¹ Abidiasi n den ba yaa bonlekaala. o Diedo li miali Diedo den maadi Edomi yaaba po ki yedi: Ti gaa laabaali ke o ñani li miali Diedo kani. O soani o tondo yi nilanbuoli siiga, ke yedi : Fii mani tin tuogi Leni Edomi yaaba bu toabu . ² Li miali Diedo yedi Edomi yaaba: N baa teni yin tadi ki cie yi nibuoli kuli, bi niba kuli baa fali yi. ³ A japaciandi biani a, yinba yaaba n la yaa kaani n kpedi bonciala, ki tua yi yama nni hme baa fidi ki ñani Ti li kani ? ⁴ Baa yi yaa ban ye naani n kpedi nani jiebani tedigu yeni, baa yi yaa ban tieni, yi ye kaanu hali hahmabila siiga, n baa ñani yi li kani ki tudi ki jiini yi mini li miali Diedo yedi yeni ⁵ Asugida yaa tie ki cua ku ñiagu, unafanu pua a, n yeni! Naani bi kan su yaala n pia bi po mi fuoma kaa? Yaaba n cenli duven tiidi bonluonkaala, ya kua a kuanu nni naani ba baa suodi li kuli kaa ? ⁶ Diidi ki le ban fidi yi tiadi maama, yinba Edomi yaaba, bi wuodi baa yin den wuoni yaa halimani. ⁷ Yin den kuanu o hantaado Leni yaa nibuoli n deli ki ñani yi yi diema nni, ki ñani yi. Yi danliba maadi Leni yi ki diedo yi. Yaaba n den di leni yi dia yi Ti diadi. Bi maadi yi maama ki tua: Diidi mani ban luo mi yama maama! ⁸ Naani laa daali la ke n baa teni bi yanfodanba n bodi Edomi diema nni, ki teni mi yanfuoma n bodi Esayu Juana nni mini li miali Diedo n yedi yeni. ⁹ Fini Tenana dogu Ti jawaanciandi baa cuo a jakoanda, mi diema nni toatieba kuli mo baa kpe. ¹⁰ Edomi yaaba den tieni yi kpiiba jakobo puoli biani mi biadima. Lani n teni ke yi baa le yi fe ki bodi Caïn hali yaa yogunu kuli po! ¹¹ Yaa daali ke bi yi balinba den paadi yi kpiiba toagola ki kua bi dogu nni, yi den ye li kani. Ban den pua caaca ki boagidi Jersalema dogu halimani, yi moko den tie yenma leni bani nilanba yeni . ¹² Edomi yaaba, yi kan den mangi yi pala yi kpiiba Juda yaaba fala daali, yi bi mangi yi pala unafanu npuaba yaa daali, bi ki sugiba bi pabiidicianli daali. ¹³ Yi kan den kua n niba dogu nni, bi bodima daali. Yi kan den nua bi fala bi bodima daali yi kan den fie yi kpiiba piama bi bolinma daali . ¹⁴ Yi kan den jia a sankada nni ki yaa kaani yaaba n tiini ki bua ki ciadi. Yi kan yaa den co yaaba n tiini ki bua ki ciadi, ki goa ki tendi ba bi yi balinba bi bodima daali. ¹⁵ Kelima li miali Diedo pabienli daali nagini, ke n ba jia yi nibuoli kuli Ti buudi. N baa soani yi ñani yin den soani nitoaba maama . yi tuona baa guani ki jiini yi yula po. ¹⁶ Yinba Isalele yaaba, yi ñini n joagagidikaali po, yeni, yaa nibuoli n sienni moko baa ño yogunkuli. Bi baa ño bi baa nali ki guo ki yuandi ki bodi cain. ¹⁷ Ama yaaba n ciadi baa ye siyono juali po. Min go baa guani ki diedi yaala Caïn n niba Jakob puoli huani baa guani ki diedi mi diema. ¹⁸ N niba Jakob puoli huani baa tie nani mi fantanma yeni, Josefi puoli huani mo baa tie nani mi fantanma ma yeni, ama Esayu puoli huani baa tua ñani mi fenma yeni. Bi baa bolini Esayu puoli huani nani mi ffantanma n yen bolini mi fenma maama yeni. O baakuli kan ciadi Esayu puoli huani siiga. Li miali Diedo n yedi yeni. ¹⁹ N niba, Juda yaaba, baa diedi Edomi diema naganu po . Yaaba n ye sefela baa diedi filisiti yaaba diema. Bi baa diedi Efilayima buolu diema leni mi dociamu Samali. Benjamin buolu yaaba baa diedi Galaadi diema. ²⁰ Bi nilanba n den cuo yaaba Ti yonbidi Isalele yaaba siiga baa diedi Kanana yaaba diema ki pundi hali Salipita dogu . Ban cuo yaaba Jelusalema ki gedini Ti yonbidi Sefanadi dogu nni, bani mo baa diedi ganu po yaa dogu. ²¹ Ban den cuo Jelusalema yaaba ti yonbidi ke bi ye Sefanadi dogu nni, Jelusalema dogu jakoanda baa cua ki baa Edomi diema ki diedima. Li miali Diedo wani o ba baa tua oobado!