¹ Kombunda jo vina mbi Paurusa ua sekamene mo Atens ne ja ko Korinde. ² Ingo ua vazere o Mujuuta ngu ja isaneua Aquila, ngua kuatererue ko Pontusa, nu ngue ere o upe okuza ko Italia, puena o mukaendu ue Priskira, orondu Klaudiaas tja rakizire kutja o Vajuuta avehe ngave pite mo Roma, Paurusa ue ja ku vo, ³ Nu mokutja eje ua ri o uo tjiungura tjimue tjimuna vo, ua kara na ungura puena vo, orondu o tjiungura tjao jari oku ungura o zotenda. ⁴ Nu Paurusa ija hungire mo sinangonge me Sabata arihe, ama zuvisa o Vajuuta no Vahirika. ⁵ Nu oo Sirasa na Timoteusa tji veja oku za ko Makedonia, Paurusa ueri jandjere kembo, na zuvarisire o Vajuuta kutja Jesu, o ngu ri Kristu. ⁶ Nu o Vajuuta tji va pandere noku jamburura, eje ua pukumunine o mbanda je, na tja kuvo, ''Ombindu jenu i ri kombanda jo viuru vienu o veni; Ami mba kohororua mu jo. Oku za mu nai me i kovo Viuana.'' ⁷ Nu ua sekama mbo na ka hita mo ndjiuo jo murumendu umue ngu ja isaneua Titijasa Juustusa, ngu je rikotamene ku Mukuru. O ndjiuo je jari posi jo sinangonge. ⁸ Nu Krispusa, o munane o hongora uo sinangonge, ua itaverere mu Muhona puena imbo vo ndjiuo je avehe; No o vengi va Korinde tjiva zuvire itji va kamburire na ve papitisiua. ⁹ Nu Muhona ua hungirire kuena Paurusa mo utuku no mbunikisiro, ''O tira, nunguari hungira, nu o muina. ¹⁰ Orondu Ami Mbi ri puena ove, kapena umue ngu me rimengere ove oku ku hihamisa, orondu Mbi na o vandu o vengi mo tjihuro tji.'' ¹¹ Paurusa ua kara ngo o mbura no mieze hamboumue, ama hongo Embo ra Mukuru mokati kao. ¹² Nunguari Gario tjari o munane mo Akaija, o Vajuuta avehe ve rikutire kumue nave taurire mu Paurusa, nave mu jeta ko tjihavero tjombanguriro; ¹³ Ama ve tja, ''Omurumendu ingui u popa o vandu oku rikotamena ku Mukuru mo muhingo mbua hanika no Veta.'' ¹⁴ Nu Paurusa tja ripo oku paturura o tjinjo tje, Galio ua tjere ko Vajuuta, ''Andaku tjiri, pena otjina tji tja tjitua navi, poo oku zunda ko urunde, itja pe kara ezeva ku ami ro ku mu puratena. ¹⁵ Nunguari tjeri o zombata zembo, no mana, no zo veta jenu, ritarereje ku zo o veni. Orondu ami hina ku zera kutja mbi rire o mupangure uo vina o hamukuena imbio.'' ¹⁶ Nu Gario ueve ramba po tjihavero tjombanguriro. ¹⁷ Nu ovo avehe otji va kambura Sostenesa, o munane o hongora uo sinangonge, nave mu tonone po murungu uo tjihavero tjo tjombanguriro. Nunguari Galio ke rikendere na imbi mbi va tjita. ¹⁸ Nu Paurusa, tja zire noku kara o majuva o mengi, ua raere o vakambure nai ko Siria mo skepi puena Priskira na Aquila. Nu kunda a hija zapo po makurameno uo zo skepi, Kenkrea, ua kondere o zondjise mena ro makuizikiro nga ungurire. ¹⁹ Nu tji veja ko Efesusa, Paurusa ua esa Priskira na Aquira ingo, nunguari eje o muini ua hitire mo sinangonge na kara no mahungi kuena o Vajuuta. ²⁰ Novo ve mu ningirire kutja a kare o rure puena vo, nu eje ka itaverere. ²¹ Nunguari ue ve virikiza, ama tja, Nunguari me kotoka ku ene rukuao tjeri ombango ja Mukuru.'' Neje ua rondere o skepi na piti mo Efesus. ²² Nu Paurusa tja vaza ko Kesarea, ua ire naka minika o kereka ja Jerusarema, nai ko Antioka. ²³ Nu tjaza noku kara o ruveze katjondumba ngo, Paurusa ua sekamene nai kehi ra Garatia na Frigia ama zeuparisa o vahongeua avehe. ²⁴ Nunguari o Mujuuta uo tjorive ngua rukirue Apolosa, ngua kuatererue ko Aleksandria, o musore uo mambo no ngua tjivirue o matjangua ue ere ko Efesusa. ²⁵ Apolosa ua hongerue mondjira ja Muhona. Neje tjinga ari o mutue mo mbepo, ua hungirire na hongo o vina via Muhona no ukahu, nangarire eje ija tjiua o mbapitisimo ja Johanesa uriri. ²⁶ Apolosa ua utire oku honga no uvande mo sinangonge. Nunguari Priskila na Aquila tjive mu zuva, vemu toorera ko tjikoro, nave ke mu handjaurira o ukahu o ndjira ja Mukuru. ²⁷ Neje tja tandere oku tuurungira mo Akaija, o vakambure mba zeuparisirue otji va tjangera o vahongeua oku mu jakura. Neje tja vazere ua zeuparisire tjinene imba mba kamburire mena ro tjari. ²⁸ Aporosa eje tja taara o Vajuuta mo zombata po murungu uo vandu, na raisa mo Matjangua kutja Jesu onguri Kristu.