Capítulo 30

1 Ucutumä cuaditätucuajá kö'icu iyähuome a̧dö̧nä̧ isoppa 'chopome. Cuaditä cuotöjä acacia dauttö. 2 Iotomä yaute ö̧yö̧'ca̧ri̧ u̧mu̧bu pa̧ja̧cuo̧me ja̧'a̧nö̧ ja̧'a̧ ja̧'hua̧ta̧'a̧nö̧ käcuo räcumä yaute ö̧yö̧'ca̧ri̧ u̧mubu pa̧ja̧o̧me ja̧'a̧nö̧ ja̧'a̧. Yo̧räteunä ja̧'a̧nö̧ ja̧'a̧ ja̧'hua̧ta̧'a̧nö̧ ju'tojucumä todäre ö̧yö̧'ca̧ri̧ u̧mubu pa̧ja̧cuo̧me ja̧'a̧nö̧ ja̧'a̧. Ä̧ja̧ o̧namä yo̧ca̧ttö̧tä̧ todehuina'a̧. 3 'Cho'opunä adiunä kuicu i̧yä̧huo̧ca̧mä tucuepätucua'anö̧ ja̧'a̧ päcuä'i orottötä beipomebu iesubiyäna ja̧'hua̧ta̧'a̧nö̧ ä̧ja̧hui̧yä̧ o̧na'i̧nä.Beipome'i̧nä̧ orottötä cuadita'anö̧ ja̧'a̧. 4 Cuaditätucua'a̧nö̧ ja̧'a̧ to̧bu̧rȩ orottö pätecu iesubiyäna ka̧cu̧nä. Jo̧'u̧ o̧bu̧mä̧ ppu'quepu ttȩpä̧cuo̧bu̧ ja̧'a̧ kuicu i̧yä̧huo̧ca̧. 5 Jȩ'cu̧a̧tu̧cua̧'a̧nö̧ ja̧'a̧ yö̧'ȩpä̧rö̧ o'camä acacia dauttö ja̧'hua̧nö̧ ja̧'a̧nä̧ tucuepätucuaja orottö. 6 Cu̧nä̧tu̧cu̧'a̧nö̧ ja̧'a̧ a̧du̧nä̧ 'cho'opunä kuicu i̧yä̧huo̧ca̧ ä'co̧ca̧ rö̧nä̧tö̧cui̧ tto̧ȩcuä̧ta̧ ippeyänä TÖ̧Ä̧NÄHUA̧ DIOS ötö'cö ji̧'ä̧huo̧ca̧cu̧. Kä̧cua̧'a̧ muȩcuäbi huä̧me to̧cha̧ra̧pe'ö TÖ̧Ä̧NÄHUA̧ ötö'cö ji̧'ä̧huo̧ca̧nä̧, juȩnȩtä̧ chi̧jä̧cua̧sä̧ ucutucumä. 7 Aaron ujuhua'anö ja̧'a̧ a̧du̧nä adicuättö moro̧ jo'öa̧cuä. ujuhua'anö̧ ja̧'a̧ ra̧pa̧ri̧yö̧ ttädita'anä. 8 Aaron pä'äji ta'anö̧ ni̧pä̧cha̧'a̧ ra̧pa̧ri̧yö̧ i̧rȩdȩto̧mȩnä, ujuhua'anö̧ ja̧'a̧ a̧du̧nä̧ adicuättö 'chopunä kuhuicu iyä̧huo̧ca̧nä̧. Kujuhua'anö̧ ja̧'a̧ ttö TTÖ̧Ä̧NÄHUA̧ chä'cajo̧mȩttö̧ cädiäcuähuä juiyönä, o'catoinä cuacharuhuä o'cotö ttö̧jo̧mȩbu. 9 Ja̧'hua̧nö̧ ja̧'a̧nä̧ ucutumä korottö a̧du̧nä̧ adicuättömä cuiyätucu'o a̧du̧nä̧ 'chopunä kuicu i̧yä̧huo̧ca̧nä̧mä̧, cujuhuätucu'o ku'icu iyähuämä odujumä. To'önä tocuätucuä vino isoyamä ku'icu iyähuänämä. 