¹ Abisolome o mwana Davida mwana kwata manthaye noku wapa e lithina lyae neli Tamare oyo Amnoni o mwana Davida kame mwana muwapela ngao a mu pilule mukathaye. ² Amnoni mwana ku komokela yonene ngao mane no kola kabakala manthaye Tamare.Tamare neli kaombeli wambula ku limuka kale mulume mane mono ku monala ku kalupa kwa Amnoni ngao a twese ku mu tenda sinu. ³ Kono Amnoni no kwata mwonyi waye no lithina lya Jonadabi o mwana Shimea, o mu kulwa Davida. Jonadabi neli mulume wa utali. ⁴ Jonadabi keo o ambela Amnoni ngao, ''Ike, owe ambu o mwana Mulena, wa monala ku yonda ngeyo? O ni ambele?'' Kona kuli Amnoni keo o alaba ngao, ''Na wapela Tamare, o mantha mi nange Absolome.'' ⁵ Jonadabi keo o ambela Amnoni ngao, ''O lale pa ulalo woye na u kwo ngisa oku kola. Apa iwoye awiya kuku mona, o mu lombe ngao, 'Mu tume manthange Tamare awiye ani telekele isima kuno ni mona ngao nga twese ku ni lisa na makaa aye?'' ⁶ Kona kuli Amnoni keo o lala na ku kwongisa oku kola. Apa Mulena na wiya kumu lekula, Amnoni no ambela Mulena ngao, ''Na lomba mu tume manthange Tamare ku wiya ku ni tendela isima pano ni kola kuno ni mu mona yotha naku teleka ngao nga ni lise na makaa aye.'' ⁷ Davida keo o isana Tamare ku wiya ku muleneñi, naku mwambela ngao, ''O the pano kwa manthoye Amnoni ku nthuwo thaye ngao oka mu tendele ya kulya.'' ⁸ Kona kuli Tamare keo otha ku nthuwo tha Amnoni na uka mu wana ngao ona lala. No shimba o unga ku uluba naku tenda sinwa kuno yo mona, naku tateka ku pona singwa. ⁹ Tamare keo o shimba e pani ku thi telula naku shimba e singwa ku sipa Amnoni, kono no kana kulya. Amnoni keo o ambela a kwaye na waniwa omo ngao, ''Mwende panthi, mu tunde muno.'' Kona kuli a kwaye keo a paena panthi ku mu siya. ¹⁰ Amnoni keo o ambela Tamare ngao, ''O ni letele eyo no kulya muno mu mu siyo wange ngao ni wiye ni lyele mu makaa oye.'' Tamare keo o twaela Amnoni o mathaye e singwa na tenda mu musiyo . ¹¹ Apa naka mu ku misetha, Amnoni keo o kwata Tamare naku mwambela ngao, ''O wiye, manthange o lale nage.'' ¹² Tamare keo o mwalaba ngao, ''Ina kana, manthange, kona ni tundanisa, kakuli eyi no kwikala ngeya ko i swanela ku tendala muno mu Isilaele kao.Kona tenda eyo no ku bangauka ngeyo! ¹³ E lishamwa lyange moni li twala kupi? Oweni? Nawe mo piluka o mweya no anu awo no ku bangauka mu Isilaele! O ambele Mulena, kakuli ka twese ku kwindeka ome kao.'' ¹⁴ Kono shiwa ngeyo, Amnoni no imwa ku mu tethetha, kame kakuli mwana kwata mataa ku mu pita, no mu tunda nisa mane ku pitela e lala naye. ¹⁵ Amnoni keo popo o thimba Tamare yonene. Mwana mu thimba na si thimbo sa ku pita na lilato elyo na mu wapela nlyo pa utangi. Amnoni keo kame o mwambela ngao, ''O imanne othe.'' ¹⁶ Kono Tamare keo o mwalaba ngao, ''Nje! Kakuli e sibi noku ni chitha sa nenepa ku pita eyo na ni tende.!'' Kono Amnoni no imwa kame ku mu tethetha. ¹⁷ Kono keo, o isana o mupika waye na kwamba ngao, ''O chithele oyu mukathi panthi a tunde o kwange, kame o pate e sikwalo kuni patela mushi.'' ¹⁸ O mupika wa Amnoni keo o chithela Tamare panthi naku pata e sikwalo. Tamare mwana ku manga sito sa mi bala bala kakuli ana Mulena no a lanjo mwana ku manganga ya ngeyo. ¹⁹ Tamare mwana ku wesa makala na mu twitwi ku mutwi waye naku yataula e siapalo saye. Mwana ku kumbatela kuno yo na paka e likaa lyae ku mutwi na kwenda kuno yo tha naku