¹ Israyeli yaaba yeni bi nitaanli kuli den fii ki gedi Cini fanpienma nni, bi den kali Kadeci dogu nni. Lankani ke Miriyama den kpe, ke bi piini o. ² U ñuñuunu den cuo li nitaanli likani, ke baa pia ñima ki ba ñu, ke bi taani bikuli, ki yie Moyiisi yeni Haarɔn po. ³ Li nitaanli den bulni, ki gagi yeni Moyiisi, ki tua, "Li bi baa tu tipo, ti ya bi kpe, ti kpiiba Israyeli yaaba ń kpe ya yognu O Diedo nintuali yeni! ⁴ Be n cedi ke a taa O Diedo nitaanli ki cua yeni ba mi fanpienma nni ne, yeni bi yandi kuli, ke ban kpe, e? ⁵ Be n cedi ke den tieni ki ñani ti Ejipti diema nni, ki cua yeni ti ya kaanu nbia bonciala ne e? Nekanba, ti kan fidi ki buli bonli, kankandi ki ye, daamɔngu tiidi ki ye, grenadie tiidi ki ye, to, ñima mo n ki ye ke nilo ba ñu yeni." ⁶ Lanwani ii, Moyiisi yeni Haarɔn den fuadi li nitaanli kani. Bi den gedi u kadkaanu gbandieli bulñɔbu kani, ki baa ki labni. Likani ke O Diedo kpiagdi den dɔgdi bipo. ⁷ O Diedo den maadi yeni Moyiisi, ki yedi, ⁸ "ŋan taa a gbiamu, fini yeni a kpelo Haarɔn, ki taani li nitaanli. ŋan maadi yeni ku tangu bi nunbu nni, ki yedi gu ke kun wugdi mi ñima. Mi ñima ba ña ku niinni, ŋan teni li nitaanli yeni bi yandi ban ñu." ⁹ Moyiisi den taa u gbiamu, O Diedo nintuali nani wan den yedi ke wan tieni maama yeni. ¹⁰ Lanwani ii, Moyiisi yeni Haarɔn den yini li nitaanli, ki taani ba ku tangu kani. Moyiisi den yedi ba, "Cengi mani, yinba mi yenyiema danba ne. Li buali ke tin cedi mi ñima ń ña ku tangu ne nni i, ipo oo?" ¹¹ Lanwani ii, Moyiisi den duoni o nuu, ki pua ku tangu, taalma lie, yeni u gbiamu, ke mi ñima daa ku niinni. Li nitaanli yeni bi yandi kuli den ñuni ki guo. ¹² Lanwani ii, O Diedo den yedi Moyiisi yeni Haarɔn, "Nani yin ki dugi npo, kaa cɔlni n gagdiŋanma Israyeli nitaanli nintuali yeni, ii, i kan pundi yeni li nitaanli, min puni ba ya diema nni yeni." ¹³ Bi den yini likani Meriba ñima, kelima, Israyeli nitaanli den kɔni yeni O Diedo likani, ke o waani ba ke o gagdi ki ŋani cain. ¹⁴ Moyiisi den sɔni a tonda, ke bi ñani Kedeci, ki gedi Edomi bado kani, ki yedi o: "A kpiiba Israyeli yaaba n sɔni ti ke tin caa ya tondu ne: "A bani ya fala n den baa tikuli po. ¹⁵ A bani ke ti yaajanba den gedi ki kua Ejipti diema nni, ki kali ke li waagi. Ejipti yaaba den wangi tinba yeni ti yaajanba kuli falaciamo. ¹⁶ Ti buudi ki fabni, ki mia o Diedo, ke o gbadi tipo mi niñima, ki sɔni o maleki, ke o ñani ti Ejipti diema nni. Diidi, ti ye a diema kunu, Kedeci ne i. ¹⁷ Ti mia ŋa, ke ŋan cabi ti, tin pɔndi a diema ki gedi tin caa naani, ti kan tɔgni kuani bii daamɔngu tiidi kuani nni, ti go ki lingi ke tin ñu i caana nni ñima ka. Ti baa li kubi li sanjali i, hali ki ban ña a diema nni, ti kan pɔni jienu bii ganu po, kase ti ban puodi a diema kpaali." ¹⁸ Ama, Edomi bado den guani ki jiini o, "I kan tɔgni ki pɔndi n diema. I ya tieni yeni, n ba tuogi yi yeni ki jugsiega, ki kɔni yeni yi." ¹⁹ Lanani ii, Israyeli nitaanli den yedi o, "Ti ba tɔgni li sanjali baba i. Ti yadi bii tinba ya ñuni a ñima, ti ba pa mipo. Ti li miadi ke tin cuoni ki pɔndi baba i, ti kan tieni bontɔli." ²⁰ Ama, Edomi bado den jiini ba, "I kan tɔgni ki pɔndi n diema." Lanwani ii, Edomi bado den tuogi Israyeli yaaba yeni yeni ya tɔtieba n yabi, ki go pia u fidu. ²¹ Edomi bado den yie ke o kan cabi Israyeli yaaba ban kandi li kpaali, ki tɔgni ki pɔndi o diema. Lanyapo i, ke Israyeli yaaba den lebdi, ki kogni Edomi diema. ²² Lanwani ii, li nitaanli den fii Kadeci, ki tudni bi cenli. Israyeli yaaba yeni bi nitaanli kuli den pundi Hori juali kani. ²³ O Diedo den maadi yeni Moyiisi yeni Haarɔn, Hori juali po, Edomi diema kpaali kani, ki yedi, ²⁴ Haarɔn ba gedi ki taani yeni o yaajanba, kelima wani kan kua min puni Israyeli yaaba ya diema nni. Kelima yinba bilie kuli, den kandi n ñɔmaama po, Meriba ñinbunli kani. ²⁵ ŋan taa Haarɔn yeni o bijua Eleyasari, ki duoni ba Hori juali po na. ²⁶ ŋan landi Haarɔn salga yidiciamo tiayiekaadi, ki lani o bijua Eleyasari. Haarɔn ba kpe, ki gedi ki taani yeni o yaajanba nekanba i." ²⁷ Moyiisi den tieni nani O Diedo ń den waani o maama. Bi den doni Hori juali yuli po, ke li nitaanli kuli nua ba. ²⁸ Moyiisi den landi Haarɔn salga yidma tuonsɔntiadi, ki lani o bijua Eleyasari. Haarɔn den kpe li juali yuli po yeni i. Moyiisi yeni Eleyasari den yuandi ki jiidi. ²⁹ Li nitaanli kuli ń den bandi ke Haarɔn kpe, mi diema nni niba kuli den taani, buudi Haarɔn kumoe hali dana piitaa.