10 A̧'ȩttö̧ yautenätä̧ Aaron usäu'anö ja̧'a̧ a̧du̧nä̧ 'chopunä kuicu i̧yä̧huo̧ca̧ ä̧ja̧ o̧namä. Jo̧'u̧mä jȩ'a̧nö̧ ja̧'a̧ ucuja ȩmu̧ suronä jȩttä̧ji̧ jȩpi̧cö̧ kuicu iya pe'ö. Sacerdote ttu̧ru̧hua̧mä jȩ'a̧nö̧ ja̧'a̧ pi̧yȩmä o'cato'inä ahuaruhuärö. Piyȩ ttö TÖ̧Ä̧NÄHUA̧RÖ̧ kuicu iyähuämä kȩ'ȩpu̧ ttö̧ju̧na'anö̧ ja̧'a̧. 11 TÖ̧Ä̧NÄHUA̧ ucuocu pä'inö̧ Moisesrö. 12 Ja̧'hua̧nö̧ ja̧'a̧nä Israelitarö cui̧'a̧to̧mȩnämä, ya̧cu̧nä̧ tta̧'cua̧rö̧ ki̧'ö̧nä̧ ttiya'anö ja̧'a̧ TÖ̧Ä̧NÄHUA̧RÖ̧. Jȩtta̧'a̧nö̧ ja̧'a̧ pä̧ja̧tö̧ cädö'ca'a, ö̧a̧ta̧'a̧nä̧ hua'ö tticua'acu jähuätö. 13 O'cäto'inä tti̧mi̧ huȩyu̧tö̧ tti̧'a̧tä̧u̧mä̧ ttimita'anö ja'a yaute pä̧rä̧tä̧bi̧ ja̧hua̧ta̧'a̧nö̧ tämäcö̧ttö̧ topu TÖ̧Ä̧NÄHUA̧ ö̧jode'inä. Ttö TÖ̧Ä̧NÄHUA̧RÖ̧ ttiyäcuotö pärätä medio gramo. 14 O'catoinä huȩyu̧tö̧ rötö ttö̧a̧tä̧jä̧ ju̧ttö̧mä̧, veinte a̧'ȩ jo̧mȩnä̧ kö̧nä̧rä̧tö̧ttö̧, ttörö ttiya'anö̧ ja̧'a̧. 15 Ttö̧ja̧ tti̧ä̧rȩ iyähuä ttörö ttiyöttö suronä jȩtti̧nö̧ micuä chimihuiyatö pä'ö, ruhuotömä 5,5gramomä dȩa̧'a̧cu̧mä̧ tti̧mi̧töjuiyö'anö ja̧'a̧ ja̧'hua̧ta̧'a̧nö̧ usurä isotömä 5,5 gramomä huä̧mȩcu̧mä̧ ttimitö juiya'anö ja̧'a̧. 16 Pi̧yȩ pärätämä ttȩmä̧cuä̧ Israel ttö̧ja̧ suronä jȩtti̧nö̧ mi̧cuätä, ja̧u̧mä̧ i̧yä̧huä̧cuä̧ huȩnȩ ucuocuäcuähuode ttaditome. Jua'amä Israél ttö̧ja̧rö̧ amucuädäcuähua päi'önä chä'cattö, suronä jȩtti̧nö̧mä̧ tta̧'cua̧rö̧tä̧ iyähuinätö̧" 17 TÖ̧Ä̧NÄ̧HUA̧ ucuocu pä'inö Moiserö: 18 Ja̧'hua̧ta̧'a̧nö̧ uriba'inö broncettö

cuaditajá ku̧nä̧huo̧mȩ'i̧nä̧ broncettö̧, uribamä töcäcuähuäbä jä̧cua̧'a̧. Cu̧ju̧nä̧tu̧cua̧ huȩnȩ ucuocuäcuähuo̧ca̧ ja̧'hua̧ta̧'a̧nö̧ i̧sa̧rö̧ ku'icu iyähuome kä'co päte'ö ajiyä da'epö cu̧ju̧nä̧tu̧cua̧ juäbanä.

