^{1 2} TTÖ̧Ä̧NÄ̧HUA̧ ucuocuinö Moisérö pa̧'a̧nö̧ pä'ö: "Israél ttö̧ja̧rö̧ ji'ähui ttiäre iyähuä ttiyattö ja̧u̧ iyähuä ttiyömä ttamiso'quinä jacuättö tteseunä jo̧mȩttö̧ ttiyä. Ja̧u̧ iyähuä cuȩmu̧mä̧ TTÖRÖ cui̧yä̧cua̧jä̧. ³ Ja̧'hua̧ta̧'a̧nö̧ jahuätö ttiäre iyähuättö cuȩmä̧cuä̧mä̧ pi̧yȩtä̧ ja̧'a̧: oro'inä, plata'inä ja̧'hua̧ta̧'a̧nö̧ bronce'inä; ⁴ pö̧jä̧ta̧ ja̧ttu̧huä̧ta̧'i̧nä̧, tädönä jä̧ta̧'i̧nä̧ ja̧'hua̧ta̧'nö̧ tu̧huä̧ta̧'i̧nä̧, adihuäjuei lino i̧sä̧ta̧'i̧nä̧, cabra uho'chettö'inä, ⁵ carnero̧tö̧ tti̧jȩti̧yu̧ tu'unä tuhuecua'a'inä, marsopa pä̧ttä̧u̧ tti̧yȩti̧yu̧'i̧nä̧ ja̧'hua̧ta̧'a̧nö̧ cedro dau odiyä'inä; ⁶ a̧dȩja Dios ö̧jode tuhuecua'a'inä, ruhuo huȩ'a̧cua̧rö̧ a̧dȩja̧ tuhuecuä'inä ja̧'hua̧ta̧'nö̧ a̧dö̧nä̧ 'chopönä cuä̧huä̧cha̧'i̧nä̧; ⁷ Ónice i̧nä̧'o'qui'inä, ja̧'hua̧ta̧'nö̧ koro i̧nä̧'o'qui ki'ö adicuä sacerdote huotö ttö̧'ca̧tä̧huä̧tä̧ ttämöca isodänä rö̧jä̧cuä̧. ⁸ TTÖ chö̧jä̧cuo̧mȩ ttadita'anä ja̧'a̧tä̧ topitö, jahuätö ttö̧'cä̧tȩnä̧ chö̧jä̧cua̧'a̧nö̧. ⁹ Chi̧jȩpä̧cua̧jä̧ chö̧jä̧cuode pa̧'a̧nö̧ jä̧cua̧'a̧ pä'ö chi̧jȩpö̧ta̧'a̧nö̧ jäyä jö̧ juiyönä jȩcu̧'a̧já̧ ja̧'hua̧ta̧'a̧nö̧ jua'a jacuä ko̧cu̧'i̧nä̧. ¹⁰ Ja̧'hua̧nö̧ ja̧'a̧nä̧'i̧nä̧ cuaditajá i̧so̧ca̧ acacia odiyättö. Ö'otocumä 1,10 metros jö̧mȩ käcuoräcumä 0,70 metro jo̧mȩ ja̧'hua̧ta̧'a̧nö̧ ju'tojucumä 0,70 metro jo̧mȩnä. ¹¹ Ja̧u̧nu̧ o'ca'amä huä̧mȩnä̧'i̧nä̧ ja̧'hua̧ta̧'nö̧ jacuänä'inä päcuäi orottö cu̧ttä̧rä̧da̧já̧ ja̧'hua̧nö̧ ja̧'a̧nä̧ jäyänä tto'ecuä'inä orottötä mu'ȩpö̧ cuicuajá. ¹² Pa̧ja̧cuä̧nä̧ o̧bu̧ orottö ku'icu cuaditajá juo̧ca̧ jähuä, ja̧u̧ o̧bu̧mä̧ cu̧ju̧nä̧cua̧jä̧ juo̧ca̧ttö̧ pa̧ja̧cuä̧nö̧ u̧yu̧'ca̧ri̧ jo̧mȩ, ja̧u̧mä̧ kä̧cua̧'a̧ kara'anä'inä to̧bu̧rȩ ja̧'hua̧ta̧'a̧nö̧ kara'anä'inä to̧bu̧rȩ jo̧mȩ. ¹³ Ja̧'hua̧ta̧'nö̧ i̧so̧'quȩ acacia dauttö jȩcu̧'a̧'já̧, juo̧'quȩmä̧ orottö cu̧ttä̧rä̧da̧já̧. ¹⁴ Dios ȩsȩcui̧nö̧ ȩco̧ca̧ jäyä ö̧bu̧nä̧ i̧so̧'quȩnä̧ ppu'quepö cu̧ju̧na̧ja̧ ttȩpä̧cua̧'a̧. ¹⁵ Dios esecuinö ȩjo̧ca̧nä̧ ko̧cu̧ o̧'quȩma̧ juȩnȩta̧ ko̧cuä̧cuȩ, juorömä pporädäcuähuoca'a jä̧cua̧'a̧. ¹⁶ Ucutucu esecusä pädäjimä chö̧tä̧cua̧sä̧ i̧so̧ca̧ jacua ucuturu chi̧jä̧cuo̧ca̧nä̧. ¹⁷ Ja̧'hua̧nö̧ ja̧'a̧nä̧'i̧nä̧ päcuäi orottö cuaditätucuajá mu̧ȩcuäbimä. Öotomä jä̧cua̧'a̧ ta'are ttu̧yu̧'ca̧ri̧ ya'ate kä'cobu jo̧mȩ ja̧'hua̧ta̧'a̧nö̧ öcähuemä ya'ate ttu̧yu̧ca̧ri̧ kara'a kä'co jo̧mȩ jö̧nä̧. ¹⁸ cuaditajá ta̧ju̧ kerubinerö̧ orottö mu̧ȩcäbi huä̧mȩ pä̧tȩcuä̧nö̧ ttö̧jö̧nä̧. ¹⁹ Aditätucui ya̧tȩ querubin i̧sa̧rö̧ mu̧ȩcuäbinä ja̧'hua̧ta̧'a̧nä̧ ka̧ra̧ querubin i̧sa̧rö̧mä̧ pä̧tȩcuä̧nö̧ Aditätucu'nö̧ ja̧'a̧ yȩtȩtä̧ 'cua̧rö̧nä̧ juo̧ca̧ mu̧ȩcuäbi huä̧mȩ. ²⁰ Jahuätö querubinema ttujuabi̧yämä̧ ju'tojucu ca̧ȩpä̧nö̧ ttö̧jö̧nä̧, ja̧'hua̧nö̧tä̧ o'cajuiyönä mu̧ȩcuä̧chö̧nä̧ ttö̧jä̧cuo̧tö̧ juo̧ca̧nä̧. Ja'huatö querubinema ttö̧jo̧cuä̧cuo̧tö̧ ka̧ra̧cu̧ pä̧tȩcuä̧nö̧ juo̧ca̧ mu̧ȩcuabi kä'copte'ö to̧pä̧rö̧. ²¹ Muȩcuäbi cu̧huä̧nä̧tu̧cua̧ Dios esecuinö̧ ko̧cuo̧ca̧ huä̧mȩ ja̧'hua̧ta̧'a̧nö ucutucu esecusä pädinöji̧nö̧ chi̧yä̧u̧jä̧ jitämä. ²² Dios esecuinö ȩjo̧ca̧nä̧ji̧na̧'a̧ ucucu tochäcuähuina'a̧mä̧. Ttö chö̧jo̧mȩttö̧ ucucu chu̧cuo̧cuä̧cua̧sä̧ huo̧ca̧ mu̧ȩcuäbi ötö'cömä. Jua'amä jä̧cua̧'a̧ ta̧ju̧ querubines ttö̧'ca̧tȩttö̧, juo̧ca̧mä ttö chöadihua i̧jȩcuä̧ päi'önä chu̧cuo̧cuä̧cua̧jä̧ Israel ttö̧ja̧rö̧ jȩchä̧cua̧sä̧ pädinöji̧nö̧ cu̧huo̧jua̧ pä'ö. ²³ Ja̧'hua̧ta̧'a̧nö̧ acacia dauttu cua̧di̧tä̧cua̧jä̧ mesaisodä. Öotomä todäre ttu̧yu̧'ca̧ri̧ jo̧mȩ ja̧'hua̧ta̧'a̧nö̧ ö̧rö̧ä̧mä̧ ya'ute ttu̧yu̧'ca̧ri̧ jo̧mȩ ja̧'hi̧u̧a̧ta̧'a̧nö̧ ju'töjucumä ya'ate ttu̧yu̧'ca̧ri̧ttö̧ ka̧ra̧ kä'co jo̧mȩ. ²⁴ Jua'amä tu̧cuȩpä̧cua̧jä̧ päcuäi orottötä ja̧'hua̧ta̧'a̧nä̧ jäyänä tto̧'ȩcuä̧ 'pa̧nä̧'i̧nä̧. ²⁵ Ja̧'hua̧ta̧'a̧nö̧ juodä jäyänämä ji̧mu̧tȩ ta'arenö jo̧mȩnä̧ ö̧rö̧'ä̧ jȩcu̧'ä̧cua̧jä̧ jua̧'a̧ jäyänämä attopö cui̧cuä̧cua̧jä̧ orottötä. ²⁶ Jȩcu̧'a̧ja̧ orottö pa̧ja̧cuä̧nä̧ o̧bö̧, jua̧u̧ o̧bö̧mä̧ cu̧nä̧cua̧jä̧ pa̧ja̧cuä̧nö̧ u̧ju̧'ca̧ri̧ jo̧mȩ pa̧ja̧cuä̧nö̧ ö̧jä̧pö̧ o'ca jo̧mȩ. ²⁷ Jua̧u̧ o̧bö̧mä̧ rö̧jä̧cua̧'a̧ jäyänä i̧so̧'quȩnä ppu'quepö juodä mesaisodä ttȩpa̧ pä'ö. ²⁸ Jȩcu̧'a̧já̧ o̧'qui̧yä̧ acacia dauttu jua̧u̧ o̧'quȩmä̧ tu̧cuȩpä̧cua̧jä̧ o̧rottö mesa isodä ja'huätö ttȩpa̧ pä'ömä. ²⁹ Jȩcu̧'ä̧cua̧jä̧ sä̧rä̧bi̧yä̧'i̧nä̧ huȩ'chä̧ca̧'i̧nä̧ känäri o̧yu̧'i̧nä̧ ja̧'hua̧ta̧'a̧nö̧ o̧'ta̧hui̧yä̧ bäreu ttiäre isoya jö̧ ku'icu iyähuä ttiya pä'ö. ³⁰ Päcuäi orottötä cua̧di̧tä̧cua̧jä̧. Ja̧'hua̧ta̧'a̧nö̧ 'cuäopönätä pa̧ppä̧ cutajá ttö cho'cajo̧mȩ juȩnȩtä̧ chö̧jä̧cua̧sä̧. ³¹ Ja̧'hua̧nö̧ ja̧'a̧ttö̧ ra̧pa̧ra̧ ku̧nä̧huo̧mȩ'i̧nä̧ cuaditajá päcuäi orottö. Ja̧u̧ ra̧pa̧ra̧ri̧yu̧mä̧ o̧'qui̧yä̧nä̧ chu̧'ä̧rö̧ ko̧cuä̧cua̧'a̧. Ja̧'hua̧ta̧'a̧nö̧ päjure'inä i̧so̧ttä̧ ucuonä a̧huä̧huo̧'ta̧'i̧nä̧ ja̧'hua̧ta̧'a̧nö̧ ȩ'u̧'i̧nä̧ ji̧yȩtȩ jueittötä cuaditö'anö ja̧'a̧. ³² Juorö jäyättötä räopäcua'a ji̧mu̧tȩ ya'atenö öjó räopäcua'a--huäbodäcuä öjó jo̧mȩ te'ächi'äcua'a ra̧pa̧ra̧ri̧yu̧ ko̧cuo̧mȩttö̧ ja̧'hua̧ta̧'a̧nö̧ huäba'acuä öjó teächi'äcua'a ra̧pa̧ri̧yu̧ pä̧tȩcuä̧nö̧ttö̧mä̧. ³³ Ä̧cuo̧mȩnä̧ öjonämä ka̧ pä'ö ja̧'a̧ i̧so̧tä̧ 'chu'ädäcuähuome ko̧tta̧ almendro ȩ'u̧ ocha 'cua̧rö̧nä̧ kä'co i̧sä̧cha̧'i̧nä̧ jäyänä o̧tti̧'i̧nä̧ ja̧'hua̧ta̧'nö̧ huäbodäcuä i̧so̧tä̧ 'chu'ädäcuähuome ko̧tta̧ almendro ȩ'u̧ ocha 'cua̧rö̧nä̧ pätecua'anä öjomä ji̧chä̧tȩ ȩ'u̧cha̧ ja̧'hua̧ta̧'a̧nö̧ yya'ate ȩ'u̧tti̧tä̧. ³⁴ Ja̧'hua̧nö̧tä̧ jo̧'a̧nö̧ ja̧'a̧ o'cajuiyönä ji̧mu̧tȩ ya'atenö öjohuiyä ra̧pa̧ri̧yu̧ttu̧ rä'opömä, kä̧cua̧'a̧ koro i̧so̧tä̧ 'chu'ädäcuähuome ko̧tta̧'inä almendro ȩ'u̧ 'cua̧rö̧, i̧sä̧chä̧ o̧tti̧'i̧nä̧ ko̧cu̧. ³⁵ Yo̧'ta̧tȩ i̧so̧tta̧ kä̧cua̧'a̧ dȩa̧'a̧ ä̧cuo̧mȩnä̧ ta'are ttöjó dȩa̧'a̧-- ji̧yȩtä̧ttö̧ta̧ adicua'a, ja̧'hua̧ta̧'nö̧ yo̧'ta̧tȩ i̧so̧'ta̧ ta'are päi'önä ttöjohuiyä dȩa̧'a̧--ja̧'hu̧ta̧'a̧nö̧ ji̧yȩtȩttö̧tä̧ adicua'a. ja̧'hua̧nö̧ jö̧ta̧'a̧nö̧ kä̧ pä'ö jä̧cu̧ya̧'a̧ yo̧'ta̧tȩ i̧so̧'ta̧ huäbodäcuänä ttöjohuiyä jo̧mȩ'i̧nä̧, jȩ'ä̧cuä̧hua̧'a̧ ji̧yȩtȩttö̧tä̧. Ja̧'hua̧nö̧tä̧ jo̧'a̧nö̧ ja̧'a̧ o'cajuiyönä ji̧mu̧tȩ ya'atenö ttöjohuiyämä ra̧pa̧ri̧yu̧cu̧ te'ächiu'önä ko̧cu̧mä̧. ³⁶ Ú'ochamä ja̧'hua̧ta̧'nö̧ öjohuiyä'inä ji̧yȩtȩtö̧tä̧ adicuä ja̧'a̧, ji̧yȩtȩttö̧tä̧ adicua päcuäi orottö 'co̧'ö̧. ³⁷ Ja̧'hua̧nö̧ ja̧'a̧ttö̧ cua̧di̧tä̧cua̧jä̧ ji̧mu̧tȩ ta'arenö ra̧pa̧ra̧ ku̧nä̧huä̧'ocä ja̧hua̧ta̧'a̧nö̧ ra̧pa̧ra̧'i̧nä̧; Ra̧pa̧ra̧ cu̧ju̧nä̧cua̧jä̧ ku̧nä̧huä̧ ocänä o'cajuiyönä kä̧dȩpö̧nä̧. ³⁸ 'Chu'ädäcuähuäcä ja̧'hua̧ta̧'a̧nö̧ sä̧rä̧bäya'inä jä̧cua̧'a̧ päcuäi orottö. ³⁹ 34 kg. päcuäi oro jo̧mȩ jä̧cua̧'a̧ ra̧pa̧ra̧ ku̧nä̧huä̧ ocä ja̧'hua̧ta̧'a̧nö̧ jua'a ppächönä ko̧cu̧'i̧nä̧. ⁴⁰ Adiunä to̧pä̧ri̧jó mö̧'ä̧'cara̧'a̧ttö̧ ucuru i̧jȩcuä̧chi̧nö̧'a̧nö̧tä̧ ja̧ pä'ö.