lila. ²⁰ Abisalomi o manthaye keo o ipula Tamare ngao, ''Ngao Amnoni o mathoye mwana ku lala ndi? Kono o mwene eni ,manthange. Kakuli manthoye. Kona filikanisa o muchima woye na yambo no ngeya.'' Kona kuli Tamare keo otha ku ke kala ku nthuwo tha Abisolomi. ²¹ Kono Mulena Davida apa nayuba ngeyo, mwana lwana yo nene. ²² Abisolomi no imwa kwamba sinu siwa kapa si nyangunyu kwa Amnoni, kakuli Abisalomi mwana mu thimbela eyo na tenda kwa manthaye mane nomo ana swabisethe mathaye Tamare ku muntha. ²³ Apa noku pita ilimo ili Abisolomi no wiya ku kwata a beleki noku lendanga angu ao na sebethanga mu Baale--Hazori ,pepi na litunga lya Efraimi, mane Abisolomi keo o isaena ana Mulena oshe ngao athe aka pote. ²⁴ Abisolomi notha kwa Mulena ku kamba ngao, '' O mone ngeno o mu pika woye seli a kwata a beleki aku lendanga angu. Na lomba ngao Mulena na apika aye a ende nange, ome no mupika woye.'' ²⁵ Mulena keo o alaba Abisalomi ngao, ''Nje, mwanange, toshe mona tuthela nga mo tuka paka mupango unene.'' Abisalomi keo o lomba Mulena ngao athe, kono Mulena no imwa kwitana , kono mwana mu fuya wetha ambu. ²⁶ Abisalomi keo o amba ngao, ''Ndi kothi kao, mu kulwange Amnoni keo athe netu.'' Kona kuli Mulena keo o mwipula ngao, ''Amnoni mwathela ike noye?'' ²⁷ Abisalomi no tunda mena Davida, mane keo o itanisa Amnoni na ana Mulena oshe kutha naye. ²⁸ Abisolomi keo o laula a pika aye kwambela ngao, ''Mu tethethe siwana. Apa Amnoni a kalisa ku penda o veine, mane apa ni miambela ngao, ' Mwipaye Amnoni,' keo mu mwipaye. Komu ne yapa. Kandi kome yonyiko ni miambela ngeyo kao? Mu ku tiise mu tende naku tiya e michima.'' ²⁹ A pika a Abisalomi na tenda ngeyo kwa Amnoni kutha nomo na alaulela mwolyoo.Ana Mulena oshe keo emana, na munu namunu ku yombokela pa mbongolo waye na ku lupuka. ³⁰ No ku yubala, kuno nana Mulena a ili mu nthila, ngao e liñusa keo li ka kuma kwa Davida kwamba ngao, ''Abisalomi one paa ana Mulena oshe, mane ko kwa ipanduka shiwa o mweya kao.'' ³¹ Mulena keo o imana na ku yataula e ikumango yaye , na ku lala pashi , a pika aye oshe keo eya kwimana pepi naye kuno nao ana yataula e iku mango yoo. ³² Jonadabi o mwana Shimea, o mu kulwa Davida, no alaba na kwamba ngao, ''Mwolyange kana yuba eyi no kwamba ngao anaye oshe no alume ane paiwa, kakuli Amnoni yo fochi ambu yone paiwa. Abisalomi mwana tha naku saelelanga mwa ku tendela uyi ku tundela apo Amnoni na tenda manthaye Tamare o unyangunyu. ³³ Kona kuli mwolyange Mulena kana ku paka ou mwambelo ku muchima, naku kengela ngao mwendi ana Mulena oshe a nafu, kakuli Amnoni ambu yo fochi yo ne paiwa.'' ³⁴ Abisalome keo o ituka. O mu pika no mu libelela no mu limukisa apa na mona anu angi a wiya mu nthila no neku no mwika liwa no li lundu oku ne kaela. ³⁵ Jonadabi keo o ambela Mulena ngao, ''O mone ana Mulena aya a wiya ngeya. Kwe kala weti muya o mu pika woye anambele. ³⁶ Apa na mana kwamba ngeyo, ana Mulena keo nao a wiya ku kuma naku nanula a mai oo kuno atha naku lila.Mulena na anaye oshe keo a lila ku bokola. ³⁷ Kono Abisalomi oye keo o itukela kwa Talimai o mwana Amihuri . o Mulena wa Geshuri. Davida mwa natha naku lila mwanaye liwa na liwa. ³⁸ Kona kuli Abisalomi keo o lupuka na kwi tukela kwa Geshuri, na uke kalako ilimo yatu. ³⁹ Mulena Davida mwana shukela Abisalomi kakuli mwa na ngwa o mu chima kabakala Amnoni mane na lifu lyaye.