¹ O Diedo den maadi yeni Moyiisi, ki yedi, ² "Maadi Haarɔn. Yedi o ya maama ne, 'A ya cuoni fidsanmu lele ne, ŋan faami mun ya co u fidsantuankaanu nintuali po.'" ³ Haarɔn den tieni yeni i. O den tuani mu fidsanmu ke mu guani u fisantuankaanu nintuali po i, nani O Diedo ń waani Moyiisi maama yeni i. ⁴ O Diedo den waani Moyiisi ban ba tagi u fidsantuankaanu yeni maama, ki dɔgdi ki waani o la li nannali. Li den tie ya wula n kpiagi, ki cili li tiipo, ki ban do poli po, li puugu nannana kani ke bi cuo ki pua ki tandi tandi. ⁵ O Diedo go den maadi yeni Moyiisi, ki yedi, ⁶ "ŋan gandi Lefi yaaba, Israyeli buoli kuli siiga, ki gagdi ki wuli ki ŋanbi ba. ⁷ ŋan ba tieni maama, ki ŋanbi ba n ne: ŋan taa ti tuonbiadi sugli ñingagdiŋanma, ki mii mii bipo. ŋan cedi ban kuo bi gbanu po kobdi kuli, ki ŋuudi bi tialakaadi kuli, ki ŋuudi ki ŋanbi bi yula. ⁸ ŋan cedi ban baa naatonpanga yeni ya yoma n nugi ki ŋmadi yeni mi kpama. Ki go cedi ban baa naatonpanga, tianga, ti tuonbiadi sugli miabu po. ⁹ ŋan cedi Lefi buolu yaaba ń cua u kadkaanu gbandieli nintuali, ki taani Israyeli nitaanli kuli, likani. ¹⁰ A ya nagni Lefi yaaba O Diedo nintuali, Israyeli nitaanli kuli ń maani bi nui Lefi buolu yaaba po. ¹¹ Haarɔn ba taa Lefi buolu yaaba, ki teni O Diedo nani Israyeli yaaba paabu yeni, ban ya tuuni O Diedo tuona. ¹² Lefi buolu yaaba ba maani bi nui a naatona yula po. ŋan padi naatonyenli ti tuonbiadi sugli miabu po, ya naatonli n sieni mo, ń ta padjuukaali ya paabu O Diedo po, wan tieni sugli Lefi buolu yaaba po. ¹³ ŋan waani Lefi buolu yaaba Haarɔn yeni o bijaba kani, ki yugdi ki duoni ba nani paabu yeni, Mini O Diedo po. ¹⁴ A ya tieni yeni, a ba gagdi Lefi buolu yaaba, ki paadi ba yeni Israyeli buoli yii n sieni. Lefi buolu yaaba baa tie Mini O Diedo yaaba i. ¹⁵ Lani ya pendi, Lefi buolu yaaba ba kua u kadkaanu gbandieli nni, ki ya tuuni li tuona. ŋan gagdi ki ŋanbi ba, ki puni ba nani bi tie paabu yeni. ¹⁶ ŋan tieni yeni, kelima bi gagdi ki tie n ya buolu i, Israyeli buoli kuli siiga. Bani n ba ga Israyeli yaaba puolŋuani bonjakpiga kuli kaanu. N taa Lefi buolu yaaba, ke bi tua n ya buolu i. ¹⁷ Israyeli yaaba bonjakpimu kuli tie Mini O Diedo yaaba i. Bi niba bonjakpiamu yeni ti yandi bontonkpiamu kuli. Ya daali ke n den kpa Ejipti diema nni bonjakpimu yeni, n den paadi ba, ke bi tua n ya buolcelu i. ¹⁸ N gandi Lefi buolu yaaba Israyeli buoli kuli siiga, ke u tua n ya buolcelu, ki ga a bonjakpila kuli kaanu. ¹⁹ N taa Lefi buolu yaaba ki puni Haarɔn yeni o bijaba. N gandi ba Israyeli buoli kuli siiga, ke ban ya tuuni li nitaanli kuli tuona u kadkaanu gbandieli nni. N gandi ba ke ban ya miadi Israyeli nitaanli po sugli, falaciamoba kuli ń da baa bi yula po, kelima bi nagni, ki kuli u kaangagdiŋamu." ²⁰ Moyiisi, Haarɔn yeni Israyeli nitaanli kuli den tieni Lefi buolu yaaba yeni i. O Diedo ń den bili Moyiisi ya ñɔbonli, ke ban tieni, Lefi buolu yaaba po yeni, Bi den tieni kaa pɔdi libakuli. Israyeli nitaanli kuli den taani ba ke bi tieni, ki bogdi ba. ²¹ Lefi yaaba den ŋuudi, ki gagdi ki ŋanbi bibá, ki ŋuudi bi tialakaadi, ke Haarɔn waani ba, ki taa ba nani paabu yeni, ki puni O Diedo. O den padi bipo ti tuonbiadi sugli padli, ke O Diedo ń gagdi ki ŋanbi ba. ²² Lani ń pendi, Lefi buolu yaaba den kua bi tuonli nni, u kadkaanu gbandieli nni, Haarɔ yeni o bijaba nintuali. O Diedo ń den bili Moyiisi li ñɔbonli ke ban tieni alefi buolu yaaba maama yeni, bi den li tieni Lefi yaaba yeni i. ²³ O Diedo go den maadi yeni Moyiisi, ki yedi, ²⁴ "Ne kuli tie Lefi buolu yaaba, ya jaba n pia piilie n bina mu (bi 25), bii ki cie ya tuona i. Bani n ba kua li tuoncagli nni, ki ya tuuni u kadkaanu gbandieli nni. ²⁵ Bi ya ban pundi bina piimu (50), li buali ke ban ji ña li tuoncagli nni i. Bi ya pundi li bina, bi ji kan fidi ki yaa tuuni li tuona. ²⁶ Bi ba fidi ki ya todi bi kpiiba yaaba n tuuni li tuona, ama, bani ji kan fidi ki ya tuuni li tuona. ŋan tieni ania, ki ya ŋmagdi Lefi buolu yaaba li tuona nni kuli."