² Ama n yi nani yaala n hani tienma ki bua yaala n bia ya tienma. Yi pidi n niba gbandi, ki kogidi bi nandi ki haani a kpaba. ³ Yi hmani n nibuoli gbannandi yi pidi bi gbandi ki mudi bi kpaba.Yi jia ba bonjenajena nani ban sagi ya nandi li bobili nni yeni, nani ban haani ya nandi li bobili nni yeni. ⁴ Li tie lani yaapo ke ya yogunu ke yi ti kpaani ki miadi Li Miali Diedo ke wan faabi yi, o kan guani yi liba. O baa buli o nunga laa yogunu, kelima yi soani yaa tuona n bia." ⁵ Li Miali Diedo maadi ya maama n tie na ki yedi:" Li pia n saawapuaba yaaba n boandi n niba ke bi yaadi n sanu nni. N niba yaa puni ba bonhmankaala, ban ya tua ke bu toabu baa cua. ⁶ Lani yaa po yinba bi saalipuaba yeni, yi yogunu tuoni u bianu ki yenga baa biigi yipo, yi kan go la bonlakaalaba kuli. ⁷ Yi kan go pua saawali liba kuli po. Yaaba n pua saawali kuli baa pii bi nunmu kelima ife po. kelima U Tienu kan guani bipo liba. ⁸ Ama mini, Li Miali Diedo Fuoma ye n niinni ki gbieni nni u fidu, o go puni nni li bali leni li papaali ke min waani Jakoabo puolihuani bi tagili, ⁹ ki waani bani Isalele yaaba bi tuonbiadi. Lanwani, Jokoaba puolihuani yudanba, yinba, yaaba n nani yaa bujiali n tiegi, ki go teni yaaba n tiegi kuli lebidi ki goli, cengi mani: ¹⁰ Yi maa a diena ki pugidi U Tienu dogu Jelusalema leni mi kukpama, leni li mabinli n kpedinni yipo yaa ligi. ¹¹ Jelusalema yudanba jia ti buudi ki gaani a suuna. Likani kopadicianba ya ki gaa pani bi kan bangi li balimaama, bi saawapuaba yaaba n ye likani ya ki gaa ligi bi kan pua saawali. Ama bi cili ki paagidi bi pala Li Miali Diedo po ki tua: ¹² Naani Li Miali Diedo ki ye leni ti? Fala kan nandi ti. Lanwani, kelima yinba yaa po, bi baa ko Siyono nani u kuanu yeni. Jelusalema baa tua kulinjagbejuali. Ku tiigu mo baa pidi U Tienu diegu n ye ya juali yuli po.