¹ Nambano ohunga no vina imbi mbi mue dnji tjangera: Okokuua omurumendu oku hina ku tuna ko mukaendu. ² Nunguari mena ro tuvakiro, omurumendu auhe nga kare no mukaendu ue, no mukaendu auhe nga kare no murumendu ue. ³ O murumendu ngua kupa nga jandje o tjari tji tja puira o mukaendu ngua kupua, no mukaendu ngua kupua uina nga tjite nao ko murumendu ue. ⁴ O mukaendu ngua kupua kena uvara kombanda jo rutu rue, nunguari o murumendu ue o nguna o uvara, nu mo muano o tjingeuo o murumendu ngua kupa kena uvara kombanda jo rutu rue o muini, nunguari o mukaendu ue o nguna o uvara. ⁵ Amu ruvaparerasana, andu kehi jo nduvasaneno mo karuveze ko kutja mu rijandje koku ritjaera ko vikuria noku kumba. Nu jarukee kumue rukuao kutja Saatana ehe mu roro ene tjinga mu ha jenene oku ritjaera orure. ⁶ Nu me hungire tji oku mu jandjera, nu nguari hina ku tji hungira otjo matuako. ⁷ Orondu ami ondero jandje okutja ovandu avehe andaku veri otja ami tjimbiri. Nunguari auhe una otjijandjeua tji the mu puira oku za ku Mukuru, unue otja komuano mbui, omukuao otja komuano mbuina. ⁸ Opu me tjere nai ku imba mbe hija kupua no vahepundu, okokuua tji va kara tjimuna ami. ⁹ Nunguari tji ve hina ku peura oku ritiza, nga ve kupue; orondu mape ngara oku kupa oku kapita oku rurumisiua ijo zonduma zonjama. ¹⁰ Nu ko vakupasane me rakiza nai (ka ami, nunguari o Muhona), o mukaendu kutja a ha hanika kuena o murumendu ue; ¹¹ Nunguari o mukaendu tji ma hanika, nga rire o mukombe uriri, poo nga hanganisiue kueena o murumendu ue. Nu o murumendu ka sere oku jesa o mukaendu ue. ¹² Nu ku imba ovarue maku hungire ami, ngu heri Muhona, Tji pena omukambure nguna omukaendu ngu ha itavere, no mukaendu ae no njune joku kara pueena je, e muesa. ¹³ No mukaendu nguna omurumendu ngu ha itavere, no murumendu ae no njune joku kara puenae, e muesa. ¹⁴ Orondu omurumendu ngui ngu ha itavere ngui ua japurua ijo mukaendu, no mukaendu ngu ha itavere ua japurua ijo murumendu; andaku kape ri nai ovanatje andaku va rira ovahakohoke, nunguari nambano ovajapuke. ¹⁵ Nunguari ingui ngu ha itavere tja kaenda, nga jesiue a kaende; o murumendu o mukambure poo o mukaendu o mukambure keri kehi jo mapando pu peri nao, nunguari Mukuru Ue tu isanena mo hange. ¹⁶ Orondu mo tjiua tjike, ove mukaendu, kutja ngahino mo je ku jama o murumendu uoje? Poo mo tjiua tjike, ove murumendu, kutja ngahino mo je ku jama o mukaendu uoje? ¹⁷ Nunguari otja Mukuru tja hanena ko mundu auhe, otja Muhona tja isana auhe, eje otja soku kaenda. Nu me zikamisa nao mo zokereka azehe. ¹⁸ Pena ngua isaneua aa sukara? Arire omuhasukarere. Pena ngua isaneua ae ha sukarere? A sukarisiua. ¹⁹ Omasukarekero katjina, nu oku hina ku sukarekua katjina, nunguari otjinandengu oku takamisa omatuako ua Mukuru. ²⁰ Auhe nga kare mo maisaneno inga nga isaneua mo. ²¹ Ua isaneua auri otjitikiha? Kapena umba, nunguari tjimo jenene oku kuturua, mape ngara oku tjita