¹ Yin kua i niini ki kpaagi yinba i yaba , yinba yaa niba ki gba fe yeni, ² Hali min bogini ki baa tieni yaala yogunu daa ki pundi hali ki pindi nani mi fawama yeni, hali Limiali Diedo pabienli fantama daa jiidi yipo! ³ Lingi mani Limiali Diedo yinba yaaba kuli n tie ki tinga yumiindanba, yinba yaaba n ŋua O ŋoabonbilikaana, lingi mani mi tegima, lingi mani li yumiinli, li fidi yin baa ki ciadi Limiali Diedo pabienli daali. ⁴ Bi niba baa ŋa Gasa dogu, Asikaloni mo baa bodi ki tua nani kufanwalingu yeni, bi teli Asidodi yaaba yensicocolu, ki ŋabi Ki ñiani Ekiloni yaaba bi dogu nni. ⁵ Ti solindi baa yi, yinba, yaaba n tie keleteni yaaba ki baali mi ñincianma. Limiali Diedo den tuodi ki maadi kanana yaaba, yaaba n tie Filisiti dogu niba ki yediba: N ba bolini yi, baa niyendo kan sieni. ⁶ Yi diema yaama n baali miñincianma yeni mo baa tua yaa fuali n tie yankpaa kaanu, ti yandi naaluogu kaanu. ⁷ Juda niba yaaba ciadi baa diedi laa kanu, lan kane kebi baa kpa bi yandi, ku joagu yaa ba, bi baa dua Askaloni dogu yaaba diena nni; kelima Limiali Diedo, bi Tienu ki sundi bipo, O baa teni, O niba yaaba n den ye ti yonbidini yeni n goani ki kpeni. ⁸ N gbadi Moaba diema yaaba n sugidi n niba yaa sugidi, leni Amoni buolu yaaba n maadi ki yuali n niba maama, yaa yogunu ke bi den sugidi n niba ki fii maadi bi japaamaama, ki fie bi diema ki pugini bi yaa diema. ⁹ Li tie lan yaapo ke mini, Limiali Diedo upaaciamu kuli daano Isalelenba Tienu poli ki yedi: N ye ki fo, Moaba baa tua nani Sodoma yeni, Amoni buolu yaaba mo nani Gomola. laa diema kuli baa tua konkondi, likani baa tua tinyaama, leni fanwalingu o yogunu kuli po. n nuba yaaba n sieni baa cua ki taa bi diema piama kuli ki go fie bi diema mo. ¹⁰ Laa bonla baa baaba kelima bi japaadi po, leni ban den fiagi limiali Diedo U paaciamu kuli daano niba maama po. ¹¹ Limiali Diedo baa cie bi jigi,kelima o baa bolini ki tinga buli kuli. lan wani yua kuli leni o dogu nni, baa gbani Limiali Diedo nintuali ki pagi O bi diema nni. ¹² Yinba Etiopi yaaba , n baa pua ki kpa yi leni n jugisiegu. ¹³ ku baa fii ki sedi u naganu yaaba po, ki bolini Asili diema yaaba, ti yenbaadi baa Ninife dogu, u baa tua nani ku fanwanlingu yeni, ¹⁴ Li kani baa tua denyandi, leni ti fuayandi buolu kuli kaanu. a juuna leni a guda baa ya ye likani diedjendi nni, ki cigindi ki mua a diebona nni. I nuani baa yaa jagi a diebona kani ki mua. u dogu kukuli baa tie diedjendi bebe, kelima bi ŋabi ki ñani ban den maa a diena leni selidi daadi yaadi yeni. ¹⁵ Diidi mani laa dogu yaaba, yaaba n den mangidi bi pala, ki jigini bi yula, ki tua bi pala nni, baa pia kuli lie; be yala, lipaboanli baaba, likani tua ti yandi wuonkaanu; yaaba n tagi li kani kuli fuoni fegini bi yula.