¹ Ja̧'hua̧nö̧ ja̧'a̧ttö̧ Moisés'inä, Israel ttö̧ja̧'i̧nä̧, pi̧yȩ huȩnȩ Tu̧ru̧hua̧ Diosrö ra̧'i̧nä̧tö̧do: Tu̧ru̧hua̧ Diosrö ra̧dä̧cua̧sä̧, adiu juruhuäjirö. Ca̧hua̧yu̧tö̧rö̧'i̧nä̧, ca̧hua̧yu̧tö̧nä̧ huä̧mä̧dä̧tö̧rö̧'i̧nä̧ duborara̧'a̧ do'opö icuäji. ² TÖ̧Ä̧NÄ̧HUA̧TÄ̧ ja̧'a̧ chujurumä ja̧'hua̧ta̧'a̧nö̧ ra̧dö̧mä̧, juhua'atäcu, Ja̧u̧mä̧ ra̧huä̧pi̧jö̧ttö̧ chö̧ji̧pö̧nä̧ ppä'ädinä̧cu̧sä̧. Pidetä ja̧'a̧ Ttö chö̧ä̧nä̧hua̧ Diosmä ja̧'hua̧ta̧'a̧nö̧ ja̧u̧ru̧tä̧ ucuo tedähuä̧cua̧sä̧, chä'o u̧ru̧hua̧ Diosrömä ja̧'hua̧ta̧'a̧nö̧ ja̧u̧rö̧mä̧ chesehuä̧cua̧sä̧ cä'epönö. ³ TÖ̧Ä̧NÄ̧HUA̧MÄ̧ curä ttö̧ja̧sa̧ ja̧'a̧; i̧mi̧nä̧ TÖ̧Ä̧NÄ̧HUA̧ pä'ö micua̧. ⁴ Ja̧u̧mä̧ caruquiyä'inä, faraón umöhuäyotö su̧ro̧da̧u̧rö̧'i̧nä̧ aje dä'ähuotora̧'a̧cu̧ do'opö icuinö. Faraón umöhuäyotö su̧ro̧da̧u̧ tturuhuotö pojopö ȩmi̧nä̧u̧mä̧ aje tuhuotottö a̧'a̧u̧ icuinä̧tö̧. ⁵ Täcuometä a̧ttä̧di'änä̧u̧; ja̧'hua̧ta̧'a̧nö̧ jahuätömä ido'qui täcuome ma̧ä̧cha̧'a̧ jä̧'i̧nö̧'a̧nö̧ ma̧'ä̧chi̧nä̧tö̧. ⁶ Cu̧mö̧ cu̧huo̧jua̧'a̧cu̧nä̧, TÖ̧Ä̧NÄ̧HUA̧, cujurunä eseäcuä̧hua̧jä̧; Ucu cumö̧ cu̧huo̧jua̧'a̧cu̧nä̧mä̧, TÖ̧Ä̧NÄ̧HUA̧, cuaboiyotörömä si'epö icuinö̧jä̧. ⁷ Ucu cucuo rö̧ä̧u̧ jähuänä jitö ucuru ra̧huä̧ri̧nä̧tö̧rö̧mä̧ cuä'äu icuinö̧jä̧. Cu̧'ä̧i̧mä̧ i̧jȩpi̧nö̧jä̧, isä'cua cuo'ö icua'a jä̧'i̧nö̧'a̧nö̧ cuo'ö icuinä̧tö̧. ⁸ Cui̧ji̧yu̧nä ppöcuomenä ajiyamä suhuädi'ina'a; ajiya räopoyamä kämädö̧ rä̧mä̧di̧na̧'a̧; aje täcuotomä amiso'quimä 'quiyönä kä̧mä̧di̧na̧'a̧. ⁹ Taboi̧ya̧mä̧ pä'inö: Ttömä rö̧dä̧rä̧cua̧sä̧, Ttömä chi̧rȩbȩhuä̧cua̧sä̧, 'cho'ipö̧'ca̧mä̧ chi̧yä̧'chä̧cua̧sä̧, cheseumä jahuätönä̧tä̧ isojuoäcua'a; chucurä'chu a̧'u̧cuä̧ cha̧di̧tä̧cua̧sä̧, chu̧mö̧nä̧tä̧ si'epö chicuäcuotö. ¹⁰ Ja̧'hua̧nö̧ ja̧'a̧nä̧ isoppa ppöönä jȩpi̧nö̧jä̧ ja̧'hua̧ta̧'a̧nö̧ ajetä a̧ttä̧di̧'i̧nä̧u̧, jahuätömä