¹ Balaama ń la ke O Diedo pali ba mangi yeni wan selgi Israyeli, o ji ki fuadi nani kpiama yeni, ki ba cengi U Tienu ń ba maadi o yaali. Ama, o den ŋmagdi o nunga ki nuali mi fanpiema po i. ² Balaama den yaadi o yuli, ki diidi, ki la Israyeli yaaba jondi, ke buolu kuli taani ki ye o jondi nni, ke U Tienu foŋanma jiidi opo. ³ Balaama den maadi ya sawali n jiidi opo, ki yedi, " Beweri bijua, Balaama, ya ja nuni n luodi boncianla, bua maadi mi maama. ⁴ O cengi, ki go maadi U Tienu maama. Wani yua n laadi ti kpiagdi kuli daano ń dɔgdi opo yaali, wan gbaani ya yognu ki ba pugi o, ki luodi o nuni kuli. ⁵ Jakɔbo, diidi mani bi jondi ń ŋani maama, Israyeli, i yekaanu ŋani boncianla! ⁶ Bi tie nani ya kpeni n puubi yeni, nani ya kpinkuanu n ye li kpenjaali po yeni, nani O Diedo ń ŋuu ya kpabayelbu yeni, nani ban ŋuu ya sedili tiidi u ñinkunu yeni. ⁷ Bi gɔgdicaana gbie yeni mi ñima, ki jɔgni bi bonbulkaali bonŋanla. Bi badciamo ba baa ti kpiagdi ki cie Agagi, Bi ba fangi bi diema boncianla. ⁸ U Tienu ñani u Ejipti diema nni, yeni ya paalu n tie nani o muanua paalu yeni, Israyeli ba di ya nibuoli n tie bi yibalinba. Bi ba mudi bi kpaba yomyomi. Bi piemi ba duoli ba boncianla. ⁹ Israyeli laabi nani li yanbɔli yeni, nani o yangbanñua yeni, ŋma ba paani o pali ki nagni ki mabni o? Yua n selgi Israyeli ń ya ye yeni li seli, yua n soli Israyeli mo ń ya ye yeni ti solindi." ¹⁰ Balaka pali den beni boncianla Balaama po, hali ke o pua o nui yeni li pabienli. O den yedi Blaama, "N yini a ke ŋan soli n yibalinba i, ama, diidi, taalma taa n yeni ke a selgi ba. ¹¹ Lanwani ii, ŋan siedi n kani mɔlane, ki ya kuni a denpo. N den yedi ke n ba puni a ti kpiagdi paabu, ama, O Diedo yie ke a ka baa li kpiagdi paabu." ¹² Balaama den yedi Balaka, "N den yedi ŋan den sɔni ya tonda n kani yeni, ¹³ Bá Balaka ya puni nni o badidiegu, ke ku gbie yeni ŋanjilfa yeni wula, N kan fidi ki kandi O Diedo ñɔbonli po, ki tieni bonŋanli bii bonbiigu, lanyaaka lan li buali ke min tieni yaali kuli. Min ba fidi ki maadi yaali tie O Diedo ń cabi nni ke min yedi yaali i. N den ki tuodi ki waani ba aa? ¹⁴ Diidi, Mɔlane, n ba guani ki kuni n denpo. Ama, cedi min tuodi ki waani a li nitaanli ne ń ba tieni a diema nni yaaba maama, ya dana n kpendi." ¹⁵ Balaama den cili ki pua sawali ki yedi, Bewori bijua, Balaama, yua ya nuni n luodi boncianla, pua ya sawali ne. ¹⁶ Neɔ̈ tie yua n cengi U Tienu ñɔmaama i, yua n pia ya banma n ñani ti kpiagdi daano kani, yua n nua u paaciamu daano ń dɔgdi yaali, o ya gbaani ya yognu ki ba pugi o, ki luodi o nuni. ¹⁷ N nua yaali n ba tieni, ama, li ki tie mɔlane ka. N nua yaali n ba tieni, ama, li dá fagi. ŋmaabiga ba pudi Jakɔbo puolŋuani po, Yua n ba yugdi u badigbiamu ba ña Israyeli nitaanli nni. O ba pua ki duoli Mowabi yudanba, ki bolini Seti puolŋuani kuli. ¹⁸ Edomi ba tua Israyeli yaaba diema i, Seyiri mo ba tua bi diema i, Israyeli yibalinba, bi ba kɔni ki paadi yi, ki diedi yi yeni u paalu. ¹⁹ O badciamo ba ña Jakɔbo puolŋuani siiga, ki diedi i nibuoli kuli, o ba bolini i dociami nni ya niba n sieni kuli." ²⁰ Balaama den diidi Amaleki, ki cili ki pua sawali, ki tua, "Amaleki den tie ya diema n den pia u fidu boncianla i dogi kuli siiga, ama, u juodma kuli, tie mi bolinma i." ²¹ Balaama den diidi Keneti yaaba, ki cili ki pua sawali, ki tua, "Yin kua naakani ne pia u fidu boncianla, i tedi i tedigu ku tantiagu po. ²² Ama, Kayini ba bodi, ya yognu ka Asiri yaaba cua ki cuo i niba ti yonbidi." ²³ Lanwani ii, Balaama den juodi ki pua o sawali, ki yedi, "Falaciamo! ŋma ba fidi ki sani ki ciadi U Tienu ń ba tieni yaali ne po? ²⁴ Ti ñinbiadi ba ña Citimi kpedegli po, ki cua; Bi ba tuogi Asiri yaaba bu tɔbu, ki diedi bi dogu Eberi, ama, bani bilie kuli ba juodi yeni bolinma i." ²⁵ Balaama ji den fii, ki siedi, ki kuni o denpo, Balaka mo den siedi likani. ²⁵ KLNML?