nao. ²² Orondu ingui ngua isaneua i Muhona aeri otjitikiha, omundu ngua kuturua i Muhona. Mo muano otjingeuo, ingui ngua isaneua aeri omundu omukutuke otjitikiha tja Kriste. ²³ Ene mua randua no ndengu, amu rire ovitikiha vio vandu. ²⁴ Vakuetu, omundu auhe pona imba pa isanenua, nga rire pa kara puena Mukuru. ²⁵ Nunguari ohunga na imba mbe hija tuna ko ruraro, hina marakiza oku za ku Muhona. Nunguari me jandja o umune uandje otja umue ngua jakura otjari ku Muhona tjoku rira omutakame. ²⁶ Opu me muine kutja okokuua, mena ro ngondjero ndji riko; kutja okokuua omundu oku kara nao. ²⁷ Ove ua kutua ko mukaendu? Opaha oku kuturua. Ove ua kuturua ko mukaendu? Opaha omukaendu. ²⁸ Nunguari tji ua kupu, ko katukire; omukaendu ngu hija tuna ko ruraro tja kupua, eje ka katukire. Nunguari imba mave kara no ngondjero mo njama, nunguari me mu jama. ²⁹ Nunguari itji me hungire, vakuetu, Oruveze orusupi. Paseua kutja imba mbe no vakaendu ve kare tjimuna mbe hina vo, ³⁰ Na imba mberi mo ruhoze ve kare tjimuna mbe heri mo ruhoze, na imba mberi menjando kutja ve kare tjimuna mbe heri menjando; na imba mbu mave randa ve kare tjimuna kavena tji vena tjo, ³¹ Na imba mbe ungurisa o uje mbui kutja ve kare tjimuna mbe he u ungurisire oku njona, orondu ongaro jo uje mbui mai kapita. Kapia? ³² Nunguari me zeri kutja amu ha kara no merikendero. Ingui ngu ha kupire u rikenda no vina imbi mbiri ovia Muhona, kutja ma jeta vi onjune ku Mukuru; ³³ Nunguari ingui ngua kupa u rikenda no vina vio uje, kutja ma jeta vi onjune ko mukaendu ue. ³⁴ Pena ohani pokati ko mukazendu ngua kupua no mukaendu ngu hija tjiua ovarumendu. Omukaendu ngu ha kupirue u rikendera ovina via Muhona, kutja a rire omujapuke mo rutu na mo mbepo. Nunguari ingui ngua kupua u rikenda no vina vio uje, kutja ma jeta vi onjune ko murumendu ue. ³⁵ Itji me tji hungirire ombuiro jenu, kakutja me vanga oku umba onguehe kombanda jenu, nunguari me hungirire itji tji tjiri otjisemba, no kutja mu ungurire Muhona noku hina ku taviza posio. ³⁶ Nunguari omurumendu tji ma munu kutja kena ku ritjinda naua puena omusokona ue ngu hija tjiua ovarumendu (eje tja kapita o majuva uo usukona ue, nu tjima munu kutja pena o hepero), nga tjite ombango je; kena ku katuka, nga kupe. ³⁷ Nunguari ingui ngua zikama mo mutima ue, ae hina hepero, nunguari nguna o uvara kombanda jo mbango je (nu ngua zikamisa mo mutima ue kutja eje ma takamisa oku hija tjiua o vakaendu kue), eje ma tjiti naua. ³⁸ okutja peri nai, ingui ngu ma jandja ko rukupo ma tjiti naua. Nunguari ingui ngu hina ku jandja ko rukupo ma tjiti naua oku kapita. ³⁹ Omukaendu ngua kupua ua kutua ijo veta kueena omurumendu ue ngunda ae no muinjo, nunguari omurumendu ue tja rara, u no ngutukiro jo ku kupua i kaani auhe ngu ma vanga, okutja ua soku kara mu Muhona. ⁴⁰ Nunguari otja ko uripura uandje, eje ma kara no ndjoroka tja kara nao uriri. Nu me ripura kutja uina mbina oMbepo ja Mukuru.