Capítulo 7

1 Ja̧'hua̧nö̧ ja̧'a̧ Tu̧ru̧hua̧ Dios Moisésrö pä'inödo: Ttötä ucuru huȩdä̧cua̧sä̧ Egipto rȩjȩ ru̧hua̧rö̧. Ttö jȩcha̧ji ̧ juäimä o'ca juiyönä ucutä jȩcu̧'a̧nö̧ ja̧'a̧. Ja̧'hua̧ta̧nö̧ cuböo Aarónmä ucu cuihuȩnȩ jiäcuähuä isa̧ päi'önä ö̧jä̧cua̧. Ya̧tȩ Ttö Chihuȩnȩ jiäcuähuä isa̧ jä̧'inö̧'a̧nö̧ jö̧nä̧ ö̧jä̧cua̧ ja̧u̧mä̧, ucu cuihuȩnȩ jiähuomenä ru̧hua̧rö̧. 2 O'ca juiyönä huedömä, cuböo Aarónrö cu̧cuo̧cuä̧cua̧jä̧. Ja̧'hua̧ta̧nö̧ chutä Aarónmä Egipto rȩjȩ ru̧hua̧rö̧ u̧cuo̧cuä̧cua̧, iŗ ȩjä̧ttö̧ Israel ttö̧ja̧ rättopa'anä ja̧'a̧tä̧ toa pä'ö. 3 Ja̧'hua̧nö̧ ja̧'a̧nä̧ ttötä Egipto rȩjȩ ru̧hua̧ esetö juiyönä öaroda pä'ö jȩchä̧cua̧sä̧, ttö̧ja̧ tottocö juäi rö̧ȩnä̧ chijȩpa̧ pä'ö Egipto rȩjȩnä̧. 4 Egipto rȩjȩ ru̧hua̧mä̧ ucuturu esetocö jä̧cua̧. Ja̧'hua̧nö̧ ja̧'a̧ttö̧ Egipto rȩjȩmä̧ pä̧icu̧nä̧ chujurunä ro̧dȩpä̧cua̧sä̧, chumöhuäyotö Israel ttö̧ja̧rö̧ Egipto rȩjȩttö̧ rä'epö chicua pä'ö. 5 Ja̧'hua̧nö̧ Israel ttö̧ja̧rö̧ Egipto rȩjȩ ttö̧ja̧ ttö̧'quȩtȩttö̧ chujurunä rä'epö chicuomenä, jahuätö ttörö ttu̧huo̧juä̧cuo̧tö̧ Cu̧ru̧hua̧tu̧cu̧mä̧ kö̧ pä'ö pä'inödo Tu̧ru̧hua̧ Diosmä Moisésrö. 6 Ja̧'hua̧nö̧ ja̧'a̧ Moisés'inä, Aarón'inä Tu̧ru̧hua̧ Dios hueäji ta'anö jȩpinä̧tö̧do. 7 Egipto rȩjȩ ru̧hua̧rö̧ ttucuocuinö pä̧nä̧, Moisésmä ochenta a̧'ȩ ku̧nä̧rinö̧do. Aarónmä ochenta y tres a̧'ȩ ku̧nä̧rinö̧do. 8 Tu̧ru̧hua̧ Dios Moisésrö'inä, Aarónrö'inä ucuocu pä'inödo: 9 Egipto rȩjȩ ru̧hua̧ ucuturu huȩä̧cua̧ ttö̧ja̧ tottocö juäi jȩcu̧'ätu̧cua̧ pä'ö. Ja̧'hua̧nö̧ hueomenä, ucumä Aarónrö päcuhuaja: “Cuitta'ca ȩmo̧po̧'ö̧, rȩjȩ icui” pä'ö, Egipto rȩjȩ ru̧hua̧ ä'ca jo̧mȩttö̧, äca päi'a pä'ö― pä'inödo Dios. 10 Ja̧'hua̧nö̧ ja̧'a̧ Moisés'inä, Aarón'inä Egipto rȩjȩ ru̧hua̧rö̧ ucuocu 'chä̧nö̧, Tu̧ru̧hua̧ Dios hueäji ta'anö jȩpinä̧tö̧do. Aarónmä, Egipto rȩjȩ ru̧hua̧ ä'ca jo̧mȩttö̧'inä̧, ja̧'hua̧ta̧nö̧ ippeye ruhuotö ttä'ca jo̧mȩttö̧'inä̧ itta'ca icuomenä, äca päi'ina'ado. 11 Ja̧'hua̧nö̧ päi'omenä, Egipto rȩjȩ ru̧hua̧ umöhuäyotö huo̧juä̧huä̧ ttö̧ja̧'inä̧, mä̧rimö̧rö̧'inä̧ tticha pä'ö huopinödo. Jahuätö ttichomenä, ja̧u̧tä̧ juäi jȩpinä̧tö̧do ttumäri'ä jähuänä. 12 Ya̧tȩ pö̧nä̧ ttitta'ca rȩjȩ tticuomenä, ä̧ca̧tö̧ pä'i'inätödo. Ja̧'hua̧nö̧ ja̧'a̧nä̧ Aarón itta'cattö äca päi'äjimä korotö ttitta'quiyuttu ä̧ca̧tö̧ pä'i'äjätörö rahuädi'ina'ado. 13 Ja̧'hua̧nö̧ ja̧'a̧ topö, Egipto rȩjȩ ru̧hua̧ jarodi'inödo, Moisésrö'inä, Aarónrö'inä ä̧ju̧cu̧ juiyönä, Tu̧ru̧hua̧ Dios päji ta'anö. 14 TÖ̧Ä̧NÄ̧HUA̧MÄ̧ pä'inö̧ Moisés-rö:

