje ua tja nai ku Je, "Muhona, ami mbe rirongerera okujenda puena ove akuhe, kondorongo poo kondiro."
34
Jesu uazira, "Me ku raere Petrusa, ohunguriva kanaa i vandara ndinondi, ngunda auhije ndji ripatana potutatu."
35
Nu Jesu uatja nai kuvo, "Tji Mbe mu hindire nokuhina tjikoma, poo embo, poo ozongaku, muna tjimue tji mu aka hepere?" Novo vazira, "katjipo."
36
Nu Eje Ua tja nai kuvo, "Nunguari nambano, auhe nguna otjikoma nga tore, nu momuano otjingeuo ingui nguna ondjatu nga tore. Nu ingui ngu hina engaruvio nga randise omutuaro ue a rande engaruvio.
37
Orondu Me tja nai kuene, kutja na inga rukuao nga tjangua jaso kutja ja jenenisiue mu Ami, kutja Eje ua varua muena ovarundu. Orondu ovina mbiri ohunga na Ami vina ondjandero."
38
Novo va tjere, "Muhona, tara, pena omanga jevari mba." Nu Eje Ua tja nai kuvo, "Opuuo."
39
Jesu uapita nu otja komuhingo ue, ai kondundu jomininga, nu ovahongeua ve uina ve mu kongorera.
40
Nu Eje tjari poruveze Ua tja nai kuvo, "Kumbeje kutja amu ha hiti momarorero."
41
Nu Eje Ua humburuka puvo mangara oukokure ueue tji ra umbua, nu A uoro ozongoro na kumbu,
42
Tate, Ove tji mo vanga isapo ekopi ndi mu Ami, nunguari arire ombango jandje nu nag rire ojoje ndji ma i ungurua.
43
Nu omuengeri okuza kejuru ua munikisiua ku Je okumuzeuparisa.
44
Nu Eje aeri momuhihamo omunene otja kumba tjinene. Norukutu Rur rua karere otjo mata uombindu omanene, nga uiririre pehi.
45
Nu Eje tja tumunuka okuza mongumbiro, The ja kovahongeua Ve, ueve vazere ava rara, tjinga va havererue ijoruhoze.
46
Nu Eje Ua tja nai kuvo, "Onguae tji mua rara? Jeurukeje mu kumbe tjaa ngaa mu hiti momarorero."
47
Nu Eje ngunda A ma hungire, tara, otjimbumba otjinene! Nu ingui nguja isaneua Judas, nguari umue ua imba omurongo navevari, ueve hongorera, a riama ku Jesu nu e Mu hupite.
48
Nu Jesu Ua tja nai ku je, "Judas mo horora Omuna uOmundu noruhupito?"
49
Nu imba mbari puena Je tjiva muna kutja mape kara tjike, va tjere ku Je, "Muhona, ngatu ve kuapize nomangaruvio?"
50
Nu umue uavo ua kuapiza omukarere uomupristeri omunene nu emu kondo okutui kue okunene.
51
Nu Jesu uatja, "jandjereje tji nga mba opuuo!" Eje ua tuna kokutui kue nu emu verukisa.
52
Nu Jesu Ua tjere nai kovapristeri ovanene, nozohongora zovatjevere vondemberi, mbe ere ku Je, "Mamuja nomanga-ruvio no onguinja tjimuna mbu mua teza omupunde?
53
Ami mbari mondemberi omajuva ejehe puena ene nu kamuna ndi mue Ndji jerera eke. Nunguari indji oire jenu nouvara uondorera."
54
Novo ve Mu tuara, ave mu hongorere kondjiuo jomupristeri omunene. Nu Petrusa ua kongorerera kokure.
55
Nu ovo tji va zire nokujakisa omuriro morupanda ruondjiuo, nu tjiva haamene pehi, Petrusa ua haamene pehi mokati kao.
56
Nu omukarer omusuko uorive ue mu muine tja haamene pomuriro, nu e mu tara tjinene na tja, "Omurumendu ngui uina uari puena Je."
57
Nu Petrusa ua patana, amatja, "Mukazendu, ami hi muii."
58
Nu kombunda uokaruveze okatiti, omukuao ue mu muna, na tja, "Oove umue uavo." Nu Petrusa ua tja , "ka uami."
59
59 Nu mangara kombunda joruveze ruo ire ombomba, omukauo ua zeuparisa embo ndi noupandi na tja, "Ouatjiri omurumendu ingui ua ri puena Je orondu eje uina oua Galilee".
60
Nu Petrusa ua tja, "Murumendu hina ku tjiua kutja mo hungire ohunga na tjike." Tjimanga, eje ngunda ama hungire ohunguriva ai vandara.
61
61 Nu Muhona Ua tanaukire nu a tara mu Petrusa.Nu Petrusa a zemburuka embo ra Muhona, indi tje muheja kutja, "Ohunguriva ngunda ai hija vandara mo Ndji ripatana potutatu."
62
Nu Petrusa ua pita pendje na karira nomuhihamua tima.
63
Novarumendu mba kamburire Jesu ve Mu njekerera nave Mu tono.
64
Novo tji vaza nokumukutjira komeho, ve mu tona momurungu nu ave Mu pura, ama ve tja, "Profeta kutja ouani ngue ku tono?"
65
Nu va hungirire ozondjambu ozengi ku Je.
66
Nu tji paza nokutja, ovanene vovandu novapristeri ovanene, novatjange va uana, nu ave Mu nanene pomurungu uotjira tjao, ama ve tja,
67
"Oove ngu uri Kriste? Tu raera." Nu Eje Ua tja nai kuvo, "Na nge mu raere kanaa mu itavere.
68
Nu Ami tji Mbe mu pura kanaa mu ndji ziri poo okuNdjesa okukaenda.
69
69 Okuzamba Omuna uOmundu otji ma ka haama kokuuoko okunene kuomasa kua Mukuru.
70
Indio avehe otji va tja, "Okutja Ove oOve Omuna ua Mukuru?" Nu Eje Ua tja nai kuvo, "Mutja nao, orondu OUAMI."
71
Nu ovo va tja, "Matu hepa ouhatoi ua tjike okukapita imbui? Ete oveni tji tue ri zuvire motjinjo Tje."