¹ Orondu tu tjiua kutja o ndjiuo jetu jo kombanda jehi jo tjiranda tji tji ja haneua, tu na o ndungiro ndja za ku Mukuru, o ndjiuo ja aruhe mo majuru, ndji ha tungirue no make. ² orondu mu itji tu nona, ama tu zeri tjinene oku huikikua no maturiro uetu ngu ma je zu Mejuru, ³ Orondu tjiri tji tua huikikua jo, kanaa tu vazeua atu ri muzu. ⁴ Orondu ete mbu turi mo tjiranda tji tu nona, atua tjinda o uzeu, katu nonene kutja tu hukurue nunguari kutja tu huikikue, kutja itji o tjo ngokero tji ninue ijo muinjo. ⁵ Nambano ingui ngu ungura o tjina tji muete o Mukuru, uina ngu tu pa o Mbepo o tja o uhatoi uo vina mbi matu je ku peua. ⁶ Opu tua zikamena mo urizemburuka uetu, moku tjiua kutja, ngunda atu rim o nganda jo rutu, ngunda tu ri pendje na Muhona: ⁷ Orondu tu kaenda mo ngamburiro, ka tu kaenda noku muna. ⁸ Opu tua zikamena mo urizemburuka noku zera kutja tu tjinde mo nganda jo rutu, nu tu kare ko nganda pueena Muhona. ⁹ Opu tu kondjera kutja turire ovatjate ku Je, kutja tu ri mo nganda jo rutu poo tua tjindi mu jo. ¹⁰ Orondu atuhe tua soku je ku munika po murungu uo tjihavero tjo mbanguriro tja Kriste, kutja o mundu auhe a jakure o vina mbi mbia tji tua mo rutu rue, otja ko vitjitua vie, kutja o viua poo o vivi. ¹¹ Nu otja mbu tu tjiua o ndira ku Muhona, tu kondja oku zemburukisa o vandu; nunguari ete tua tjiukua ku Mukuru; nu uina mbina o ndero jo kutja tua tjiukua na mo urizemburuka uenu. ¹² Orondu katuna ku ri tjingisa kuene ku tja mu tu jakure rukuao, nunguari matu mu pe o ruveze kutja mu njandere ete, kutja mu kare nezirira ku imba mbe rihiva mo mbunikiro, ku ku heri mo mutima. ¹³ Orondu tjeri kutja ete tua vera o viuoze, tua verera Muhona, nu tji tuna o zondunge o zondjere, pa puira ene. ¹⁴ Orondu o rusuvero rua Kriste rue tu kovera, orondu ete pangura nai, kutja umue tja tira avehe, okutja avehe otji va ta; ¹⁵ Nu Eje ua tira avehe kutja imba mbena o muinjo ave he tji rihupire oveni, nunguari ve hupire Ingui ngue ve tira, nu ngua pendurua. ¹⁶ Nambano otji tu he tji tjiua o mundu otja ko njama, ii, nangarire tji tua tjivirue Jesu otja ko njama, ka tu tji mu tjiua nao. ¹⁷ Nambano tjipena auhe ngu ri mu Kriste, eje o tjiutua o tjipe; o vina imbi o vikuru via kapita, tara, o vina avihe via rire o vipe. ¹⁸ Nu o vina avihe o via Mukuru, ngua hanganisa ete kuena Je omuini mu Jesu Kriste, nungua jandja ku ete o tjiungura tjo ukarere uo mahanganisiro; ¹⁹ Otja Mukuru tja hanganisire o uje kueena Je mu Kriste, a ha varere o zongatukiro zao kuuo, nu a jandja ku ete indi embo ro mahanganeno. ²⁰ Nu nambano otja o vakuramene po va Kriste, tjimuna Mukuru aeri ngu me tu ungurisa oku ronga, matu rijarikana ku ene po riveze rua Kriste, kutja hanganisiuee kueena Mukuru. ²¹ Orondu Eje ua tjitire Ingui ngu ha tjivirue ko o uvi, oku ririra ete o uvi; kutja ete tu rire o usemba ua Mukuru mu Je.