¹ हे इस्राएल क चरवाहा, तू जवन यूसुफ क अगुवाई भेड़ नियर करलअ, कान लगावा! तू जे करूबन पे विराजमान हयअ, आपन तेज देखावा! ² एप्रेम, बिन्यामीन, अऊर मनश्शे के सामने आपन पराक्रम देखाके, हमने क उद्धार करअ के आवा! ³ हे परमेश्वर, हमने के पहिले के हालत में वापस ले आवा; अऊर अपने मुख क प्रकाश चमकावा, तब हमने क उद्धार हो जाई! ⁴ हे सेनाओ क परमेश्वर यहोवा, तू अपने प्रजा के प्रार्थना से कब तक क्रोधित रहबअ? ⁵ तू आँसुअन के ओनकर खाना बना देहलअ, अऊर मटका भर-भर के ऊ सब के आँसू पियईले हयअ। ⁶ तू हम सबके हमने के पड़ोसीयन से झगड़अ के कारण बना देलअ; अऊर हमने क दुश्मन मनमाना ठट्ठा करअलन। ⁷ हे सेनाओ क परमेश्वर, हमने के पहिले के हालत में वापस कर द; अऊर अपने चेहरा क प्रकाश हमने पे चमकावा, तब हमने क उद्धार हो जाई। ⁸ तू मिस्र से एक दाखलता ले अईलअ; अऊर अन्यजातियन के निकाल के ओके लगा देहलअ। ⁹ तू ओकरे बदे एक जगह तइयार कइले हयअ, अऊर उ जड़ पकड़लेस अऊर फईल के देश के भर देहलेस। ¹⁰ ओकर परछाई पहाड़न पर फइल गयल, अऊर ओकर डार महा देवदारन के तरे भयल; ¹¹ ओकर डार समुंदर तक बढ़ गयल, अऊर ओकर अंकुर फरात तक फइल गयल। ¹² फिर तू ओकरे बाढ़न के काहे गिरा देहलअ, की सब बटोही ओकरे फलन के तोड़अलन? ¹³ जंगली सुअर ओके नाश कर देला, अऊर मैदान क सब जानवर ओके चर जालन। ¹⁴ हे सेनाओ के परमेश्वर, फिर आवा! स्वर्ग से धियान से देखा, अऊर ए दाखलता क सुधि ल, ¹⁵ ई पौधा तू अपने दहिने हाथ से लगईलअ, अऊर जवन लता के डार के तू अपने बदे दृढ़ कइले हयअ। ¹⁶ उ जर गयल, ऊ कट गयल हव; तोहरे घुड़की से तोहार दुश्मन नाश हो जाए। ¹⁷ तोहरे दहिने हाथ के संभलले आदमी पे तोहार हाथ रखल रहअ, वो आदमी पे, जेके तू अपने बदे दृढ़ कईले हयअ। ¹⁸ तब हमने तोहसे न मूड़ब: तू हमने के जीयावा, अऊर हमने तोहसे प्रार्थना कर सकब। ¹⁹ हे सेनाओ क परमेश्वर यहोवा, हमने के पहिले के हालत में वापस ले आवा! अऊर अपने चेहरा क प्रकाश हमने पे चमकावा, तब हमने क उद्धार हो जाई!