"Faraón a̧mi̧'iso'quinä̧mä̧ 'qui'ädäcuähuö ja̧'hua̧nö̧ jä̧cu̧ ttö̧ja̧rö̧ rä'epö icuamä pä'ocö.

15 Yo̧ä̧i̧ mo̧ro̧ päi'a'a to'cu'ajä̧ ajera̧'a̧ i̧mȩyȩhuo̧mȩttö̧. Tta̧cuä̧rä̧tu̧cua̧rö̧jä̧ jäyoto ka̧cu̧, to'cuäcuähuarö, ja̧'hua̧ta̧'a̧nö̧ ȩpi̧ i̧so̧'que ä̧ca̧nä̧tä̧ pärohuächönä̧ jȩ'cui̧no̧'que. 16 Ja̧u̧rö̧mä pä'ätucui: “TÖ̧Ä̧NÄ̧HUA̧, hebreos ttö̧ja̧ Ttö̧ä̧nä̧hua̧ Diosmä̧, hueäjäcusä pi̧yȩ jidähuacu pä'ö: Chömöhuäyotö rättopa'anä̧ ja̧'a̧tä̧ topi, ttörö ucuo te'äu tti̧'cha̧'a̧nä̧ de'a jui̧yä̧jä̧ra̧'a̧ttö̧. Jitära̧'a̧ jubö päi'önä̧ ucumä ä̧ju̧cuo̧cö̧jä̧.

17 TÖ̧Ä̧NÄ̧HUA̧MÄ̧ pi̧yȩ pä'ötó: Pi̧yȩnä̧ cu̧huo̧juä̧cuo̧tö̧jä̧ TÖ̧Ä̧NÄ̧HUA̧ ja̧'a̧ pä'ömä. Ttömä Nilo ajenä chu̧mö̧nä̧ 'chu̧dä̧ro̧'quȩ cuädepäcua̧sä̧ ja̧'hua̧nö̧ cuädepomenä̧ a̧ji̧ya̧mä̧ ttucuojatä jönä pärohuächi'äcua'a.

