¹ Nambano o hunga no meero uo Muhona uetu Jesu Kristu, no mauongero uetu pamue ku je ku kara punae, matu rijarikana kuene, vakuetu, ² kutja amu ha njinganjingisiua poo oku zunganisiua nandarire ijo mbepo, poo ijo maraa, poo o mbapira ndjiri tjimuna ndji ma i zu kuete, kutja ejuva ra Muhona re ja hapo. ³ Amu jandjere omundu oku mu pukisa nandarire mo muano kaani. Mo kutja ka ri na ku ja murumendu nguhina veta raisiua, o muna uo njoneno. ⁴ Ingui o nguri ngu pirura noku ritongamisa omuini ko tjina atjihe tji tji isaneua Mukuru, poo tji tji rikotamenua. Nu nao, u haama mo ndemberi ja Mukuru, ae ri urike o muini otja Mukuru. ⁵ Ka muna zemburuka kutja tjimbari puena ene mbe mu raera o vina mbi? ⁶ Nambano mutjiua kutja o tjikuae tji tji mu tjaera, kutja eje ku raisiua uriri mo iri ndjiri jo. ⁷ Orondu o tjiundikua tjo ku hinaveta tja uta hapo oku ungura, ongo kutja pena ngumu tjaera nai, ngatji eje tja isapeua mo ndjira. ⁸ Kuzambo ingui o muhinaveta otji ma raisiua, ingui Muhona Jesu ngu meje ku zepa no masuvaneno uo tjinjo tje ne mu mana no mavandururiro uo meero ue. ⁹ O meero ua ingo muhinaveta maje ku kara mena ro viungura via Saatana no masa aehe, no visanekero no vihimise vio tjiuova, ¹⁰ na kangamua uvi mbu uovisa imba mbe njonoka, mo kutja va panda o ku suvera ouatjiri kutja ve jamue. ¹¹ Mo tjimbe tji Mukuru me ve hindire o tjiuova tjo masa kutja ve itavere o vizeze ¹² no kutja avehe ve pangurue imba mbe ha itaverere o uatjiri, nunguari mbaa ve tjaterua ijo uhasemba. ¹³ Nunguari ete tua soku mu jandjara o ndangi ku Mukuru, vakuetu o vasuverua va Muhona, orondu Mukuru ue mu toorora otja ovihape-vio-mbutiro mbi ma vi jamua no majapuriro uo Mbepo no ku itavera mo uatjiri. ¹⁴ Ue mu isanena ku itji no mbuze ja Muhona, kutja mu jakure o ujere ua Muhona uetu Jesu Kristu. ¹⁵ Nu nambano, vakuetu, zikamee nu mu kakatere kozo mbazu ndu hongua, kutja o membo poo o no mbapira jetu. ¹⁶ Nambano Muhona uetu Jesu Kristu o muini na Mukuru, Tate uetu, ngue tu suverere ne tupe o mahuhumino nge karerera no maundjiro o maua mo tjari, ¹⁷ Nga huhumine na zeuparise o mitima vienu, mo tjiungura atjihe o tjiua na membo.