¹ Aboobo bantu ba Israel, buleya bwabo boonse, bakaunka mulukula ulwaku Zin mumwezhyi wakutaanguna; bakahyite ku Kadesh. kulya Miriam wakahwa alimwi wakazhyikwa. ² Kwakabula meenzhyi aabana malayeya, aboobo bakabungana antoomwe kukulwana Moses alimwi a Aaron. ³ Bantu baka mutongookela kumulwana Moses. Bakaamba kuti, ''Nocakainda kubota kuti notwakahwa buyo lilya bana Israel ma nobakahwa kumbele lya Mwami Leza! ⁴ Hena ninzhyi nco leta buleya ubu bwa Mwami Leza kuza momuno mulukula kuza kuhwa kuno, swebo alimwi abanyama besu? ⁵ Hena ninzhyi ncokatukwihyila kuboola kuhvwa mu Egypt kutuleta swebo kuno kubusena ububyaabi kubula aciliko? Kuno kunyina akuyanwa nseke zhyiliwa, inkuyu kunyina, masaansa, nakuba pomegranate, alimwi kunyina a meenzhyi aa kunywa.'' ⁶ Mpoona Moses alimwi a Aaron bakahvwa kumbele ilya mbungano. Bakaunka baya ku mulyango iwa ihvwuka lya ku swaanganina a kulala buhyu anhyi. Okulya kumwekehya ukwa bulemu bwa Mwami Leza kwaka libonya kuli mbabo. ⁷ Mwami Leza wakabandika kuli Moses a kwaamba kuti, ⁸ ''Kobweza musako a kubunjika buleya ubu, webo, alimwi a Aaron munyoko. Ukanana kwibwe kumbele aa meso aabo, a kulailila ibwe kuti lihvwe meenzhyi aakunka. Mula balabakwihila meenzhyi balo kuhvwa mwibwe ilyo, alimwi ayo meenzhyi mweelele kubupa buleya a zhyihvwubwa zhyabo kuti banywe.'' ⁹ Moses wakabweza musako wakwe kuhvwa kumbele ilya Mwami Leza, umbona Mwami Leza mbwaakamulailila walo kuti acite. ¹⁰ Kumane Moses alimwi a Aaron bakaiswaanganya imbungano antoomwe kumbele ilya ibwe. Moses wakabaambila balo, ''Kamuteelele ono, mwebo nobazangi. Hena limwi obuya swebo tumuletele meenzhyi kuhvwa mwibwe ili eenu mwebo?'' ¹¹ Mpoona Moses wakanyamuna iboko ilyakwe a kuuma ibwe zhyiindi zhyobile kubelehya musako wakwe, alimwi kwakahvwa meenzhyi manji. Buleya bwaka nywa, alimwi a zhyihvwubwa zhyabo zhyakanywa. ¹² Mpoona Mwami Leza wakaamba kuli Moses alimwi a Aaron, ''Aa kaambo kakuti mwebo timwa kanhyoma nokuba kundemeka mebo mbuli uusalala ku meso lya bantu ba Israel, mwebo ulwenu tamu kabahyihyi munyika yalo njindabapa bambungano iyi.'' ¹³ Ubu busena bwakaitwa kuti ku meenzhyi aa Meribah nkaambo bantu ba Israel bakazwangana a Mwami Leza kulya, alimwi walo wakalitondezhya kuli mbabo mbuli uusalala. ¹⁴ Moses wakatuma batumwa kuhvwa ku Kadesh kuya ku mwami wa Edom: Webo Edom munyoko Israel waamba boobu: ¹⁵ ''Webo ulibuzhyi boonse buyumu yumu ubwaka citika kuli ndiswe. Ulizhyi kuti ba hyinhyiku besu bakaunka kuselemukila ku Egypt alimwi akuponena mu Egypt ukwa ciindi cilanhwu. Bana Egypt bakatu tundulula swebo alimwi aba hyinhyiku besu abalo. ¹⁶ Ono ilyo notwaka mwiita walo Mwami Leza, wakateelela izwi lyesu a kutuma mungele a kutukwihya mu Egypt. Langa, swebo tuli mu Kadeshi, munzhyi walo uuli amunyinza wa nyika iyako. ¹⁷ Mebo nkulomba kuti webo utu hvwuminzhye kwiinda kwaandulula mu nyika iyako. Kunyina notuya kwiinda kwaandulula mumuunda na mu mbewu ya masaansa, nokuba kunywa meenzhyi aa mu migonti yenu peepe. Swebo tulainda kutobela munzhyila inkando njainda mwami. Tatuka nyoni swebo pe kululyo nokuba kulumwenhyi kuhyiikila mane limwi tukawiindilile munyinza wako.'' ¹⁸ Pele walo mwami wa Edom waka muhvwiila, ''Webo inga tokonzhya kwiinda kwaandulula okuno. Naa kuti ucite ubo, ndakaboola aicheba kuza ku kulwana webo.'' ¹⁹ Mpoona bantu ba Israel bakaamba kuli nguwe, ''Swebo tulainda kutobelela munzhyila inkando. Kuti naa swebo nokuba zhyihvwubwa izhyesu zhyinywe meenzhyi aako, swebo tulalunga buyo. Kotuleka buyo tweende twiinde amaulu, kakunyina kucita icimbi cintu pe.'' ²⁰ Pesi walo mwami waku Edom wakaingula, ''Mwebo inga tamwiindi kwaandulula peepe.'' Aboobo mwami waku Edom wakaboola kulwana Israel aitanhyi ilya nsana kali abahyi kalumamba banji. ²¹ Mwami wa Edom waka kahya kumuhvwumizhya Israel kuti akosole kulanduka munyinza wabo. A kaambo kaceeci, Israel wakapiluka waunka kuhvwa kunyika ya Edom. ²² Eelyo bantu bakabweza muhyinzo kuhvwa ku Kadesh. Bantu ba Israel, buleya boonse buyo, bakahyika ku mulundu wa Hor. ²³ Mwami Leza wakabandika kuli Moses alimwi a Aaron ku mulundu wa Hor, ku munyinza wa Edom. Wakaamba kuti, ²⁴ ''Aaron weelele kukobololwa kuya ku bantu bakwe, nkaambo takainjili inyika ilya njindapa ku bantu ba Israel. Ici caba aa kaambo kakuti mwebo noonse nobile mwaka nzangila kulwana izwi lyangu kulya ku meenzhyi aku Meribah. ²⁵ Kobweza Aaron alimwi a Eleazar mwanaakwe musankwa, a kubaleta balo kuza ku mulundu wa Hor. ²⁶ Ukwihye zhyisani izhya bupaizhyi zhyaka Aaron kuhvwa ali nguwe akuzhyibika ali Eleazar mwana uwakwe. Aaron weelele kuhwa aku kobololwa kubantu bakwe kulya.'' ²⁷ Moses wacita umbona mbuli Mwami Leza mbwaka mulailila. Bakaunka kutanta mulundu kabeebelela boonse bana maleya. ²⁸ Moses wakabweza zhyisani zhyaka Aaron izhya bupaizhyi kuhvwa ali nguwe a kuzhyibika ali Eleazar mwanaakwe musankwa. Aaron wakahwa aalya mpoona atala ilya mulundu. Mpoona Moses alimwi a Eleazar bakaboola baseluka anhyi. ²⁹ Eelyo buleya boonse nobwakabona kuti Aaron wahwa, cihyi coonse mbocibele bakamulila misozhyi Aaron ukwa mazuba aali makumi otatwe.