¹ Indui o rutjatatu ami a me ja kuene. Mo tjinjo tja vevari poo vetatu embo arihe ma ri zikamisiua. ² Mbe mu raerere nai ko murungu, nu me mu raererepo, otja tji mba ri pueena ene o tjikando itjo tji tjavari, nu mu nai ambi he ri po. Me tjangere imba mba katukire hapo, na imba avehe mba seua po kutja tji me ja hina ku je ku muesa, ³ Otja tji mu zera oku muna o uhatoi uoku hingira kua Kriste mu ami, ngu heri o muhinamsa kuene, nunguari o munamsa mu ene, ⁴ Orondu nangarire Eje tja paperua ko tjikoroise mo ungundi, Eje nguari u hupa no masa ua Mukuru. Orondu ete uina tua ngundipara mu Je, nunguari matu kara no muinjo pueena Je no masa ua Mukuru kuene. ⁵ Rinongononeje oveni kutja mu ri mo ngamburiro; riroreje oveni. Poo kamu ritjiua oveni kutja Kriste uri muene, andu tji mu ri o vihahiziua? ⁶ Nu me kambura kutja mamu je ku tjiua kutja ka uete o vahahiziua. ⁷ Nunguari me kumbu ku Mukuru kutja amu ha tjiti o uvi. Ku ku heri kutja ete tu munike a tu ri o vanandengu, nunguari kutja ene mu tjite o uua, nangarire ete tji tu varua o vahahiziua. ⁸ Orondu tji tu hina masa uoku ruisa o uatjiri, nunguari tji tu ri o vo uatjiri. ⁹ Orondu ete matu joroka tji tu ri o vehinamasa nu ene amu ri o vanamasa. Nunguari uina tu kumbira tji, o mapuisiro uenu. ¹⁰ Opu me zu oku tjanga o vina mbi ngunda ambi he ri po, kutja tjaa tji mbe ja ngee rire o mutue ku ene otja ko uvara Mukuru mbue ndji pera oku tunga ku ku heri oku hana. ¹¹ Tjo maandero, vakuetu, jorokee. Ripuiseje oveni, rizeupariseje oveni, kareje nondunge imue, kareje mo hange. Nu Mukuru uo rusuvero no hange ma kara pueena ene. ¹² Minikasaneje no ruhupito o rujapuke. ¹³ O vajapuke avehe ve mu minike. ¹⁴ O tjari tjo Muhona uetu Jesu Kriste, no rusuvero rua Mukuru, no ruuano ruo Mbepo o Ndjapuke nga ru kare puena ene amuhe.