¹ Nunguari,vakuetu, matu mu tjivisa o tjari tja Mukuru tji tja jandjeua ko zokereka za Makedonia; ² Kutja mokati ko marorero o mengi uo zongondjero, o ndjoroka jao ndja Tanana nga tji ja tikatika no urekoto uo usiona uao ua takavarera ko mautumbe uo undjandje ua zo. ³ Orondu me hatoire kutja, otja ku imba puja ve pe uru, nu uina oku kapita puja ve pe uru, ovo va jandjere no mitima viao avihe; ⁴ No merijarikaneno o manene, ve rihekere kuete kutja tu jakure o tjijandjeua no ruuano ruo ku karera o vajapuke. ⁵ Nu kave tjitire otja ko maundjiro uetu, nunguari ovo ve rijandjere rutenga ku Muhona, na kuete mo mbango ja Mukuru ⁶ Nu ete opu tua rongera Titus kutja otja tja uta ko murungu, opa sere oku jenenisa o tjari tji kuene uina. ⁷ Nunguari ene otja tji mua tumbarisiua movina avihe, mo ngamburiro, na Membo, na mo ndjiviro, na mo upiueke mu avihe, na mo rusuvero ruenu kuete, mua soku tumbarisiua na mo tjari tji uina. ⁸ Hina ku hungira itji otja etuako, nunguari me kondonona o uatjiri uo rusuvero ruenu noku mu raisira o upiuke uo vakuenu. ⁹ Orondu mamu tjiua o tjari tjo Muhona uetu Jesu Kriste, kutja, nangarire Eje tja ri o mutumbe, kutja eje ua ririra ene o musiona kutja mo usiona Ue ene mu jenene oku ririsiua o vatumbe. ¹⁰ Nu me jandja o mazemburukisiro uandje mu itji; orondu o kokuua kuene, mbu mua uta otjina tji o mbura ndja zu ko kutja amu ha tjiti uriri nunguari mu kare no ndero joku tjita. ¹¹ Nunguari nambano jeneniseje oku tjita o tjina tji, kutja otja tji pa ri o upenda mo ndero, ngape kare o upenda moku mana, mu jandje oku za mu itji tji muna tjo. ¹² Orondu pu pena o mbango ndji mai zeri, mape jakurua otja ku itji o mundu the natjo, ku ku heri ku itji the hina tjo. ¹³ Kakutja o kutja o vakuenu ve puparisirue o hupo nu ene mu zeuparisirue o hupo; ¹⁴ Nunguari oku tekasanisa, kutja nai mo ruveze ndui o matakavarero uo vina vienu je urise o mauhepe uao, kutja o matakavarero uo vina viao je jenene oku urisa o mauhepe uenu. ¹⁵ Otja tji pa tjangua, Ingui ngua uongere o vingi ka hupisire, nu ingui ngua uongere o vititi ka hepere. ¹⁶ Nunguari okuhepa ku Mukuru ngua tua mo o upiuke o tjingeuo mu Titus oku vatera ene. ¹⁷ Orondu eje tjiri ua jakura o maningiriro uetu, nu mo upieke ue, eje ueja ku ene mo mbango je o muini. ¹⁸ Nu tua hindi o mukuetu ngu tangerua oku handjaura o Mbuze o Mbua mo zokereka azehe; ¹⁹ Nu ka itji poruatjo, nunguari eje uina ua toororua ijo zokereka oku rianga pueena ete, no tjijandjeua tji, tji tja uongua ijete mo ukarere ko ujere ua Muhona o Muini, nu otja o uhatoi uo upiuke uenu; ²⁰ Oku tjaera tji, kutja ape ha ningi o mundu ngu me tu vara o vanandjo mo utakavare uo vina mbi mbi takamisiua ijete; ²¹ Ondero jetu oku tjita o usemba, ku ku heri po murungu ua Mukuru uriri, nunguari uina po murungu uo vandu. ²² Nu tue ve hindire pueena o mukuetu ngu mu muna o upiuke ue mo vina o vingi, nu nai ma piuka tjinene tjinga ama tjiua o ngamburiro ndji mbi najo muene. ²³ Auhe ngua pura o hunga na Titus, eje o mukuetu nu o muungurire uenu pamue na ami; poo ohunga no vakuetu, ovo o vahindua vo zokereka, o ujere ua Kriste. ²⁴ Opu mua soku ve raisira o uhatoi uo rusuvero ruenu, no uo merihiviro uetu o hunga na ene po murungu uo zokereka.