¹ Israel i̧tti̧mö̧ chutäcu Egipto rȩjȩra̧'a̧ i̧hui̧nä̧tö̧do. Tti̧tti̧mö̧cu̧ tti̧tti̧mö̧ tta̧ju̧tu̧cu̧ i̧hui̧nä̧tö̧do. Israel, koro i̧mi̧mä̧ Jacob, i̧tti̧mö̧ tti̧mi̧mä̧ pa̧'a̧nö̧ mi̧cui̧nä̧tö̧do: ² Rubén'inä, Simeón'inä, Leví'inä, Judá'inä, ³ Isacar'inä, Zabulón'inä, Benjamín'inä, ⁴ Dan'inä, Nealí'inä, Gad'inä, Aser'inä. ⁵ Jacob ahuaruhuä o'ca toi'önä setentanö huotö ji̧na̧'a̧do. Jacob i̧tti̧ José täcö Egipto rȩjȩra̧'a̧ ki̧nö̧do. ⁶ Ja̧u̧nu̧ o'ca'a José 'corupä'i'inödo. U̧bö̧o̧tö̧'inä̧, ö̧jä̧hua̧'inä̧, tti̧rȩcua̧mö̧'inä̧ o'ca toi'önä Canaán rȩjȩra̧'a̧ttö̧ ichinätömä hua'ö icuinätödo. ⁷ Ja̧'hua̧nö̧ ja̧'a̧nä̧ Israel ttö̧ja̧ tti̧tti̧mö̧ recuätörö ku̧nä̧rinä̧tö̧do. Ja̧'hua̧nö̧ recuächö, juruhuinätödo. Egipto rȩjȩ o'ca juiyönä suhuädi'önä ka̧cuinä̧tö̧do. ⁸ Recuo a̧'ȩ o'ca'a ka̧ra̧ Egipto rȩjȩttö̧ ru̧hua̧ päi'önä hue'inödo. Ja̧u̧ ru̧hua̧mä̧ José minä ru̧hua̧ ö̧jinö̧mä̧ jerupinödo. 9 ⁹ Umöhuäyotörö pä'inödo: Ä̧ju̧cuätu̧cui.̧ Israel ttö̧ja̧mä̧ ujututtu'inä abonänö recuächätö. Ja̧'hua̧ta̧nö̧ ujututtu'inä abonänö juruhuätö. ¹⁰ Jahuätörö huo̧ju̧nä̧tä̧ jȩta̧ja̧ juhua'a yabocu ttirecuächö juiyäcua'anö. Yodoji ujutu taboiyotö ttichomenä, Israel ttö̧ja̧ jahuätöcu do'ächi'ö ujuturu tturohuähua'acu. Ja̧u̧nu̧ o'ca'a ti̧rȩjä̧ttö̧ rättopächö juiyäcua'anö. ¹¹ Ja̧'hua̧nö̧ amöcuädö, Egipto rȩjȩ ttö̧ja̧mä̧ hue'inätödo jahuätöttö korotö adicuä ruhuotö päi'önä ttö̧ja̧cua̧ pä'ö. Israel ttö̧ja̧ tturuhuotö päi'önä ttu̧ju̧ninä̧u̧do. Israel ttö̧ja̧rö̧ suronä jȩpö̧ pä̧icu̧nä̧ ttadita pä'ö hue'inätödo. Ja̧'hua̧nö̧ ja̧'a̧ Israel ttö̧ja̧ ötahuiyä to̧mȩrȩ aditinätödo Pitón'inä, Ramsés'inä pä'ö micu, Egipto rȩjȩ ru̧hua̧ cuähuä hua'adö u̧ju̧na̧ pä'ö ja̧u̧ ötahuiyänä. ¹² Egipto rȩjȩ ttö̧ja̧mä̧ Israel ttö̧ja̧rö̧ rö̧ȩnä̧ tta̧'cua̧ tta̧ttȩcu̧nä̧ jȩtta̧'a̧nä̧, tti̧tti̧mö̧mä̧ yabonötä recuächinätödo. Ja̧'hua̧ta̧nö̧ yabonötä rö̧ä̧chinä̧tö̧do. Ja̧'hua̧nö̧ jiy̧ ä̧u̧, Egipto rȩjȩ ttö̧ja̧ yettecuinä̧u̧do. ¹³ Ja̧'hua̧nö̧ ja̧'a̧ Egipto rȩjȩ ttö̧ja̧ hue'inätödo Israel ttö̧ja̧rö̧ juiyo pä̧icu̧nä̧ ttaditönä. ¹⁴ Egipto ttö̧ja̧mä̧ ra̧huä̧rö̧nö̧ ttadita pä'ö huettinä̧u̧do. Redä'quiyu ttadita pä'ö huettinä̧u̧do. Ttö'ättiyu'inä rö̧ȩnä̧ ttadita pä'ö huettinä̧u̧do. Piy̧ ȩ o'ca juiyönä ubara ttu'u kä̧nö̧ ttadita pä'ö huettinä̧u̧do. ¹⁵ Ja̧'hua̧nö̧ ja̧'a̧ Egipto rȩjȩ ru̧hua̧ ucuocuinödo Sifrarö'inä, Fúarö'inä, modu tta̧huä̧rä̧cuä̧huä̧ isotörö. Jahuätömä hebreos ttö̧ja̧ttö̧ nä̧tö̧rö̧ tta̧'ä̧rinä̧tö̧do tti̧tti̧mö̧rö̧ ttuhuäbecua'anä. ¹⁶ Egipto rȩjȩ ru̧hua̧ pä'inödo: Hebreos ttö̧ja̧ nä̧tö̧rö̧ tta̧cu̧huä̧rätu̧cuo̧mȩnä̧, ubo uhuäpächöttömä, cuä'ö cuicuätucuaröja. Isaju kuhuäpächöttötä, huäinä cäcuepätucuaja pä'inödo. ¹⁷ Ja̧'hua̧nö̧ ja̧'a̧nä̧ Egipto rȩjȩ ru̧hua̧ hueäji'anömä jȩpo̧co̧tö̧ pinätödo modu tta̧huä̧rä̧cuä̧huä̧ isotömä, Tö̧ä̧nä̧hua̧ Diosrö ttucuota'attö. U̧mä̧tö̧rö̧'inä̧ huäinä ttuhuäpächa'anä topinätödo. ¹⁸ Ja̧'hua̧nö̧ ja̧'a̧ttö̧ Egipto rȩjȩ ru̧hua̧ huopinödo modu ta̧huä̧rä̧cuä̧huä̧ isotö tticha pä'ö. Jahuätörö pä'inödo: ¿Dä̧bö̧ ja̧'hua̧nö̧ jȩcu̧'ä̧jä̧tucuä̧ttö̧? ¿Dä̧bö̧ huäinä tocu'äjätucuättö u̧mä̧tö̧ ttuhuäpächa'anä? ¹⁹ Modu tta̧huä̧rä̧cuä̧huä̧ isotö Egipto rȩjȩ ru̧hua̧rö̧ pä'inätödo: Hebreos ttö̧ja̧ttö̧ nä̧tö̧mä̧ Egipto rȩjȩ ttö̧ja̧ nä̧tö̧ttö̧'inä imicu̧nä̧nö̧ uhuäbecuätö. Juruhuätö ja̧'a̧ttö̧, ujutu ti̧rȩbȩhui'ä̧cua̧ ä'canä, tti̧tti̧mö̧rö̧ täcö ttuhuäbecu o'ca'atä topä'ijätöjä pättinäcudo. ²⁰ Ja̧'hua̧nö̧ jo̧mȩnä̧ Tö̧ä̧nä̧hua̧ Dios adiu jȩpinö̧do modu tta̧huä̧rä̧cuä̧huä̧ isotörö. Ja̧'hua̧nö̧ ja̧'a̧ttö̧ Israel ttö̧ja̧ recuächö juruhuinätödo. ²¹ Modu tta̧huä̧rä̧cuä̧huä̧ isotö Tö̧ä̧nä̧hua̧ Diosrö ye'ecu cuä'ö tticuoca'attö, tti̧tti̧mö̧ recuätörö iyinä̧u̧do Tö̧ä̧nä̧hua̧ Dios. ²² Ja̧'hua̧nö̧ ja̧'a̧ Egipto rȩjȩ ru̧hua̧mä̧ hue'inödo o'ca toi'önä umöhuäyotörö, hebreos ttö̧ja̧ tti̧tti̧mö̧ u̧mä̧tö̧ ttuhuäpächomenä, Nilo ajera'a do'opö tticua pä'ö, tti̧tti̧mö̧ nä̧tö̧tä̧ ttö̧jipa̧'a̧nä̧.