cu'upädö aje jurunä maä̧cha̧'a̧ jä̧'i̧nö̧'a̧nö̧ ma̧'ä̧chi̧nä̧tö̧. ¹¹ TÖ̧Ä̧NÄ̧HUA̧ ucu'anömä huocotö tö̧ä̧nä̧huo̧tö̧mä̧, ka̧ra̧ ucu'anö hua̧mä̧ toa'a, surojö jui̧'a̧ ucuo i̧sa̧mä̧, ucuotö rä̧ttä̧cu̧mä̧, ja̧'hua̧ta̧'a̧nö̧ ttieruhuö juäi'inä jȩpö̧mä̧. ¹² Ucumä cujuru juruhuönä isojuo'epinö̧jä̧ ja̧'hua̧nö̧ jo̧mȩnä̧ rȩjȩ ra̧huä̧di̧'i̧nä̧u̧. ¹³ Isopäi'ö ucu cuesecuinö̧mä̧ ttö̧ja̧ usurä ttȩmä̧huo̧ttö̧ rä'epö cui̧cui̧nä̧u̧rö̧mä̧ oipä'ija'a. Ucu cujurutä oipina'a ucu cu̧jo̧mȩ ro̧o̧mȩra̧'a̧cu̧. ¹⁴ Ttö̧ja̧mä̧ ttä̧ju̧cuä̧cuo̧tö̧ ja̧'hua̧nö̧ ä̧ju̧cu̧mä̧ ttö̧ttä̧huä̧cuo̧tö̧, filistea ttö̧ja̧ yettecutä ȩmi̧pä̧cuä̧u̧. ¹⁵ Ja̧'hua̧nö̧ jo̧mȩnä̧ Edom ttö̧ja̧ tturuhuotömä yettecuäcuotö; Moabttö su̧ro̧da̧u̧mä̧ yettecui'äcuotö; ja̧'hua̧ta̧'a̧nö̧ o'catoi'önä canáan ttö̧ja̧mä̧ ttipperecuächäcuötö ¹⁶ Yettecu'inä ttö̧ttö̧huö̧'i̧nä̧ rȩbȩhui̧na̧'a̧ jahuätörö cumö ujurunä jahuätömä inähuä 'quiyönä ka̧'a̧nö̧tä̧ ttö̧ja̧cuä̧cuo̧tö̧ cu̧mö̧huäyotö 'cuättopome jubö päi'önä, TÖ̧Ä̧NÄ̧HUA̧ cu̧mö̧huäyotö ttö̧ji̧pö̧nä̧ jȩö̧cui̧nä̧u̧ 'cuättopome jubö. ¹⁷ Ucutä cui'cächäcuotö ja̧'hua̧nö̧ i'cächö möä'canä cu̧ju̧nä̧cuo̧tö̧ cuiya päcuinö'a̧cuä̧tä̧ cuiyinome, TÖ̧Ä̧NÄ̧HUA̧ Ucutä cu̧jo̧de jö̧nä̧ cu̧ja̧ pä'ö cuaditinome tö̧ä̧nä̧hua̧ jö̧nä̧, ucu cumöpi̧yä̧tä̧ aditinome. ¹⁸ TÖ̧Ä̧NÄ̧HUA̧ 'cuäopönätä̧ ruhuomä hue'ö cu̧jä̧cua̧jä̧ ja̧'hua̧ta̧'a̧nö̧ 'cuäopönä̧tä̧. ¹⁹ Isopäi'önä faraón ä̧ji̧mö̧ cabayu̧tu̧'i̧nä̧, ttiäre carucäquiyä'inä ja̧'hua̧ta̧'a̧nö̧ cabayu̧tu̧rö̧ huȩjä̧tö̧'i̧nä̧ dä'ähuotora̧'a̧cu̧ 'chi̧nä̧tö̧. TÖ̧Ä̧NÄ̧HUA̧MÄ̧ jahuätörö aje dä'ähuotö ppa̧huä̧chi̧'ö̧nä̧ jȩpi̧nö̧. Ja̧'hua̧nö̧ ja̧'a̧nä̧ Israel ttö̧ja̧mä̧ dä'ähuotö kä'cotonä rȩjȩ jo̧ä̧jä̧nä̧tä̧ 'cuä'opinätö̧. ²⁰ Dios päö ji'ähuäju Mirian Arón öjähuajumä cuä'ö 'porähuäba ȩmo̧po̧'ö̧ rä̧'i̧nä̧ju̧ ja̧'hua̧nö̧ ji̧yä̧u̧ nä̧tö̧mä̧ o'catoi'önä 'poru kä̧nö̧ tö'ö rä̧'i̧nä̧tö̧. ²¹ Mirianmä rä̧ji̧nä̧u̧: TÖ̧Ä̧NÄ̧HUA̧RÖ̧ ra̧'ä̧tu̧cui̧, ujurunä̧tä̧ isojuo'epäji. Cabayu̧tö̧rö̧'i̧nä̧, jahuätönä huȩjä̧tö̧rö̧'i̧nä̧ ajera̧'a̧cu̧ icu icuäji. ²² Ja̧'hua̧nö̧ ja̧'a̧ Moisésmä Israel ttö̧ja̧rö̧mä̧ yabocutä aje dä'ähuotottömä̧. Jahuätömä 'chi̧nä̧tö̧ Shur de'a jui̧yä̧jä̧ra̧'a̧cu̧. Jahuätömä huäbodäcuä mo̧ro̧ jo̧mȩnä̧ de'a jui̧yä̧jä̧nä̧ 'chi̧nä̧tö̧ ja̧'hua̧ta̧'a̧nö̧ ajiyamä po̧cui̧po̧co̧tö̧ pinä̧tö̧. ²³ Ja̧u̧nu̧ o'ca'amä Marara̧'a̧ rȩbȩhui̧nä̧tö̧, ja̧'hua̧nö̧ ja̧'a̧nä̧ juoröttömä ajiyamä ahuocotö pinä̧tö̧, ajiyamä reoyatä ja̧'a̧ttö̧, ja̧'hua̧nö̧ ja̧'a̧ttö̧ ju̧huȩnȩmä̧ Mara pä'ö o'inä̧tö̧. ²⁴ Ja̧'hua̧nö̧ ji̧yä̧u̧ ttö̧ja̧mä̧ Moisésrö ra̧huä̧ri̧pö̧ pä'inä̧tö̧: ¿Däje tahuäcua'attö̧? ²⁵ Moisésmä huopönö jä'epinö TÖ̧Ä̧NÄ̧HUA̧RÖ̧ ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ dau i̧jȩpi̧nä̧cu̧. Moisésmä ajiyanä icuinö, ja̧'hua̧nö̧ icuäji o'ca'amä ajiyamä sa̧do̧ya jö̧nä̧tä̧ pärohuächina'a ttahua pä'ömä. Juorötä ji̧na̧'a̧ TÖ̧Ä̧NÄ̧HUA̧ hueähuä huȩnȩ jahuätörö iyina'amä ja̧'hua̧ta̧'a̧nö̧ juorutä ji̧na̧'a̧ jahuätörö ka̧cuä̧mö̧ toina'amä̧. ²⁶ Ja̧u̧mä̧ päinä̧u̧: "Ucutu TÖ̧Ä̧NÄ̧HUA̧ Dios ucuocu ucuotönö cuä̧ju̧cuä̧tu̧cu̧ttö̧mä̧ ja̧'hua̧ta̧'a̧nö̧ ja̧u̧ to̧ä̧ro̧mȩttö̧ adiutä jȩ'cuä̧tu̧cu̧ttö̧mä̧, juhua'atäcu hueähuä huȩnȩ päö'inä ä̧ju̧cu̧ o'cajuiyönä cucuotätucuttömä, yoirö'iso märichei nacuä̧chä̧tu̧cu̧nä̧mä̧ jȩpo̧cö̧ chä̧cua̧sä̧, Egipto ttö̧ja̧rö̧ jȩchi̧nö̧'a̧nö̧mä̧, Ttötä ja̧'a̧ CU̧Ä̧NÄ̧HUA̧TU̧CU̧MÄ̧ na̧cuä̧chä̧tu̧cu̧'i̧nä̧ aditö icumä." ²⁷ Ja̧'hua̧nö̧ ja̧'a̧ ttö̧ja̧mä̧ Elimra̧'a̧cu̧ ichinä̧tö̧, ju̧huȩnȩmä̧ aje rȩjȩttö̧ räopö otomä docenä jo̧mȩnä̧ ki̧no̧mȩ ja̧'hua̧ta̧'a̧nö̧ sensetanö jo̧mȩnä̧ o̧i̧'inä ka̧cui̧na̧'a̧. Jahuätömä aje jäyoto ka̧cui̧nä̧tö̧.