¹ Kongorereje orusuvero nu paheje ovina vio mbepo no minjo vienu avihe, nu tjinene kutja mu profete. ² Orondu ingui ngu ma hungire meraka tjandje kena ku hungira kueena ovandu, nunguari keena Mukuru. Orondu kapena ngu mu zuva, nunguari mo mbepo tjandje ma hungire oviundikua. ³ Nu ingui ngu ma profeta u hungira kueena ovandu oku ve tunga, oku ve zeuparisa noku ve huhumina. ⁴ Ingui ngu ma hungire meraka u ritunga omuini , nunguari ingui ngu ma profeta u tunga okereka. ⁵ Mbi zera kutja amuhe mu hungire mo maraka, nunguari tjinene kutja mu jenene oku profeta; orondu ingui ngu ma profeta omunene pu ingui ngu ma hungire mo maraka, andu tja mangurura omaraka kutja okereka i mune omatungiro. ⁶ Nunguari nambano, vakuetu, tji mbeja kuene ame hungire mo maraka me mu vatere na tjike, andu tji mba hungire kuene me vandururiro, poo mo ndjiviro, poo mo tjiprofeto, poo moku honga? ⁷ Orondu no vina mbi hina muinjo tji mavi pitisa omungunda, kutja ohiva poo otji harpe, tji vi hina ku jeta ohani mo mbosiro, ma ku tjiukua vi kutja ohiva poo otji harpe matji tono tjike? ⁸ Orondu uina ohiva tji ja eta ombosiro ndji ha kongomokere, ouani ngu me ri tunine ovita? ⁹ Okutja ene uina, tji mu hina ku jandja embo nda kongomoka meraka, itji tji matji hungirua matji tjiukua vi? Orondu tjandje mamu hungirire mo mbepo ndji singa uriri. ¹⁰ Muna omaraka omengi pekepeke mo uje, nu kapena rimue ndi hina tji ri heja. ¹¹ Nunguari tji mbi hina ku tjiua kutja ombosiro katjondumba i heja tjike, me rire o uozonganda ku ingui ngu ma hungire, nu ingui ngu ma hungire ma rire o uozonganda ku ami. ¹² Mo muano otjingeuo ene, otja tji mu zera no mitima vienu avihe ovijandjeua vio mbepo, kondjeje oku tunga okereka, kutja mu ningipare. ¹³ Okutja ingui ngu ma hungire meraka, otja soku kumba kutja e ri mangurure. ¹⁴ Orondu tji me kumbu meraka tjandje ombepo jandje mai kumbu nunguari ozondunge zandje tjandje kazena tji maze ungura. ¹⁵ Okutja vi nambano? Me kumbu no mbepo nu uina me kumbu no zondunge; me imbura no mbepo nu uina me imbura no zondunge. ¹⁶ Nu tjimo sere ondaja no mbepo, ingui ngu hina ndjiviro matja vi Amen, ko majandjero uoje uo ngdangi, eje tje hina ku tjiua mbi mo hungire? ¹⁷ Orondu tjiri ove tjandje mo jandja ondangi naua, nunguari omukuenu kena ku tungua. ¹⁸ Metja okuhepa ku Mukuru kutja mbi hungira mo maraka oku mu kapita amuhe; ¹⁹ Nunguari mo kereka mbi zera oku hungira omambo jetano no zondunge zandje, kutja uina mbi hongeo vakuetu, poku hungira omambo omajovi omurongo meraka ndi heiue. ²⁰ Vakuetu, amu rire ovanatje mo zondunge zenu, nunguari mo uvi kareje otja o unatje, nunguari mo zondunge zenu kengezee otjo vandu ovanene. ²¹ Pa tjangua mo Veta, “No maraka uarue, no mina viarue, Me hungire kueena ovandu imba, nu nangarire nao ovo kanaa ve Ndji zuu,” ma ku hungire Muhona. ²² Okutja omaraka ka tjisanekero ku imba mbe itavera, nunguari ku imba mbe ha itavere. Nunguari oku profeta ka ku tjitirua imba mbe ha itavere, nunguari ku tjitirua imba mbe itavera. ²³ Nambano okereka aihe tji ja uongarere pamue, nu avehe ama ve hungire mo maraka, nu imba mbe hina ndjiviro poo ovahakambure tji va hiti, kanaa ve tja mua vera oviuoze? ²⁴ Nunguari avehe tji mave profeta, nu omuhakambure umue poo umue ngu hina ndjiviro tje ja, eje me rivarisiua i avehe omunandjo na pangurua i avehe. ²⁵ Nu otja oviundikua vio mutima ue tji mavi vandururua, otji mau ondurumika na tanga Mukuru, na zuvarisa kutja tjiri Mukuru U ri mokati kenu. ²⁶ Nu nambano otjikuae, vakuetu? Tji mua uoronganene pamue, umue uenu una e pialme, omahongero, eraka, e vanduriro, e mangururiro. Ovina avihe ngavi ungurirue oku tunga. ²⁷ Nu umue tja hungire meraka, nga rire vevari poo tji veri ovengi vetatu, ama ve kongorasana. Nu umue nga mangurure. ²⁸ Nu tjipe hina mu mangurure, nga muine mo kereka, nu nge ri hungirire ku je omuini na Mukuru. ²⁹ Nu tji pena ovaprofete vevari po vetatu, ngave hungire nu umue nga kondonone. ³⁰ Nu tjimue tji tja vandururirua omukuao ngua haama mbo, ingui omutenga nga muine. ³¹ Orondu amuhe mamu jenene oku profeta ko umue umue, kutja avehe ve hongue nu ve zeuparisiue. ³² Nu ozombep zo vaprofete zeri kehi jombango jo vaprofete. ³³ Orondu Mukuru ka mute ue zunganeno, nunguari omute uo hange, otja mo zokereka azehe zo vajapuke. ³⁴ Ovakaendu venu ngave muine mo zokereka, orondu kavena ku jandjerua oku hungira, nunguari oku kara kehi jo mbango, otja indji oVeta uina tji mai hee. ³⁵ Nunguari tji mave zeri oku rihonga otjina atjihe, ngave pure ovarumendu vao ko nganda; orondu otji zepaisahoni omukaendu oku hungira mo kereka. ³⁶ Poo embo ra Mukuru ra pita mu ene? Poo re ja kuene uriri? ³⁷ Tji pena umue uenu ngu ripura kutja eje omuprofete, poo u kaenda mo mbepo, nga tjiue ovina mbi me tjangere ene, kutja ovio e tuako ra Muhona. ³⁸ Nunguari tji pena umue ngu hina ndjiviro, nga kare noku hina ndjiviro. ³⁹ Okutja, vakuetu, otji mua soku zera oku profeta, nu amu tjaere oku hungira mo maraka. ⁴⁰ Ovina avihe nga vi tjitue mo uhirona na mo ngaro ombua.