19 Aarón ja̧'hua̧ta̧'a̧nö̧ i̧tti̧mu̧'i̧nä̧mä ttu̧mu̧pi̧yä̧'i̧nä̧ ja̧'hua̧ta̧'a̧nö̧ ttö̧jä̧pi̧yä̧'i̧nä̧mä̧ ajiyanä ttiticähua'päö jä̧cua̧'a̧ juä̧yu̧ jahuättötä. 20 Ji̧nä̧ yo̧mȩtȩ pä'iäcuähuodenä dohuächomänämä ja̧'hua̧'a̧nö̧ jo̧ca̧jö̧ttö̧'i̧nä̧ ttörö ku'icu cuiya'päö tö'cönä̧nö ku̧jo̧mȩnä̧mä, ajiyanä cutu'cähuapäö jä̧cuä̧'a̧ 'cöru pähuiö juiyäcua'anö. 21 Ttötöcähuä'päö jä̧cua̧'a̧ ttu̧mu̧'i̧nä̧ ja̧'hua̧ta̧'a̧nö̧ ttö̧jä̧pi̧yä̧'i̧nä̧ jahuätö 'cöru huottächa'acu. Pi̧yȩmä hueähuä huȩnȩmä̧ 'cuäopunä̧ta̧ kä̧cuä̧ A̧a̧rónrö ja̧'hua̧ta̧'a̧nö̧ ahuäruhuä'cotörö'inä o'catoinä juhua'a yabocu yo'ähuächö ttö̧jä̧cuo̧ttö̧rö̧'i̧nä̧." 22 TÖ̧A̧NA̧HUÄ̧ Moisésrö ucuocu pä'inö: 23 "Pi̧yȩ ȩmi̧ adihuäjuäitö pojopu auä: Quinientos siclos mirranö jo̧mȩ, 250 siclosnö jo̧mȩ sa̧dö̧ na̧ja̧ ja̧'hua̧ta̧'a̧nö̧ adiunä a̧mȩu̧'i̧nä̧ . 24 Ji̧mu̧tȩ yautenö kilo jo̧me casiamä ämä'cömä todäre siclos jo̧mȩ Dios öjodenä ttiya'päö, ku̧na̧cua̧'ató, ja̧'hua̧tä̧'ä̧nö̧ yaute hin'nö jö̧mȩ oliva a̧dȩ. 25 Jȩcua̧já̧ dahuecuoya a̧dȩttö surojö'inä huiyoya pi̧yȩttö̧mä̧, pi̧yȩmä̧ a̧mȩu̧ adihuä i̧sa̧ aditähuä. Poya dahuecuoya a̧dȩjamä̧ jä̧cua̧'a̧ TTÖRÖ ucuotönö hua'adö ku̧nä̧huoya. 26 Ca̧ca̧cu̧ pä̧cuä̧huodemä a̧dȩjattö riri'cua pä'ö ja̧'a̧ ja̧'hua̧ta̧'a̧nö̧ ötö'cö jiäu ȩco̧ca̧'i̧nä̧, 27 ttu̧cuä̧ rutähuodä'inä ja̧'hua̧ta̧'a̧nö̧ ppächi'önä tta̧di̧tä̧cuȩnä̧'i̧nä̧, la̧pa̧ri̧yu̧ ttu̧ju̧nä̧cuänä'inä juhua'atäcu jahuäcänätä kä̧cuȩnä̧'i̧nä̧, incienso 'chopönä ku icu i̧yä̧huo̧ca̧nä̧'i̧nä̧, 28 ttiäre ku icu iyähuome ja̧u̧tä̧ ppächönä aditäcuähuä'inä ja̧'hua̧ta̧'a̧nö̧ o̧'ta̧hui̧yä̧'i̧nä̧ ku̧nä̧huo̧mȩ'i̧nä̧. 