¹ Nu vakuetu, hina ku vanga kutja amu ha tjiua kutja oo tate vetu avehe vari kehi jo tjikamba, nu avehe va kondere omuronga. ² Nu avehe va papitisirua ku Mose mo tjikamba na mo muronga, ³ Nu avehe va rire ovikuria vimue vio mbepo, ⁴ Nu ovo va nua omavinu jemue uo mbepo; orondu ovo va nua Meue ro mbepo nde ve kongorerere, Nu Eue indo ra ri Kriste. ⁵ Nunguari Mukuru ka karere no njune mo vengi vao, otji va rimbarisiua mo kuti ongaango. ⁶ Nu ovina mbi via tjitirua otjizemburukisiro ku ete, kutja atu ha kara no zonduma zouvi, tjimuna ovo tji va karere na zo. ⁷ No kutja atu ha rire ovanavisenginina tjimuna tjiva vao tji vari, otja tji pa tjangua, “O vandu va haamene pehi oku ria noku nua, tjazumba ave sekama oku njanda.” ⁸ No kutja atu ha vakirasana, otja tjiva vao tjija ve vakirasana, no majovi omirongo vitatu na vetatu a veu me juva rimue. ⁹ Poo oku rora Kriste tjimuna tjiva vao uina tji ve Mu rorere, nave njonua ijo zonjoka. ¹⁰ No kutja atu ha unauna tjimuna tjiva vao tji va unauna, nave njonua ijo tjinjone. ¹¹ No vina mbi avihe via tjitua kuvo otjo visanekero; nu via tjangerua oku ronga ete mbu tua raukirua ijo maandero uo uje. ¹² Ingui ngu ma tjangovasi ua kurama nga takamise tjaa ngaa u. ¹³ Kapena marorero nge ere kombanda jenu pendje na inga nge ja ko vandu hapo; nunguari Mukuru omutakame, ngu hina maa jandjere kutja mu rorue oku kapita pu mamu pe uru, nunguari pueena inga omarorero Eje ma tuapo ondjira joku hena, kutja mu jenene oku je tuurunga. ¹⁴ Vasuverua vandje, opu muaso ku tira namu tupuka kokure no merikotameneno uo visenginina. ¹⁵ Me hungire otja ko vandu ozonongo; ripangurireje tji me hungire. ¹⁶ Ekopi ro ndaja ndi tu sera ko ndaja, ka ruuano ruo mbindu ja Kriste? Omboroto ndji tu kojora, ka ruuano ruo rutu rua Kriste? ¹⁷ Orondu ete na tji turi ovengi, o uete omboroto imue, orutu rumue; orondu atuhe tuna orupa mo mboroto imue. ¹⁸ Tareje o Israel indji ojo njama: Imba mberia ozonjama zo mbunguhiro uina kavena rupa mezuko ro maningiririsiro? ¹⁹ Me hee kutja vi nambano? Kutja otjisenginina otjina, poo ombunguhiro jo visenginina otjina? ²⁰ Nunguari me tja ovina oviuana mbi vi punguha, vi punguhira ozombepo ozombi, nu kavi punguhirua Mukuru. Nu hina ndero jo kutja mu kare no ruuano no zombepo ozombi. ²¹ Kona ku nua ko ekopi ra Muhona ne kopi zo zombepo ozombi; nu kona ku ria ko ko tjitihe tja Muhona na ko tjitihe tjo zombepo ozombi. ²² Poo matu vanga oku zepaisa Muhona o ukoze? Tuna omasa oku mu kapita are? ²³ "Otjinatjihe otjijandjerua," nu ka atjihe otjinahepero. "Otjinatjihe otjijandjerua," nu ka atjihe otjitunge tjo vandu. ²⁴ Ape ningi o mundu ngu ma tarere ko hepero je o muini, nunguari nga tarere ko jo mukuao. ²⁵ Riee otjina atjihe tji matji randisiua ko marandero uo zonjama, amu hina ku pura omapurira oku tjevera omaurizemburuka uenu. ²⁶ “Orondu ehi arihe o ra Muhona, na imbi avihe mbi ri muro.” ²⁷ Tji mua nangua ko mukandi I umue ua imba mbe ha itavere, nu tji mamu vanga oku jenda, riee otjina atjihe tji tja tuua po murungu uenu, amu hina ku pura omapurira oku tjevera omaurizemburuka uenu. ²⁸ Nunguari omundu tja tja nai ku ene, “Itji tja zepirua oku punguhirua ovisenginina, amu ri mena ra ingui ngue tji horora, noku tjevera omaurizemburuka ue; orondu ehi o ra muhona na imbi avihe mbi ri mu ro.” ²⁹ Metja mo tjimbe tjo urizemburuka uo mukuenu mbu heri o uoje. Orondu onguae ongutukiro jandje tji ja soku pangurua ijo urizemburuka uo mukuetu? ³⁰ Orondu onguae ami tjime ri motjari, onguae tji mba soku ripurirua ijo mukuetu o uvi mo tjina tji mba tjere okuhepa? ³¹ Opu muaso kutja mu tji ma mu ri noku nua, poo mu itji atjihe tji mamu ungura, mu tjitire atjihe o ujere ua Muhona. ³² Amu tjiti ombutarisiro, nangarire ko Vajuuta, poo ko Vahirika, poo ko kereka ja Mukuru; ³³ Tjimuna ami tji mbi ka nonjune ko vandu avehe mo vina avihe, ambi hina ku paha ombuiro jandje, nunguari ame paha ombuiro jo vengi, kutja ovo ve jamue.