¹ हे यहोवा, दाऊद के बदे ओनकर सब दुर्दशा के याद करा। ² ऊ यहोवा से कसम खईलन आउर याकूब के सर्वशक्तिमान क मन्नत मनले हयन, ³ ऊ कहलन, "जरूर हम ओ समय तक अपने घर में न घुसब, आऊर न अपने पलंग पे चढ़बला; ⁴ न हम अपना आँखन में नींद, आऊर न अपने पलकन में झपकी आवे देब, ⁵ जब तक हम यहोवा के बदे एक जगह, मतलब याकूब के सर्वशक्तिमान बदे निवास स्थान न पाई।"(प्रेरि 7:46) ⁶ देखा, हमने एप्राता में एकर चर्चा सुनले हई, हमने एके वन के खेतन में पईले हई। ⁷ आवा, हमने ओनकरे निवास में प्रवेश करीं हमने ओनकरे के चौकी के आगे दण्डवत् करीं! ⁸ हे यहोवा, उठके अपने विश्रामस्थान में अपने शक्ति के सन्दूक* सहित आवा। ⁹ तोहार याजक धर्म क कपड़ा पहिने रहंअ, आउर तोहार भक्त लोग जयजयकार करंअ। ¹⁰ अपने दास दाऊद के बदे, अपने अभिषिक्त क प्रार्थना के अनसुना मत करा। ¹¹ यहोवा दाऊद से सच्चा कसम खइले हयन आउर ओन ओसे न मुकअरिहन : "हम तोहरे गद्दी पे तोहरे एक निज लड़का के बईठाइब (2शमू 7:12, प्रेरि 2:30) ¹² अगर तोहरे वंश क लोग हमरे वाचा क पालन करंअ आउर जवन चितौनी हम उ सब के सिखाइब, ओप्पे चलंअ, त ओनके वंश क लोग भी तोहरे गद्दी पे युग-युग बईठत चल जईहन।" ¹³ जरूर यहोवा सिय्योन के चुनले हयन, आउर ओके अपने निवास के बदे चाहल हयन। ¹⁴ "ई त युग-युग बदे हमार आराम क जगह हव एहीं हम रहबला काहे कि हम एके चाहल हई।" ¹⁵ हम एम्मे के भोजनवस्तुअन पे भरपूर से आशीष देब; आउर एकरे गरीबन के रोटी से तृप्त करब। ¹⁶ एकरे याजकन के हम उद्धार क कपड़ा पहिनाईब; आउर एकर भक्त लोग ऊंचा आवाज मे जयजयकर करिहन। ¹⁷ उहाँ हम दाऊद के एक सींग उगाईबला; हम अपने अभिषिक्त के बदे दीपक तइयार कर रखले हई।(लूका 1:69) ¹⁸ हम ओनकरे दुश्मनन के त लाज क कपड़ा पहिनाइब, लेकिन ओनकरे कपार पे ओनकर मुकुट शोभायमान रही।"