29 Ttöcu huotö jö̧nä̧tä̧ 'cä̧'ȩpö̧ cu̧ju̧na̧tö̧jä̧, Ttönä surojö jui'ätö jö̧nä̧ ttö̧jä̧cua̧'a̧nö̧, ji̧yȩtȩ surojö juiyö me'ä̧tö̧mä̧, surojö jui'ätötä ttäcuotö. 30 Aarónrö'inä i̧tti̧mö̧rö̧'i̧nä̧ pojopö ku̧nu̧ 'cä̧'ȩpö̧ ku̧ju̧na̧tö̧ pä'ö huotö, ttö chumöhuäyotö sacerdotestö̧ jö̧nä̧ ttaditäcua'anö̧. 31 Israel ttö̧ja̧rö̧mä̧ jicuähua pä'ö ja̧'a̧tó: ja̧u̧ a̧dȩjamä TÖ̧Ä̧NÄ̧HUA̧CU̧ 'cä̧'ȩpö̧ ku̧nä̧huo̧tö̧ jö̧nä̧ dattepa pä'ö jä̧cuoya cui̧tti̧mö̧ 'cotö yabönö yo'ähuätörömä. 32 Ttö̧ja̧ tti̧jȩta̧nä̧mä̧ tuttepa pä'ömä jo̧ca̧'a̧ ji̧na̧'a̧, ja̧'hua̧ta̧'a̧nö̧ ja̧u̧tä̧ huihuatö ttaditäji jähuättö koro a̧dȩja ttadita pä'ömä juiyina̧'a̧, TÖ̧Ä̧NÄ̧HUA̧ jähuä päi'önä 'cä̧'ȩpö̧ ku̧nä̧huä̧ ja̧'a̧ttö̧. Pa̧'a̧nö̧ jȩtta̧ pä'ötä ji̧na̧'a̧. 33 Ya̧tȩ pi̧yȩ jähuä a̧mȩu̧ttö aditömä ja̧'hua̧nö̧ jo̧ca̧'a̧ttö̧'i̧nä̧ ya̧tȩ tuhuepöttömä, ja̧u̧rö̧mä̧ 'cä̧'ȩpö̧ tticua pä'ötä jä̧cua̧'a̧ ttö̧ja̧ttö̧mä̧. 34 TÖ̧Ä̧NÄ̧HUA̧MÄ̧ Moisésrö pä'inö: A̧mȩu̧ jähuä ȩmi̧, a̧dȩja a̧mȩu̧'i̧nä̧, isade a̧mȩhuade'inä ja̧'hua̧ta̧'a̧nö̧ gálbano pähuättö'inä - sa̧dö̧ jähuättö'inä päcuäi inciensocu, o'cajuiyönä yoräteunä̧tä̧. 35 Incienso jȩttä̧'i̧jö̧ ta'anötä̧ jȩpi̧, a̧mȩu̧ huihuacuä i̧sa̧ jȩä̧'i̧ja̧'a̧nö̧tä̧, nu̧nä̧ 'cäruhuäböcu, päcuäjitä jȩpi̧'ö̧'ca̧ i̧mi̧cu̧nä̧ 'cä̧'ȩpö̧ ruti. 36 Nu̧'cu cuicuajä i̧sa̧ppȩ ppo̧a̧ppȩtä̧ päi'önä. I̧so̧ca̧ esecuinö ȩco̧ca̧ ä̧'co̧ca̧ ja̧'a̧cu̧ ruti, ca̧ca̧cu̧ pä̧cuähuode jacuäcu, ucu Ttörö to'cuäcuomecu̧. Ucuotönä jȩ'cua̧jä̧ Ttörö ro̧ö̧ jö̧nä̧ jö̧ ja̧'a̧ttö̧. 37 Incienso ucu cuaditäjimä, ya̧tȩ'i̧nä̧ ucututtömä huihuatö cuaditäji jähuänä̧mä̧ adita pä'ömä juiya'a. Ja̧u̧mä̧ ucurumä rö̧ä̧nä̧ ro̧ö̧ jä̧cuȩ. 38 Ya̧tȩ ucu jȩ'cuä̧ji̧ ta'anö a̧mȩu̧ jähuä jȩpö̧rö̧mä̧ ahuaruhuättömä 'cä̧'ȩpö̧ icuähuäcua̧."