¹ Polo, phui palakoz dji Jezi khi, i fue dji Timóteo, pu Filemom no kamahad ki no kõtã, i mun ki ka ide la thavai. ² I no so Áfia, a Arquipo kamahad dji kate bõ nuvel dji Jezi, i legliz ki ka hasãble la u kaz. ³ Thãkilite i suple dji Bõdje, no papa, i dji Sẽiẽ Jezi Khi, a tut zot. ⁴ Tut tã mo ka humiasi mo Bõdje, ka xõje-mo dji u kã mo phuie. ⁵ Mo te tãde dji kõtatmã i dji ispua ki u gãiẽ la Sẽie Jezi i dji tut u fue-iela la Jezi khi. ⁶ Kã mo ka phuie mo ka dumãde ki kã u ka pataje u ispua sa ka ide pu u kõnetmã dji tut biẽ ki ke no la Jezi khi. ⁷ palakoz dji u kõtatmã, mo fue, mo gãiẽ boku kõtatmã i kõsole, pase txo dji khẽtxie-iela ka heanimẽ, pa u lakoz. ⁸ Apusa, mem ki mo gãiẽ tut libiate dji Jezi khi pu bai un zod kisa u gãiẽ dji fe, ⁹ lasu nõ dji mo kõtatmã mo mĩo xuezi dumãde; Mo, Polo, un om ki vie i, ato, mo phui palakoz dji jezi khi. ¹⁰ Mo ka dumãde ã suple pu mo pitxit Onésimo, ki mo mũthe pahol dji Bõdje ixtã mo te phui. ¹¹ Pase li, ãvã, pa teka siavi pu ãiẽ pu u; mẽ, ato, li ka siavi, kumã pu u kumã pu mo. ¹² Mo ka voie li ãko kote u, a li ki sa mo phop txo. ¹³ Mo tele li hete ke mo, pu li te puve ide mo, la u ãplas, ixtã mo phui palakoz bõ nuvel dji Jezi. ¹⁴ Mẽ, mo pa tele fe ãiẽ sã u kõsãtxi, pase sa ki u ka fe dji biẽ pa ke sa pu obhuigasiõ, mẽ dji u liv volõte. ¹⁵ Djivet a pusa li sepahe li dji u pu un mumã, pu u gãiẽ li ãko pu u mem, pu tut tã ¹⁶ Pa kom un iskrav; mẽ, pi bõ ki un iskrav, fue ki mo kõtã, espesial pu mo i, pi boku, pu u, kumã la laxie kumã la Sẽie. ¹⁷ Ẽbe, si u ka kõsidehe mo kamahad, husuvel ãtxe kumã u te ke husuve mo. ¹⁸ Si li fe mal pu o si nõ ka deve u kek bagaj mete la mo kõt. ¹⁹ Mo, Polo, ka ekhi sa ke mo phop lamẽ: Mo ke peie u, sã mo dji ki u ka deve mo u lavi. ²⁰ Ui, fue, ki mo husuve dji u sa suple-la, pu Sẽie. Kõsole mo txo la Jezi Khi. ²¹ Mo ka kõfie ki u ke obei, mo ka ekhi pu u, ka save ki u ke fe plis dji sa ki mo ka dumãde. ²² La mem tã, phuepahe un xam kote u ka husuve mun pu mo, pase mo ka ãtan ki, palakoz dji u phuie, mo ke tonẽ pu zot. ²³ Epafras ka voie saudasiõ pu u, mo kamahad dji phuiziõ ã Jezi Khi, ²⁴ i osi Marcos, Aristarcos, Demas i Lucas, mo mun-iela kika ide mo la thavai. ²⁵ Suple dji Bõdje, dji no Sẽie Jezi khi ke hete ke zot lesphui.Amém.