¹ Ami ka uami omuapostele are? Ami hi kutukire are? Ene ka uene otjungura tjandje mu Muhona? ² Tji mbi heri omuapostele ku varue, ku ene ouami omuapostele; Ouene otjikaneno tjo uapostele uandje mu Muhona. ³ E zirira randje ku imba mbe ndji kondonona orondi, ⁴ Ka tuna o uvara uo kuria noku nua? ⁵ Ka tuna uvara uoku hongorera omusukona, omukazendu omukupua, tjimuna ovaapostele varue, na imba ovamuangu va Muhona tji ve tjita, na Kefas? ⁶ Poo o Barnabas na ami uriri mbu tuhina uvara uoku kutuka ko viungura? ⁷ Ouani mo ruveze kaani ngu ungura otjo musorondate a me risutu omuini? Ouani ngu kuna otjikunino tjo mivite nu a ha riko ko tjihape tja tjo? Poo ouanu ngu risa o rupanda nu a ha nu omaihi uo rupanda. ⁸ Me hungire ovina mbi otja ko tjindu are? Poo o Veta ka ihungire ovina tjimuna mbi uina? ⁹ Orondu pa tjangua mo Veta ja Mose, “Ka muna ku kuta ko otjinjo tjo nduuombe ndji mai tatura ovikokotua.” Mukuru U tjevera ozonduuombe are? ¹⁰ Poo itji Eje Ue tjihungirira tjinene ku ete? Itji tja tjangerua ete, kutja ingui ngu ma kunu a kune ae no maundjiro, kutja ingui ngu ma tatura mo maundjiro a kare no maundjiro uoku kara no rupa mo tjihape. ¹¹ Tji tua kuna mu ene ovina vio mbepo, otjina otjizeu ku ene kutja tu teje muene ovina vio njama? ¹² Nu varue tji veva o uvara mbui kombanda jenu, ete katu sere oku kara nao tjinene? Nunguari ete ka tu ungurisire o uvara mbui, nunguari tua tjinda o uzeu no muretima, kutja atu ha rire otjiputarise ko Mbuze oMbua ja Kriste. ¹³ Ka mu tjiua kutja imba mbe ungurira mo vina imbio vijapuke ve hupa mo vina imbio vijapuke mo Ndemberi? Nu imba mbe ungurira pe zuko ro maningiririsiro ve ria mu imbio vie zuko ro maningiririsiro? ¹⁴ Mo muano orjingeuo Muhona ua zikamisa kutja imba mbe zuvarisa oMbuze oMbua ve hupisiue ijo Mbuze oMbua. ¹⁵ Nunguari ami hi ungurisire tjimue tjo vina mbi, nu uina hi mu tjangererere kutja pe tjitue nai ku ami; orondu mape ngara ku ami oku koka oku kapita omundu oku ungura omerihiviro uandje omungandjo. ¹⁶ Orondu nangarire tji mbi zuvarisa ombuze ombua, hina usemba uoku rihiva mu itji. Orondu ohepero ja ijti ja tuua kombanda jandje; Ii, nu ouee ku ami tji mbi hina ku zuvarisa ombuze ombua. ¹⁷ Orondu tji me tjiti nai nenjando mo mutima, mbi na otjisuta; nunguari tji me tjiti nai ambi hina ku vanga, ami mba peua o utakamise uo mbuze ombua. ¹⁸ Nu nambano otjisuta tjandje otjkuae? Kutja tji me zuvarisa oMbuze oMbua mbi tjite kutja oMbuze oMbua ja Kriste I kare noku hina tjisuta, kutja e ha ungurisa o uvara uandje mo Mbuze oMbua o u hazendu. ¹⁹ Orondu nangarire tji mbi ri omukutuke ku avehe, mbe ri ungura omukarere ua avehe, kutja mbi tuarere po ovengi ko ndjamo. ²⁰ Ko Vajuuta mbi kara otja oMujuuta, kutja mbi tuarere po oVajuuta ovengi ko ndjamo. Ku imba mberi kehi jo Veta mbi kara tjimuna ngu mbiri kehi jo Veta, kutja mbi tuarere po imba mberi kehi jo Veta ko ndjamo. ²¹ Ku imba mbri pendje no Veta mbi kara tjimuna ngu mbiri pendje no Veta (ambi heri pendje no Veta ku Mukuru, nunguari ambi ri kehi jo Veta ja Kriste), kutja mbi tuarere po imba mberi pendje no Veta ko ndjamo. ²² Ku imba ovingundi mbi kara otja otjingundi, kutja mbi tuarere po imba ovingundi ko ndjamo. Mbi rira ovina avihe ko vandu avehe kutja mo miano avihe mbi jenene oku tuara tjiva ko ndjamo. ²³ Itji mbi tji tjitira oMbuze oMbua, kutja mbi kare no rupa mu jo. ²⁴ Kamuna ku tjiua kutja ovandu tji mave tupuka mo tjikara ve tupuka avehe, nunguari umue uriri ongu peua o utoni uo tjihuze. Opu mua soku tupuka kutja mu tone. ²⁵ Nu auhe ngu ma kondjere o uroni u ritjaera ko vina avihe. Nambano imba ve tjita nai oku jakura otjihuze tjitji zundaka, nunguari ete tu tjitira nai otjihuze tji tji ha zundaka. ²⁶ Nu opu mbi ha tupukire otja omundu ngu hina ku tjiua. Nu opu mbi ha ruire otja omundu ngu ma tono ombepo. ²⁷ Nunguari mbi tindirisa orutu ruandje no matoneno, nu e ru jeta kehi jo mbango, kutja tjaa tji mbazu noku zuvarisira ovakuetu ami omuini e ha imbirahiua.