¹ Li Miali Diedo naacemo Musa kuuma puoli, Li Miali Diedo den yedi Nuni bijua Josue Musa naacemo: ² N naacemo Musa kpe, moala, han fii fini leni bi naa niba ki kandi Judena kpenu. Ki ban kua min den niani u ñoanianu ke n baa pa Isalele yaaba ya tinga nni. ³ A taali n baa hmaa naankani kuli, n puni a han diedi likani nani min den yedi Musa maama. ⁴ Ti diema banlu baa cili Libani fanpienma nni ki ban pundi u kpenciamu Yufilata, ki cili puoli Heta yaaba diema po ki ban pundi nintuali u kpenciamu kani. ⁵ Hali han baa ye, oba kuli kan fidi ki paadi a. N baa ye leni a min den ye leni Musa maama. N kan ha ha hali abada. ⁶ Paagi a pali ki paagi a gbanu kelima fini n baa kua bi naa niba liiga ban ban kua ki diedi min den niani bi yaajanba ke n baa pa ba ya diema. ⁷ Paagi apali bebe ki paagi a gbanu, ki tuo ki ya tiendi n naacemo Musa n den teni a ya balimaama, han da jadi jieni bi ganu ki haa ma, lani han fii ki baa tieni yaala kuli li baa cuoni apo bohanla. ⁸ Li balimaama tili ne n da foagidi leni a ñoabu, han ya cogi ki kpaagi mipo u yensiinu leni ku ñiagu kuli, yeni ke han ya tiendi man yedi yaala kuli. Kelima yene ke han fii ki baa tieni yaala kuli li baa cuoni apo bohanla. ⁹ N den teni a yaa ñoabonli n tie na: Han paagi aba ki paagi a pali. Han da jie liba kuli, han da teni a jigi n cie, kelima Li Miali Diedo a Tienu ye leni a bontienkaala kuli nni. ¹⁰ Josue den teni Isalele yaaba yudanba li naa ñoabonli: ¹¹ Gaani mani li nagili nni, ki waani bi niba li naa ñoabonli: Yin bogini li bonjekaali kelima ne leni dana taa siiga yi baa kandi Judena kpenu ki ban diedi Li Miali Diedo n den puni yi yin diedi ya diema. ¹² Josue den yedi Lubena buolu yaaba leni Gada buolu yaaba leni Manase buolu yu n den tie buolu boagidima: ¹³ Yin tiadi mani Li Miali Diedo naacemo Musa n den teni yi yaa balimaama, ya yogunu ke o den yedi: Li Miali Diedo yi Tienu puni yi mi fuodima, ki go puni yi mi naa diema. ¹⁴ Yi puoba, yi bila leni yi yandi kuli baa ya ye ne, Musa n boagidid ki puni yi ya diema nni Judena kandima. Ama yinba bi jaba yaaba n pundi ki gedi bu toabu kuli, yi baa taa ti toatiadi ki yegi leni yi kpiiba ki ban todi ba. ¹⁵ Hali Li Miali Diedo n baa pa yi kpiiba mi fuodima nani wan puni yinba maama. Hali bani mo n diedi Li Miali Diedo yi Tienu n puni ba ya diema. Li y puoli yin guani ki diedi Musa n boagidi ki teni yi ya diema., yaama n ye Judena puoli na. ¹⁶ Bi den goa ki yedi Josue: Ti baa tieni han yedi tin tieni yaala kuli,ti baa gedi han soani ti naankani kuli. ¹⁷ Ti baa tuo ki ya hua a maama kuli cain nani tin den tuo ki hua Musa maama maama. Li Miali Diedo a Tienu n ya ye leni a nani wan den ye leni Musa maama! ¹⁸ Yua n yie a ñoabonbilikaana kuli, kaa tuo ki tiendi han yedi o yaala kuli, bi baa kpa li daano. Han paagi aba ki paagi a pali bebe!