¹ Apa o mwaka no upwa, mwetho nako a malena na thanga ku ndwa, Davida no tuma Joabi, na apika aye, mane na ita yoshe ya Isilaele. Mwana ka yundisa ana oshe a Amoni na ku ka thinguluka Raba mu kachi. Kono Dvida oye mwana siala mu Jerusalema. ² Mu liwa limweya e singola ngola apa Davida na inguka pa ulalo waye no thina kwenda enda pa mwongola no mulenen'i waye. Yoli ngeyo peulu no mona o mukathi yoli sheshe yotha naku ku kusha, oyo mukathi mwana monala uwa. ³ Davida keo o tuma na kwipula a na twesa ku limuka oyo mukathi. O mweya no alaba ngao, ''Ka Bati-sheba o mwana Eliami, kame kayo mbiyama Uria no Muhiti oya kao?'' ⁴ Davida keo o tuma anu na ku ka mushimba; no ingena ku wiya o kwaye, mane keo o lala naye kakuli mwana tundela kuka ku kusha ku mathilo no kwethi. No ku thika ku uka ku nthuwo thaye. ⁵ Oyo mukathi keo o lemupa, naku tumena ku ka limukisa Dvida, kwamba ngao, ''Ina lemupa.'' ⁶ Keo Davida o tumena Joabi ku mwambela ngao, ''O ni tumene Uria o Muhiti a wiye.'' Kona kuli Joabi keo o tumena Uria kwa Davida. ⁷ Apa Uria naka kuma, Davida keo o mwipula Joabi ngao o nenguka ngepi, e ita ya ikala ngepi, mane nomo e ndwa thi lweliwa. ⁸ Davida keo o ambela Uria ngao, ''O the ku nthuwo thoye oka ku kushe ku mahulu.'' Kona kuli Uria keo o siya Mulenen'i , naye Mulena keo o tumisa e mpo kwa Uria mu manyima yo mana ku funduka. ⁹ Kono Uria oye koe o lala pa selo no lilapa lya Mulena pa mweya na apika oshe a mwolyaye, mane no imwa ku shelumuka ku nthuwo thaye. ¹⁰ Apa anu na tonwela Davida ngao, ''Uria na imwa ku shelumuka ku nthuwo thaye,'' Davida keo o ambela Uria ngao, ''Kandi kowa iwiya ku pota kao? Ike apa ona kana ku shelumuka kutha ku nthuwo thoye?'' ¹¹ Uria keo o alaba Davida ngao, ''E Aleka, na ana Isilaele, na ana Juda a kwontha mu munganda, mane na mwolyange Joabi na apika a mwolyange oshe a kwontha mu lyalaupa. Kona kuli mo ni twesa ngepi kutha ku nthuwo thange ku kalya na ukanwa mane na uka lala kwa mbiyama wange? Kutha na upilo woye na moyo woye noku yoya, ko ni twesa ku tenda ngeyo kao.'' ¹² Davida keo o ambela Uria ngao, ''O tomane kuno pelo na peuntha mo ni kwambela ngao o ende.'' Kona kuli Uria keo o tomana elyo liwa neli no litatama. ¹³ Apa Davida na mwisana, no wiya ku lya na kunwa kuno yo mona, mane Davida no twesa ku mu nwisa. E singola ngola Uria notha ku ka lala pa ulalo waye pa mweya na apika a mwolyaye, no imwa kame kutha ku nthuwo thaye. ¹⁴ Kona kuli a ma siku siku Davida no n'olela Joabi lin'olo , naku li tuma ku lipa Uria. ¹⁵ Davida no n'ola omo mu lin'olo kwamba ngao, ''Mu pake Uria poso oko e ndwa thi tiya yonene, mane keo ngo mu mulupuke ku mu siya yo fochi, ngao nge paiwe.'' ¹⁶ Kona kuli kutha na mwambelo owo Joabi no topela siwana o mu lwelo no u munthi, no laula Uria kwi mana ku lwela mu sibaka eso na limuka ngao a lume no ila no ku tiya mo nyiko a wiya ku lwela. ¹⁷ A lume no munthi apa na tha na uka lwisa e ita ya Joabi, a mweya ku masole a Davida keo a ngwa, na Uria o Muhiti keo naye o ipaye liwa apo. ¹⁸ Apa Joabi na tuma e lin'usa kwa Davida ku mu limukisa eyi no ndwa, ¹⁹ no laula anu, kwamba ngao, ''Apa mu mana ku tonola yoshe no ndwa kwa Mulena, ²⁰ mwendi moku kwi kala ngao Mulena mwa lwana, naku miambela ngao, ''Ike apa muna shenyene pepi na munthi kuno mutha na kulwa? Ko mwa ilimuka ngao mwa miyana ku tundela peulu no limota kao? ²¹ Kandi ani oyu no ipaa Abimeleki o mwana Jerubosheti? Ka nga mu neli mukathi yono yaa e liwe noku nonga ku tundela peulu no lilapa kao, kona kuli keo o fela mu Tebeti? Ike apa no mu shenyena pepi na limota?' Keo mwalabe ngao, o mupika woye Uria kame naye o nafu.'' ²² Oyo no tumiwa keo o funduka ku twala e yambo kwa Davida eyo na mu tumena Joabi ngao a kambe. ²³ O yo no tumiwa no ambela Davida ngao, ''Oyu no sithimbo setu mwana tu nenepele kutu pita pa ma tatekelo, mwana twiyele ku panena mu liyungu, kono otwe keo twa undula kwausa mu manyima ku mengeno no selo. ²⁴ Keo a no kutha naku yaa a yaa a masole oye ku shulumuna peulu no limota, mane a mweya kwanu a Mulena keo e paiwa, na mupika woye Uria no Muhiti naye keo one paiwa.'' ²⁵ Davida keo o ambela oyo no tumiwa ngao, ''Oka ambele Joabi ngao, 'Kana ku komokela, ka kuli lyonga lye paanga munu o mweya kame na mu kwaye. A tiisethe oku lwela o munthi, mane au twese,' kame oka mu tiise nao mai. ²⁶ Kona kuli o mbiyama Uria apa na yuba ngao mu kwanthu waye onafu, no lila yonene mukwanthu waye. ²⁷ E sililo saye apa no sipwa, Davida no mu tumena anu naku mu leta ku nthuwo thaye mu mulenen'i, na uka piluka mbiyama waye naku mwelekela mwana wa mulume. Kono eso na tenda Davida no si imwa ku wapelisa Minya moyo.