¹ Novo tjiva tuurungire o Amfipolisa na Apolonia, nave ja ko tjihuro tja Tesalonika, ku kuari no sinagoge jo Vajuuta. ² Nu Paurusa otja ko muhingo ue, ua hitire kuvo, nu o masabata jetatu amaje kongorasana a hungire kuena vo mo matjangua. ³ Ama paturura na ma raisa kutja pa puire kutja Kristu a hihamisiue, noku penduka mo vati. Nu uatjere, nu ingui Jesu ngu me zuvarisa mu ene o nguri Kristu. ⁴ Nu tjiva vo Vajuuta vavo va itaverere nave rikutu o veni ku Paurusa na Silasa, no tjimbumba o tjinene tjo verikotamene vo Tjihirika, no tjivarero tjo vakaendu o zohongora. ⁵ Nunguari o Vajuuta mbe ha itaverere, va teruru, nave toorere o varumendu o varunde mbu jave rianga ondera ja ure mo marandero, nave uongere kumue o tjimbumba o tjinene, nave tjiti ezunganeno mo tjihuro atjihe. ⁶ Nu ave vete ondjiuo ja Jasona ama ve paha okupitisa Paurusa na Sirasa pendje novandu. Nu tjive hevemuine, va nanenene Jasona no vakambure vorive po murungu uo vapangure vo tjihuro, amave ravaere kutja, ''Imba ovarumendu mba zunganisa o uje auhe va tukuruka veri muno uina. ⁷ Nu ovarumendu imba Jasona o mba jakura ve pirukira o mazikamisiro uo mukesare, amave tja; pena o mbara o nguao- Jesu.'' ⁸ Nu va zunganisire otjimbumba no vapangure vo tjihuro mbuva zuvire ovina mbi. ⁹ Nu tji va za noku toora o tjisuta mu Jasona na imba o vakuao ve vesa a vei. ¹⁰ Outuku mbo o vakambure otji va hinda Paurusa na Sirasa ko Berea. Ovo, tji vaka vaza va hita mo sinangonge tjo Vajuuta. ¹¹ Nu imba vari zondunge o zondjere tjinene oku kapita imba o va Tesalonika, mokutja ovo ijave jakura Embo no uripura mbua paturuka, aruhe amave nongonona mo Matjangua kutja tjiri o vina vi ri nao. ¹² Kuzambo o vengi mo kati kavo otjiva itavera, o varumendu no vakaendu o vengi o vatengua o Vahirika. ¹³ Nunguari o Vajuuta va Tesalonika tji va zuva kutja Embo ra Mukuru ma ri zuvarisiua i Paurusa ko Berea, va ja ngo uina, nave ka zunganisa o vandu. ¹⁴ Nu mo tjimanga, ovakambure otji va hinda Parusa kuta ko muronga, nunguari Srasa na Timoteusa va seua ngo. ¹⁵ Nunguari imba mba tikire Paurusa ve mu tuara nga ko tjihuro tja Atens. Novo tji va jesire Paurusa imbo, va jakura omaraa okuza muje oku tuara ku Sirasa na Timoteusa kutja veje ku je mo tjimanga. ¹⁶ Nunguari Paurusa ngunda ameve undjire mo Atens, o mbepo je ja hihamenue mo ukoto ue, tja muine kutja o tjihuro tje ura o visenginina. ¹⁷ Nu eje otja hungira ejuva ne juva mo sinangonge kuena o Vajuuta na imbambu ja ve rikotamene ku Mukuru, no ko marandero ejuva arihe, ama hungire kuena avehe mbe ri ngo. ¹⁸ No zonongo zo mahongero zorive, zo Tjiepikure no Tjistoiki va pakaena kuena e. Nu tjiva va tjere, ''o mundu ngui ngu hungira o viporoporo ma tja tjike hapo?'' Nu imba tjiva, ''Ma munika otja o muzuvarise uo vakuru vambangu,'' eje tjinga ija zuvarisa Jesu no mbendukiro ku vo. ¹⁹ Novo otji va toora Paurusa nu ave mu jeta po Areopagusa, nave tja, ''Tu tjivisa kutja o mahongero inga omape ngu mo hungire o ua tjike? ²⁰ Orondu ove mo jeta o vina via mbangu mo matui uetu. Nambano otji matu vanga okutjiua kutja o vina mbi mavi heje tjike?'' ²¹ (No va Atens avehe, no vandu va mbangu mba tura mo, kavena tjina tjarue tji ve suvira ko pendje noku serekarera poo oku puratena o tjina o tjipe.) ²² Nu Paurusa ua kuramene pokati ko Areopagusa, na tja, ''Varumendu, va Atens, Ami me munu kutja muna o ndira ko o mukuru mo vina avihe. ²³ Orondu tji je kapita ne munu o vina mbi mu rikotamena ko, mba muine ezuko uina nda tjangua: ''Ku Mukuru Ngu Heiue.'' Otja tji muha tjiua nao ingui ngu mu rikotamena ko, ami me Mu tjiukisa kuene. ²⁴ Mukuru ingui ngua ungura o uje no vina avihe mu uo, mena rokutja Eje o Muhona ue Juru no uje, ka kara mo zondembri ndatungua no make. ²⁵ Poo oku ungurirua no make uo vandu tjimuna una tja hepa, orondu Eje u jandja o muinjo no musuvano no vina avihe ku avehe. ²⁶ Nu Eje ua ungurire o viuana avihe no mbindu imue oku tura kombanda jehi arihe, Ama ziki o tuveze tu tua zikamisiua rukuru, no mikuro vio ma turiro uao, ²⁷ Kutja ve pahe Mukuru, no kutja nani mave Mu pmbaha nave mu munu, nandino Eje keri kokure na auhe uetu. ²⁸ Orondu Mu je tu hupa nu tu kaenda, nu tuao uini uetu, poo otja o vahongonone venu vo mitandu tji va tja, ''Orondu o uete o rukuato Rue uina.' ²⁹ Okutja tji turi o rukuato rua Mukuru, katu sere oku ripura kutja ngahino ongaroja Mukuru jasana ko ngoldo, poo silveri, poo eue nda hongua no unongo no urizemburuka uo mundu. ³⁰ Nunguari Mukuru tjiri, otja rurumisire o meho ue ko tuveze tuo ku ha tjiua, nu nambano ma rakiza katjiri kutja ovandu avehe akuhe ngave riverere ko ndanaukiro. ³¹ Orondu Eje u nejuva nda zikamisiua ndi Me je ku pangura o uje mo usemba no Murumendu ngua toorora.Mukuru ua andja ouhatoi ku avehe noku Mu pendura mo vati.'' ³² Nu ovarumendu va Atensa tji va zuvire o mbendukiro jo vati, tjiva otji va njekerera Paurusa; nu tjiva ave tja, ''Matu je ku ku puratena rukuao o hunga na itji.'' ³³ Nu kombunda ja nao Paurusa otja pitire mokati kao nai. ³⁴ Nunguari o varumendu tjiva ve rikutu ku je o veni nave kambura, mokati kavo muari Dionisiusa ingui o Muareopagite, no mukaendu ngu ja isaneua Damarisa, no vakuao puena vo.