¹ Cengi mani yaa maama n tie nne, Basana naasali yinba yaaba n ye Samali juali po, yinba yaaba n mabindi taliginba, ki ŋmaadi ki midi a luoda, ki tua yi ciaba: taa ki cua nne, tin ño! ² O Diedo, Li Miali Diedo den poli O gagidiŋanma nni ki yedi: diidi a dana kpendi ke bi baa dadi ki ñani nani mu jandiamu n yen cuo i jami ban dadi ki ñanba maama yeni yi puoliŋuani mo, leni i mamali. ³ yua kuli baa pudi ki ña yaa bonli n nagi o kani, bi baa ñani ki lu yi niini, Li Miali Diedo n yedi maama. ⁴ Gedi mani Betela ki ban yaa tiendi ti tuonbiadi, Gedi mani Giligali moko, ki ban yaa tiendi ti tuonbiadi ki pugidi! padi mani yi pada tiŋaagu kuli, ki yaa tendi yi piigi biinu dana ta kuli! ⁵ Yin yaa padi mani i tuondi yaa pada leni yaa dipen n bia li daliali! kpani mani ki waani yi buama paabu! kelima yi nan bua yene! yinba Isalele bila, O Diedo, Li Miali Diedo n yedi. ⁶ Lan teni ke n mo den suani mi koma yi dogi kuli nni, ke yi diedi nni li bonjekaala den poadi . ba leni lan kuli yii den lebidi ki guani n kani, Li Miali Diedo n yedi maama. ⁷ Lan yaapo n den sieni ki taaga hali u jietaagu yogunu daa den sieni ŋmaali ta. n yen teni ki taaga n mii u naa dogu nni ki lagidi ki ŋaa u naa dogu; u naa kuanu nni yen baa ki taaga, u nee mo n kuodi kelima mi taluoma po. ⁸ Dogi lie bi dogi taa yen gedi dogu to nni ki ban lingi mi ñinñokaama lan kuli yi ñunñuulu ki gbendi. ama baa leni lan kuli yii den lebidi ki guani n kani. ⁹ N den teni yi kuani n faani, ki teni a nanyuana kua yi. i naaci den ŋmani ki bolini yi sadinginba yaa coali n kaa wa, leni duven tiidi kuani, leni i kankanŋuke kuani, leni Olife kuani. Ama ba leni lan kuli yii den lebidi ki guani n kani. Li Miali Diedo yedi yeni. ¹⁰ N soani yi siiga u yianbiadipuodiko nani Ejibiti yu yeni, N den kpani yi nipanba leni mu jugisiedi, ki teni ke bi fie yi taami; yi kpiema nuulubiadu den kua yi. ama baa leni lan kuli, yii den lebidi ki guani n kani. Li Miali Diedo n yedi. ¹¹ N den yagi yi yama ki bolini yi nani Sodoma leni gomola dogi U Tienu n bolinba maama yeni; yi den tua nani yaa datala ke bi kuudu ki ñani u mu n yeni. baa leni lan kuli yii den lebidi ki guani n kani. Li Miali Diedo n yedi yeni. ¹² Li tie lan yaapo , ke yi baa le min baa soani yi maama yinba Isalele yaaba; kelima min baa soani maama yaapo, lan wani ŋan bogini ki tuogi ŋa Tienu, oo Isalele! ¹³ Diidi mani yua n tagi a juana leni u faalu, ki go wangidi bi nisaaliba o yantiana, ki teni a yenda n guani ki tua biigili, O cuoni ki tinga juaciama po. O yeli n tie Li Miali Diedo U Tienu U paaciamu kuli daano.