¹ Le Pɛrsia Fiɔ́ Kores be ƒe gbatɔ mea, ne Yehowa be nyã yié gblɔ to Yéremia be nu me ne ba vɛ émea, Yehowa nyɔ̃ Persia Fiɔa be gbɔgbɔ éna wó ɖégbé ƒã ya le yi be Fiɔ̃ ɖuƒea kpata me, ye wó ŋlɔ̃ woma cã bena: ² Persia Fiɔ Kores be gbéé nyié ya: Yehowa djiƒowó be Mawua cɔ anyigbadji Fiɔ̃ ɖuƒewo kpata neŋ, ye ɖo se neŋ be ma cu xɔ ne yi le Yeruzalem le Yuda. ³ Mia dome amesiame yí có yé be dukɔ̃a mea? Yé be Mawu ne nɔ̃ gakui, ba yi Yeruzalem le Yuda, bayi cu xɔ ne Yehowa, Israël be Mawua! ye nyi Mawu ke le Yeruzalem. ⁴ Afisiafi yi ameyiwó, nyi Mawu be djukɔwó wó kpɔtɔ lea teƒe ma me nɔtɔwó ne cɔ̃, klosalo, ku sika, kesinɔnu, ku lãwo, cɔ kpe ɖo nunana ke wó na faa, ŋti né Mawu ba ƒe yi le Yeruzalem. ⁵ Eye Yuda ku Benyamin ƒomé mégãwó, vɔsalawó, ku Lewuiviwó amesiame yi Mawu be gbɔgbɔ̃ nyɔa có, be yé wa yi cu Yéhowa ba ƒe le Yeruzalem. ⁶ Ame yiwó ƒóxlãwa wó na wó klasalónuwó, ku sika, késinɔnu xɔasiwó gaku nunana lɔ̃lɔ̃nu faa tɔwó. ⁷ Ye fiɔ̃ Kores cɔ nu yiwó Nebukadneza lɔ co Yehowa ba ƒe mea, cɔ kɔle yi be Mawuwó be xɔmea wó cɔ na. ⁸ Persia Fiɔ́, ná Mitredat, kesinɔnuwó dji kpɔla ɖé wo tó, yé hléwó cɔ na yuda be fiɔ̃vi Sesbazar. ⁹ Wo be xexléméé nyi: Sika gbá ame gbã, ku klosalo gbá ékɔ̃ɖéka, ku éwui wuivɔa siɖekɛ. ¹⁰ Sika kɔƒo ame gbã, klosalo koƒe ha cócó vegɔ̃a tɔwó kɔɖekacikatɔ, gaku nubuwó ékɔ ɖéka. ¹¹ Sikanuwó, ku klosalónuwó kpata woa nɔ̃ kɔamade ci ka weatɔ nunyawó kpata sesbazar cɔ gbɔ có Babilone gayime gakpame nɔlawó gbɔva Yeruzalem.