¹ Naomi, banyina zhyala, bakaamba kuli nguwe, ''Mwaana aangu muhyimbi, ino inga mebo nhyi ndakukapwila busena ubwa kulyookezhya webo, kutewa zhyintu zhyikweendele kabotu? ² Ono Boaz, mulombwana mukamwini bamakaintu bakubuhyi babelehyi mbomwali limwi, hena ulya tali musazhyima? Langa, sunu mahyiku ulikupupulula maila muceme aakwe alubuwa ulwa cisaza cakwe. ³ Aboobo ono, webo kosamba, ulinanike mahwuta aako, usame zhyisani zhyako zhyiinda kubota, alimwi uunke kulya kulubuwa nko baumina maila. ⁴ Pele webo uta kalizubululi kuli nguwe mulombwana kuhiikila amane kulya a kunywa. Pele walo waunka kukulala, ukabikile maanu busena nkwalala kutewa kuti kwamana kaba kaindi inga waunka kuli nguwe walo, umuhvwumbule nkwali kumaulu aakwe, a kulala webo aawo. Kumane walo ulakapandulula kuli ndiwe icakucita.'' ⁵ Ruth wakati kuli Naomi, ''Ndazhyicita zhyoonse nzhyo amba.'' ⁶ Aboobo walo wakaunka kuya kulubuwa ilwaku pupwila, alimwi walo wakaatobelela malailile banyina zhyala ngobaka mupele. ⁷ Lilya Boaz nakamana kulya a kunywa alimwi amoyo wakwe kaubotelwe, walo wakaunka ku kulala kumamanino aamulwi iwa maila. Kumane Ruth wakaboola cakusobelela, wa muhvwumbula kumaulu aakwe mulombwana, a kulala. ⁸ Ono cakaza kucitika kuti akati kamahiku mulombwana waka kankamana. Walo wakaza kupilamuka, alimwi aalya mpoona a mukaintu wakali kulele ku maulu aakwe! ⁹ Mulombwana wakati, ''Ndiwe ni webo?'' Mukaintu wakahvwiila, ''Mebo ndime Ruth, mubelehyi wako mukaintu. Ko hvwumba cibaki cako a mubelehyi wako mukaintu, nkaambo uli musazhyima waahwaahwi.'' ¹⁰ Boaz wakaamba kuti, ''Mwanaa ngu muhyimbi, webo kubota Mwami Leza a kuleleke. Wacita luse lwako lwa ono kubota kwiinda ulwa kutaanguna, nkaambo webo tookapaula kutobela umwi wabalombwana bakubuhyi, nobaba bacete naa bahvwubile. ¹¹ Ono, mwanaa ngu muhyimbi, utayoowi pe! mebo ndakucitila coonse ncowamba, nkaambo munzhyi woonse iwabantu bangu ulizhyi kuti webo uli mukaintu mwini mwini weelele. ¹² Inzhya nca mahyimpe kuti mebo ndimu sazhyinyoko, pele nkwali musazhyinyoko uwaa hwaahwi kwiinda ndime. ¹³ Kohyite kuno mahiku aasunu, mpoona mahwumo hwumo, kuti naa walo aka kucitile mulimo iwa busazhyinyina, ncibotu, inga wacita uyo mulimo wa busazhyinyina. Pesi kuti walo ataciti mulimo wa busazhyinyina kuli ndiwe, nkokuti mebo ndakaucita uyo mulimo, ku buumi bwa Mwami Leza. Kolala aawo anhyi kuhikila buce mahwumo hwumo.'' ¹⁴ Aboobo mukaintu wakalala ku maulu aakwe mulombwana kuhyiikila mahwumo hwumo. Pesi walo mukaintu wakabuka nakwakacili kuhiya hiya kuti muntu umwi akonzhye kuzhyiba uumbi muntu. A kaambo ka kuti Boaz wakaamba kuti, ''Akubule uuzhyiba kuti mukaintu wali kuboolele ku lubuwa lwa kuumina maila.'' ¹⁵ Kumane Boaz wakaamba kuti, ''Koleta cibikilo cako a kucikwatilila awa.'' Naakacita ubo, walo wakamubikila zhyipimina izhyili cisa mbomwi izhya maila muceme muli ncico alimwi akumutwika amutwe walo mukaintu. Mpoona mulombwana wakaya mu munzhyi. ¹⁶ Eelyo Ruth naakahika kuli ba banyina zhyala, balo bakaamba kuti, ''Kwaamba wacita buti mwana aangu muhyimbi?'' ¹⁷ Kumane Ruth waka baambila zhyoonse zhyaakacita mulombwana kucitila nguwe. Ruth wakaamba akuti, ''Eezhyi zhyibeela izhyili cisa mbomwi izhya maila muceme nzhyaandipa mebo mulombwana walo, nkaambo waamba kuti, 'Utaunki kakunyina anco toleela kuli banyoko zhyala.''' ¹⁸ Kumane Naomi wakati, ''Kkala kuno, mwana aangu muhyimbi, kuhyiikila ukazhyibe kaambo mbokati kabe, nkaambo uyu mulombwana tati lyookezhye kuhyiikila walo acimane cintu ici sunu.''