¹ Nambano ohunga no vijandjeua vio mbepo, vakuetu, hinee vanga mu kare noku hina ndjiviro. ² Mamu tjiua kutja mua ri ovo Viuana, a mua pukisirua ko visenginina oviuoro, otja tji ja mu nanua i vio. ³ Opu me mu tjivisire kutja kapena umue ngu ma jenene okutja, Jesu ua sengua, ama hungire mo Mbepo oNdjapuke, nu kapena umue ngu ma jenene okutja, Jesu oMuhona, pendje na tji ma hungirire mo Mbepo oNdjapuke. ⁴ Nambano pena ovijandjeua pekepeke, nunguari vi za mo Mbepo otjingejo. ⁵ Nu pena omaunguriro pekepeke, nunguari je za mu Muhona tjingeje. ⁶ Nu pena ovitjitua pekepeke, nunguari oMukuru otjingeje ngu ungura ovina avihe mu avehe. ⁷ Nunguari ombunikisiro jo masa uo Mbepo i jandjua ko vandu avehe ko mbuiro jetu atuhe. ⁸ Orondu mo Mbepo ku jandjeua ku umue embo ro unongo; nu ko mukuao embo ro ndjiviro, oku za mo Mbepo otjingejo; ⁹ Nu ko mukuao aku jandjeua ongamburiro ijo Mbepo otjingejo; nu ko mukuao a rire ovijandjeua vio ku verukisa ijo Mbepo otjingejo; ¹⁰ Nu ko mukuao a ku jandjeua ovitjitua vio masa; ko mukuao arire oku profeta; nu ko mukuao arire oku pangununa ozombepo; nu ko mukuao arire omaraka pekepeke; nu ko mukuao arire oku mangurura omaraka. ¹¹ Nunguari oMbepo otjingeje iumue nu U ungura ovina mbi avihe, ama hanene ku auhe otja ko mbango Je. ¹² Orondu otja indui orutu tji ru ri rumue, nu aruna ovinepo ovingi, nu ovinepo avihe vio rutu nduo, na tji viri ovingi, tji viri orutu rumue, Kriste uina u ri nao. ¹³ Orondu uina mo Mbepo imue tu tutumikua mo rutu rumue, kutja oVajuuta poo oVahirika, kutja ovakarere poo ovakutuke, avehe va peua oku nua mo Mbepo imue. ¹⁴ Orondu orutu ka tjinepo tjimue, nunguari ovinepo ovingi. ¹⁵ Nu indji ombaze tji ja tja, mokutja ka uami eke, hi kanepo ko rutu; ojo opu i na ku rira okanepo ko rutu are? ¹⁶ Nu ingui okutui tji kua tja, mokutja ka uami eho, hi kanepo ko rutu; okuo opu ku hina ku rira okanepo ko rutu are? ¹⁷ Nu andaku orutu aruhe eho, oku zuva itja ku kara pi? Nu andaku orutu aruhe oku zuva, oku nuka itja ku kara pi? ¹⁸ Nunguari nambano Mukuru ua zika ovinepo, atjihe tja vio, mo rutu otja pa vanga. ¹⁹ Nu andaku avihe otjinepo tjimue, andaku orutu ru ri pi? ²⁰ Nunguari nambano ovinepo ovingi, nu indui orutu i rumue. ²² Kako, nunguari tjinene o unepo uo rutu imbui mburi tjimuna o ungundi tjinene o una hepero. ²³ Nu ovinepo vio rutu imbi mbi tu ripura kutja kavina ndengu, ombi tu tuako ondjozikiro onene oku kapita. Nu ovinepo vietu imbi mbi heri oviua tu vipa o ndengero onene, ²⁴ Orondu ovinepo vietu imbi oviua kavi hepa o urenga, nunguari Mukuru Ua uaneka orutu kumue nai, nu A jandja ondengero onene ko vinepo imbi mbi i hepa; ²⁵ Kutja ape ha kara omapirukirasaneno mo rutu, nunguari kutja ovinepo vi kare no ndjeverero ndja sana, atjihe ko tjikuao. ²⁶ Nu otjinepo atjihe tji matji hihamua, ovinepo avihe vi hihamua pueena tjo; nu otjinepo tjimue tji tja peua o ndjozikiro, ovinepo avihe vi njanda pueena tjo. ²⁷ Nu o uene orutu rua Kriste, nu o uene ovinepo mo rupa rumue. ²⁸ Nu Mukuru ua zika mo kereka, rutenga ovaapostele, orutjavari ovaprofete, orutjatatu ovahonge, kuzambo ovaungure vo vitjitua vio masa, kuzambo ovijandjeua vio ku verukisa, ozombatero, o unane, no maraka pekepeke. ²⁹ Avehe ovaapostele are? Avehe ovaprofete are? Avehe ovatjite vo vitjitua vio masa are? ³⁰ Avehe vena ovijandjeua vioku verukisa are? Avehe ve hungira mo maraka are? Avehe ve mangurura omaraka are? ³¹ Nunguari kondjeje tjinene oku muna ovijandjeua imbi mbi mavi ngara. Nu nambano me mu urikire ondjira ombua tjinenenene.