18 Po̧i̧ ajenä rö̧jä̧tö̧mä̧ 'corujuottähuäcuotö, ja̧'hua̧ta̧nö̧ ajemä̧ huahuäcua'a. Egipto ttö̧ja̧mä̧ ajiya'i̧nä̧ ahuocotö ttäcuotö.” 19 Ja̧'hua̧nö̧ ja̧'a̧, TÖ̧Ä̧NÄ̧HUA̧MÄ̧, Moisésrö pä'inö̧: Pi̧yȩ Aarón-rö̧ ji'ähui: Cuiitta'ca ȩmo̧pö̧'ö̧ Egipto aje huämenä cumö ki̧'ä̧di̧, ajehuiyänä'inä, po̧ö̧ aje o̧rä̧nä̧'i̧nä̧, aje acu o'tanä'inä ja̧'hua̧ta̧'a̧nö̧ ajiya joipome'inä, ja̧'hua̧nö̧ jo̧mȩnä̧ ajiyamä ttucuojatä jö̧nä̧ pärohuächäcua'a. Pi̧yȩmä̧ jȩpi̧ Egipto rȩjȩmä̧ jä̧ttä̧yä̧jä̧tä̧ ttucuojatä rä̧cua̧'a̧nö̧ ja̧'hua̧ta̧'a̧nö̧ dau i̧so̧'ta̧hui̧yä̧nä̧ ja̧'hua̧ta̧'a̧nö̧ inähuiyä o'tahuiyänä̧'i̧nä̧." 20 Ja̧u̧nu̧ o'ca'a Moisés'inä, Aarón'inä TÖ̧Ä̧NÄ̧HUA̧ huȩ'i̧nö̧. Egipto rȩjȩ ru̧hua̧'inä̧, umöhuäyotö'inä ttä'ca jo̧mȩttö̧ Aarónmä̧ itta'ca cä'epö, Nilo ajenä cuä'epinödo. Ja̧'hua̧nö̧ jȩo̧mȩnä̧, Nilo aje o'ca juiyönä ttucuojatä päi'ina'a. 21 Aje po̧imä̧ hua'ö icuinätö ja̧'hua̧nö̧ jo̧mȩnä̧ ajemä juiyo huahuina'a, Egipto rȩjȩ ttö̧ja̧mä̧ aje ajiyattömä ttau juiyönä ji̧na̧'a̧. Egipto rȩjȩ o'ca juiyönä ttucuojatä ra̧'a̧ttö̧. 22 Ja̧'hua̧nö̧ ja̧'a̧nä̧ Egiptottö mä̧ri̧mö̧mä ttihueyenä̧ jȩpi̧nä̧tö̧ ttumäri'änä̧, ja̧'hua̧nö̧ jȩtto̧mȩnä̧ faraónmä̧ amiso'quinä 'qui'ädäcuähuinö ja̧hua̧nö̧ jo̧mȩnä̧ Moisésrö'inä Aarónrö̧'i̧nä̧, ä̧ju̧cua̧mä̧ pä'ocö pinö, TÖ̧Ä̧NÄ̧HUA̧ ja̧'hua̧nö̧ 'cuäopäcua'ató päjita'anötä̧. 23 Ja̧'hua̧nö̧ ja̧'a̧ Faraónmä̧ ppa̧'ä̧chi̧'ö̧ ojusodera̧'a̧cu̧tä̧ 'chi̧nö̧, ja̧u̧mä̧ yorö'iso pi̧yȩmä̧ a̧ju̧cua̧mä̧ pä'ocö pinö.

24 Egipto ttö̧ja̧ o'catoi'önä̧ rejuhuiyä sa'inä̧tö̧ ajé jäyotonä ajiya ttahua pä'ömä̧, ja̧'hua̧nö̧ ja̧'a̧nä̧ jahuätömä ajettö ajiyamä ahuocotö pinätö. 25 Siete mo̧ro̧ jo̧mȩnä̧ 'cuäopina'a TÖ̧Ä̧NÄ̧HUA̧ ajiyanä jȩpö̧ ro̧ȩpa̧'a̧ttö̧mä̧.