¹ Eyi éma pka vɔ̀a, efiɔawo zɔ̃ gbɔ̀nɔ̃ gbɔnye, ye wó le gbɔgblɔŋ be: Izraɛl be djukɔ̃a, avɔsatɔwo ku Lewi viwo, wó me má ɖá cò edjumawo me tɔ̀wo ŋtio, eye wóle woabe núnyɔŋ wɔ̀wɔ̀wo kpɔ̃ŋ le wɔwɔŋ, kanantɔ̀wo Moabitɔ́wo, Egitetɔ́wo ku Amoritɔ́wo tɔ̀ le wɔ̀wɔ̀ŋ. ² Ɖoa wó ɖe woabe nyɔ̃núviwo ne wóɖokuiwo, eye ne woabe núcúviwo, eye wó cákà edju kɔkɔa ku èdjúmawo be djukɔ̃wo; eye efiɔwo ku edjumemegãwo wóe dóŋgɔ̀ wɔ̀ nuvɔ̃ ma. ³ Yi me se nya ma, me dre awunyewo ku awù vlaya nyea, me flɔ̀ ɖa nye le ta, ku aglãgɔ̃me fú nyewo, ye me nɔanyi ku núxàxà. ⁴ Ame yiwo kekeŋ Izrael Mawua be nyáwo vúvú kùle aboyome viwo be nuvɔ̃ ŋtia, wóvà ƒòƒú le gbɔ nye. Eye nyà, me djo bɔbɔ nɔanyi le núxàxàme kàkà yi fiɔɛ̃si be akpedodóvɔsa be game. ⁵ Eye, le fiɔɛ̃si be akpedódóvɔ be gàmàmea me có le nuxàxà be nɔ̀nɔ̀me me le ɖokuinye me kù àwù gaku àwuvlaya dèdrèwo, me djè klò, me vlù alɔ̀nyewo ɖoɖa Yehowa Mawu nye gbɔ̀, ⁶ eye me gblɔ̃ be: Mawu nye, me le càkàcakáme eye ènu le kpeŋ, ô Mawu nye, be ma kɔ̀ mò nye yì djì ɖoɖa gbɔ̀ wó, ɖoa míabe nútóvówɔwɔwo djiɖó edji gbe míabe tàwo nũ, eye miabe vòddawo wó liá yi kàkà djipowo. ⁷ Cò kàkà mía tɔtɔwo be game kàkà và míabe gamea, mí dje agɔ ŋtɔ̀, eye míabe nuvɔ̃wo ŋtiye, míawo, miabe fiɔ̀wo, miabe avɔ̀sátɔ́wo, mi ciási ne amedró fiɔ̀wo, lãnú, àbóyómenɔnɔ, xàxà, ku nukpe yi cɔ̃ mò ne mí égbèa. ⁸ Eye fifia, míabe mawu vè mía nú, be gble ameɖewo daɖi ne mi, eye be nà mí bebeƒe le yibe nɔ̀ƒe kɔ̀kɔ̀a, be ne yà klɔ̀ miabe ŋkuwo dji eye mia gbɔdjɔɛ viɖe le miabe kluvi nyényé mé. ⁹ Ɖoa kluviwo mí nyi, Mawu me gble mí dadi le miabe klúvinyinyinyia me o. Énà be Persia be fiɔ̀wo nyɔ̃ dɔ̃me ne mí, yi wɔɛ be agbe géɖó mia me be ne mí teŋ atrɔ̀a cù mía Mawu be aƒea, eye mía fɔ̃ gligbãgbãwo eye ba na mí gbɔ̃ɖe me le Yuda kú Yeruzalem. ¹⁰ Fifia, núkà gblɔ̃ gbe mí lè le émàwo megbe, ô miabe Mawu? ɖoa mí gble esódówo daɖai, ¹¹ ese dódó yiwo mí xɔ̀ có dɔ̀cɔ̀tɔwòwo, nyagblɔ̃ɖitɔ́wo, gblɔ̃ be: Édjù yi me yigbe miulea, be ne bazũ miatɔa, ényì edjù poɖi to édjù yiwo trɔ̀doea be nú makɔmámakɔwo wɔwɔ, hlɔ̃dónu wɔwɔ yi wó cɔ̀ ɖɔ djia be gòyame yi gòkeme, ku woabe màkɔ̀makɔ̀ nyinyiwo; ¹² ŋti, miŋ gba cɔ̃ miabe nyɔnuwiwo ne woabe nucuviwo wó ne ɖe o, eye miŋ gba ɖe woabe nyɔ̃nuviwo ne mia vi núcúviwo wó ne ɖe o, eye miŋ gba dji nudjédji ɖekea, mia trɔazũ ameséséwo, mia ɖu anyigbã be núkú nyuitɔ̀wo eye mia gble wó daɖi ne miabe viwo wóanyi dó né yi ɖaa. ¹³ Enúyiwo kpata djɔ le mía dji le miabe núwɔ́na gbegblewo yiwo mí wɔ tógbɔ̀ be Ô Mawu me he to né mí sigbe lékè be dje o, vɔ fifia le gba gble amewo dadi mía. ¹⁴ Ɖèyèe mia gba dje sedódówòwo dji dàdà ke, eye mia gba nɔ yinyiŋ ku djukɔ hlɔ̃dónú wɔ̀tɔ̀ yawo woa? Ɖjiku wɔ̀ ma gba hò le mía ŋti kaka la crɔ̃ mí kekeŋ, núɖekpe ma ciànyí, alo ameɖekpe ma gba ci agbe o woa? ¹⁵ Yehowoa Izraɛl be Mawu, le djɔ̀, ɖoa egbea mí nyi ame kpɔtɔɛ yiwo ne ci agbea kpɔ̀ mia woe yawo nyi agɔdjetɔwo le mò wò, eye kule éyà ŋtia, mí ma teŋ nɔ̀te le mò wó o.